Հ.Մ.Ը.Մ.ի Շրջանային Վարչութիւնը կազմակերպեց «5րդ հեծելարշաւը՝ նուիրուած Ցեղասպանութեան Նահատակներուն, Կիրակի՝ 15 Հոկտեմբեր 2017ին, առաւօտեան ժամը 11։00ին, Նէա Զմիռնիի Ցեղասպանութեան Յուշարձանին հրապարակին առջեւ: Հեծելարշաւը կազմակերպուեցաւ՝ միասնաբար Նէա Զմիռնիի փոխ-քաղաղաքապետուհի տիկ. Քարիոֆիլիի մարզական եւ մշակութային կազմի գրասենեակին հետ, եւ հովանաւորութեամբ՝ Յունական Հեծելարշաւի Ֆետերասիոնին:
Ճիշդ է, որ ձեռնարկի իրականացման թուականը հեռու էր Ապրիլէն, բայց շատ յուզիչ էր, որ այս սուրբ եւ կարեւոր նպատակին իրագործման օժանդակեցին բոլորն ալ, որպէսզի ապահով ձեւով կատարուի:
Մեթրոփոլիթան հիւանդանոցի սարքակառքը, Կարմիր Խաչի կամաւոր Սամարիդէս, Երթեւեկութեան Քալիթէայի քաղաքապետութեան աշխատաւորներ, բոլորը իրենց հանգիստի օրը՝ Կիրակին զոհեցին մի քանի ժամուան համար եւ ներկայ էին՝ սրտանց օժանդակելու համար եւ յայտնելու իրենց յարգանքը բոլոր մեր անմեղ նահատակներուն հանդէպ:
Յուզիչ վարկեաններ ապրեցանք, երբ կը մօտենային յոյն փոքրիկներ իրենց ծնողներով եւ կը խնդրէին արտօնութիւն, որպէսզի լրացնեն մասնակցութեան թուղթը եւ մասնակցին իրենց հեծիկով: Մեր աչքերուն մէջ անոնք անհամբեր նայուացքով կը սպասէին մեր դրական պատասխանին:
Բարձրագոյն էր թիւը մասնակցողներուն, որոնք գիտակցաբար եկան յարգելու ձեռնարկին նպատակը:
Տարուան պարզ օր մը յոյներ եւ հայեր լեցուցին այդ վայրը ու ճամբաները՝ եռագոյններով, հեծիկի զանգակներով, կանգ առին պասերը եւ ինքնաշարժները, որպէսզի մենք անցնինք:
Շատեր, որ կ՚անցնէին հրապարակէն եւ կը լսէին հայկական երաժշտութիւն ու կը տեսնէին ծածանումը հայ ազգային ու միութենական դրօշակներուն, կը հարցնէին օրուան պատգամին մասին. մեր կամաւոր քոյրերն ու եղբայրները կը բացատրէին ձեռնարկին իմաստը:
«1918ին մանուկ մը ծնաւ հայոց ցաւէն, տառապանքէն: Ջարդին արիւնով մկրտեցին այս մանուկը եւ զայն կոչեցին Հ.Մ.Ը.Մ.: Իսկ այդ մանուկին պարտականութիւն տուին՝ ծառայել հայ ժողովուրդին»:
Սամուէլ Մկրտիչեան
Եղբ. Յակոբ Եդիմեան յունարէն լեզուով արտասանեց օրուան պատգամը, որ լսուեցաւ միքրոֆոններէն: Միութիւնս նուիրեց յուշատախտակ՝ տիկ. Քարիոքիլիի կազմին, այսքա՜ն տարիներու գործակցութեան ի երախտագիտութիւն:
Կարեւոր չէ միայն Ապրիլին յիշենք մեր նահատակները. կարեւորն է՝ անդադար յարգենք իրենց յիշատակը։ Ինչպէս կ՚ըսեն՝ եթէ չյիշես, կը մոռցուին:
Բարձրացիր՝ Բարձրացուր։
Կիրակի՝ Հոկտեմբերի 15ին, տեղի ունեցաւ 5րդ հեծելարշաւը՝ Մեծ Եղեռնի անմեղ զոհերի յիշատակին։
Խրիսոստոմու Նէա Զմիռնիի Փլաթիան լեցուած էր թէ՛ հայ, թէ՛ յոյն, թէ՛ տարեց, թէ՛ փոքրիկ բարեկամներով։
Մեզ համար՝ իբրեւ սփիւռքի մէջ ապրող հայ եւ իբրեւ սկաուտ՝ հրաշալի առիթ էր օժանդակելու, օգնելու եւ վայելելու այդ միջոցառումը։
Զգացմունքները շատ էին եւ ուժեղ։
Հպարտութիւն… Յուզմունք… Լիութիւն… Հանգստութիւն։
Որովհետեւ մեզ շատ լաւ բացատրած են մեր մեծերը, որ մենք հայ ենք եւ մանաւանդ հայրենիքէն հեռու ապրելով՝ պէտք է մեր պատմութիւնը պատմենք, ցուցադրենք։
Ամէն տարի մասնակցելով Ցեղասպանութեան վերաբերեալ շարք մը զանազան միջոցառումներու՝ կը զգանք, որ Հայ Դատի իրագործմանը աւելի ու աւելի կը մօտենանք, քանի որ այն նաեւ Հ.Մ.Ը.Մ.ի Երէց Սկաուտի խոստումն է։
Ամէն տարի սիրով եւ ոգեւորութեամբ կը սպասենք հեծելարշաւի միջոցառմանը…
Գալ տարի նորէն՝ նոյն տեղը պիտի սպասենք ձեզ բոլորիդ։
Քոյրեր՝ Մարիաննա Ասլանեան
եւ Միլենա Ասլանեան
Այս տարի, 15 Հոկտեմբեր 2017ին, կատարուեցաւ 5րդ հեծելարշաւը՝ ի յիշատակ Հայոց Ցեղասպանութեան անմեղ զոհերու, Նէա Զմիռնիի Ցեղասպանութեան Յուշարձանին առջեւ:
Մենք՝ իբրեւ Հ.Մ.Ը.Մ.ի սկաուտներ, ներկայ գտնուեցանք մեծ ուրախութեամբ եւ փորձեցինք մեր կարելին կատարել: Ունէինք ամէն տարիքի մասնակցողներ՝ փոքրեր ու մեծահասակներ, որոնք մասնակցեցան սոյն ձեռնարկին: Հեծելարշաւի սկիզբէն՝ բոլոր մասնակիցները դուրս ելան ճամբայ, փոքր եռագույն դրօշակներ կապած իրենց հեծիկներուն վրայ: Բոլորս այդ ճանապարհորդութիւնը ըրինք: Մենք մէկ կայանին ջուր բաժնեցինք բոլորին: Մասնակցողներու վերադարձին խօսեցաւ քաղաքապետ պրն. Ձուլաքին եւ փոխ-քաղաքապետ տիկն. Քարիօֆիլին:
Ամէն ինչ շատ հաճելի էր:
Վերջաւորութեան նուիրեցինք բոլոր մասնակիցներուն՝ յիշատակի շքանշաններ, շնորհաւորելու համար. նաեւ՝ խմբային նկարուեցանք:
Շատ գեղեցիկ էր ամէն ինչ:
Յոյս ունինք, որ ամէն տարի պիտի կազնակերպուի եւ կատարուի այս միջոցառումը:
Կը սպասենք դարձեալ, 6րդ հեծելարշաւին, բոլորիդ:
Քոյրեր՝ Դիանա Պողոսեան
եւ Մարլէն Տէր-Ղազարեան
