Հ.Յ.Դ. Բիւրոյի երիտասարդական գրասենեակի եւ Հ.Յ.Դ. Յունաստանի Երիտասարդական Միութեան կազմակերպութեամբ, անցնող շաբաթավերջին գումարուեցաւ Հ.Յ.Դ. Երիտասարդական Միութիւններու համեւրոպական խորհրդաժողովը, որ Աթէնքի մէջ համախմբեց Եւրոպայի տարբեր Երկիրներէ աւելի քան 50 դաշնակցական երիտասարդներ։ Ներկայ էին պատուիրակներ Հայաստանէն ու Արցախէն, Անգլիայէն, Պելճիքայէն, Հոլանտայէն, Շուէտէն, Ֆրանսայէն, ինչպէս նաեւ Յունաստանի Հ.Յ.Դ. Երիտասարդական Միութեան անդամներ։
Ժողովը գումարուեցաւ Գոքինիոյ շրջանի «Զաւարեան» Կեդրոնի «Զաքարեան-Սարաճեան» սրահէն ներս։
Բացումը տեղի ունեցաւ Ուրբաթ 10 Մայիսի երեկոյեան ժամը 6:30ին։ Ներկայ էին Հ.Յ.Դ. Բիւրոյի անդամներ ընկ. Յովսէփ Տէր-Գէորգեանը եւ ընկ. Մուրատ Փափազեանը, Հ.Յ.Դ. Յունաստանի Կեդրոնական Կոմիտէի ներկայացուցիչ ընկ. Սերգօ Գույումճեանը եւ անդամ ընկ. Յարութ Սերոբեան։
Բացման խօսքով հանդէս եկաւ Հ.Յ.Դ. Յունաստանի Երիտասարդան Միութեան ատենապետ ընկ. Արման Գրիգորեան, ապա՝ ողջոյնի խօսքեր ուղղեցին Հ.Յ.Դ. Բիւրոյի կողմէ ընկ. Մուրատ Փափազեան եւ Հ.Յ.Դ. Յունաստանի Կեդրոնական Կոմիտէի կողմէ ընկ. Սերգօ Գույումճեան։
Խորհրդաժողովը՝ երեք օրուան յագեցած օրակարգերու շարքով, իր քննարկումները կեդրոնացուց զանգուածային ելեկտրոնային լրատուամիջոցներու եւ ընկերային ցանցերու օգտագործման վրայ, Հայ Դատի եւ Արցախի ճանաչման աշխատանքներուն մէջ։ Այս թեմային առընթեր ներկայացուեցան Դաշնակցական մամուլի դերը, պատմութիւնն ու սկզբունքները, Դաշնակցական Երիտասարդութեան դերը Հայ Դատի եւ Արցախի պայքարին մէջ, Հ.Յ.Դ. Երիտասարդական գրասենեակի առաջնահերթութիւններու եւ կառոյցի կապուած նիւթեր։
Կարճ ներածականներ կատարեցին ընկ. Մուրատ Փափազեան, ընկ. Յովսէփ Տէր-Գէորգեան, ընկ. Միհրան Քիւրտօղլեան։ Աշխատանքային խումբերու պահուն, քննարկուեցան Հ.Յ.Դ. երիտասարդական եւ ուսանողական միութիւններու դասական մամուլի իրավիճակն ու տարուած քարոզչութիւնը ընկերային ցանցերուն վրայ։
Ժողովը մանրամասնօրէն քննեց ու բանաձեւեց իր զրոյցի առարկայ եղած թեմաները, ապա առաջարկներ կատարեց, երիտասարդներուն մօտ զարգացնելով տեղեկատուական մարզէն ներս իրենց կարողութիւնները համախբելու եւ իսպաս Հայ Դատի աշխատանքներուն ծառայեցնելու գաղափարը։
Ժողովի պահերէն զատ հետաքրքրական այլ պահեր նախատեսուած էին ժողովական երիտասարդներուն համար, որոնք առիթը ունեցան Աքրոփոլիս այցելելու եւ հնամեայ պատմական այս վայրի գեղեցկութիւնը վայելելու, ինչպէս նաեւ ծանօթանալու Փիրէայի եւ Աթէնքի գեղեցիկ վայրերուն։
Ընկերային պահերը աւելիով զուարճացուցին երիտասարդները, որոնք Ուրբաթ՝ 10 Մայիսի երեկոյեան, Ֆիքսի «Արամ Մանուկեան» ակումբէն ներս յունական եւ հայկական երգերով զուարճացան, պարելով ու երգելով՝ հայկական քոչարին եւ «եարխուշտա»ն, ինչպէս եւ յունական «սիրթաքին»։
Նոյնպէս Շաբաթ, 11 Մայիսի գիշերը, բոլորը միասին ներկայ գտնուեցան Գոքինիոյ «Զաւարեան» Կեդրոնէն ներս Մայիսեան յաղթանակներուն նուիրուած խնճոյքին, որ շատ մեծ թիւով հայրենակիցներ համախմբեց ու մինչեւ առաւօտեան ժամերը՝ հայաբոյր, երիտասարդական բարձր տրամադրութեամբ յատկանշուած ժամեր տրամադրեց։
