Արցախի եւ Հայաստանի Հանրապետութեանց Ազգային Ժողովներու Հ.Յ.Դ. խմբակցութիւնները տարեկան նուազագոյնը երկու հանդիպում կ՛ունենան թէ՛ Երեւանի եւ թէ Ստեփանակերտի մէջ:
16 Հոկտեմբերին Արցախի Հ.Յ.Դ. պատգամաւորները Հ.Յ.Դ. Հայաստանի Գերագոյն Մարմինի կեդրոնին մէջ հանդիպեցան Հայաստանի Ազգային Ժողովի Հ.Յ.Դ. խմբակցութեան պատգամաւորներուն եւ դաշնակցական նախարարներուն հետ:
Արցախի Հ.Յ.Դ. խմբակցութեան պատգամաւոր Դաւիթ Իշխանեան, «Երկիր»ի հետ զրուցելով հանդիպման նիւթերուն մասին՝ տեղեկացուց, որ այս անգամ քննարկման նիւթերը պիտի ըլլան քանի մը օրէնսդրական նախաձեռնութիւններ: «Տեղեկատուական փոխանցումներէ բացի, մենք պիտի ունենանք որոշ օրէնքներու շուրջ քննարկումներ, յատկապէս` այն օրէնքներուն վերաբերեալ, որոնք Հայաստանի Հանրապետութեան մէջ վերջերս ընդունուած են»,- ըսաւ ան, ապա՝ աւելցուց, որ այս քննարկումներուն մէջ պէտք է ընդգրկել նաեւ Արցախի Ազգային Ժողովի այլ խմբակցութիւններու անդամներ:
Իշխանեան շեշտեց, որ պիտի անդրադառնան տեղական ինքնակառավարման մարմիններու օրէնքին, քանի որ Հայաստանի մէջ արդէն համայնքներու խոշորացումը գործնականօրէն իրականացած է: «Արցախի մէջ սահմանադրական փոփոխութիւններէն ետք ունինք նոր մօտեցումներու անհրաժեշտութիւն, ինչ որ սահմանադրական պահանջ է, այս հարցերն ալ պիտի քննարկենք»,- յայտնեց ան:
Իշխանեանի համաձայն՝ իրենք պիտի շրջին նաեւ Հայաստանի խոշորացուած համայնքներուն մէջ:
«Կը նախատեսենք Հայաստանի տարբեր խոշորացուած համայնքներ այցելել` ուղղակիօրէն ծանօթանալու եւ մեզի համար լուսաբանելու այն իրական քայլերը, այն դրական տեղաշարժները, ինչու չէ` նաեւ այն բացերը, որոնցմէ մենք կրնանք խուսափիլ, իսկ առաւելութիւններէն օգտուիլ նաեւ Արցախի պարագային»,- ըսաւ ան:
Իշխանեան նշեց, որ իրենց մօտ տեղական ինքնակառավարման մարմիններու համակարգը տակաւին կայացած չէ: «Սահմանադրութեան մէջ «խոշորացում» հասկացութիւնը յաջողեցանք չներառել, մենք անոր փոխարէն ձեւակերպած ենք` այդ մարմիններու վերանայման խնդիրը: Յառաջիկայ 3-5 տարիներուն ընթացքին մենք պէտք է որոշակիօրէն վերատեսութեան ենթարկենք տեղական ինքնակառավարման մարմիններու գործունէութիւնը` նկատի առնելով այն հանգամանքը, որ տեղական ինքնակառավարման մարմիններու համակարգը Արցախի մէջ այդպէս ալ չէ կայացած»,- ընդգծեց ան:
Հայաստանի Հանրապետութեան Ազգային Ժողովի Հ.Յ.Դ. խմբակցութեան պատասխանատու Արմէն Ռուստամեան, «Երկիր»ի հետ զրոյցի մը ընթացքին, նշեց, որ Դաշնակցութիւնը՝ ուր ալ ըլլայ, նոյն նպատակները պէտք է հետապնդէ եւ նոյն ռազմավարութեամբ հանդէս գայ, ուստի նման հանդիպումներ անհրաժեշտ են:
«Անհրաժեշտութիւնը միշտ կայ, որպէսզի մենք մեր կատարած եւ ակնկալուող քայլերուն հետ կապուած նախնական քննարկումները կատարենք, զանոնք իրարու հետ համաձայնեցնենք, որպէսզի ընդհանուր ռազմավարութիւնը պահպանենք: Ասիկա է ընդհանուր նպատակը, բայց յստակ հարցեր կ՚առաջանան` տուեալ պահուն քննարկուող օրէնքներու, նախաձեռնութիւններու վերաբերեալ, զորս մենք կ՛իրականացնենք»,- ըսաւ ան:
Ռուստամեան ընդգծեց.- «Յայտնի է անվտանգութեան հարցերուն վերաբերեալ մեր տեսակէտը: Մենք մէկ միասնական համակարգի մէջ ենք, եւ ասիկա պէտք է ոչ թէ միայն խօսք ըլլայ, այլ պէտք է միս ու արիւն ստանայ»,- ըսաւ ան, ապա՝ աւելցուց.- «Մենք չենք կրնար շրջանցել բանակաշինութեան, սահմանային իրավիճակներու հետ կապուած հարցերը, մեր ընելիքները»:
Պատգամաւորը ըսաւ, որ պէտք է բոլոր ջանքերը գործադրուին, որպէսզի կարենանք մեր բանակը զօրացնել: Բացի ատկէ, Ռուստամեան տեղեկացուց, որ նոր նախաձեռնութիւններ ունին` պահեստազօրի ձեւաւորման հարցով:
«Ապրիլեան պատերազմէն ետք ատիկա գլխաւոր հարցն է` եթէ օր մը, Աստուած մի՛ արասցէ, պատերազմական վիճակ յառաջանայ, մենք պատրաստ ունենանք այն գունդերը, խումբերը, որոնք գիտեն` ի՛նչ ընեն, որովհետեւ ժամանակակից պատերազմը կը պահանջէ համապատասխան մակարդակի ուսուցում եւ պատրաստուածութիւն»,- եզրափակեց ան:
