Յունաց ազգային տօնին՝ 28 Հոկտեմբերի առիթով կազմակերպուած աշակերտական տողանցքներուն Նէա Զմիռնիի եւ Նիքէայի մէջ, Հ.Մ.Ը.Մ.ի Աթէնքի եւ Գոքինիոյ մասնաճիւղերու աւելի քան 150 սկաուտներ, իրենց թմբկահարներու տպաւորիչ առաջնորդութեամբ, մասնակցութիւն բերին եւ արժանացան ջերմ ընդունելութեան ու գնահատանքին ժողովուրդին եւ պաշտօնական անձնաւորութիւններուն կողմէ։
Տողանցքէն առաջ, Գոքինիոյ եւ Նէոս Գոզմոսի հայ համայնքներու անունով պաշտօնական արարողութիւններուն ներկայ եղան շրջաններու հոգեւոր հովիւները եւ կառոյցներու ներկայացուցիչներ, որոնք դափնեպսակներ զետեղեցին հայութեան անունով։
Տողանցքներու աւարտին, սկաուտական կազմերը վերադարձան շրջաններու ակումբները, ուր տեղի ունեցաւ դրօշակներու արարողութիւն։
Հոգեւոր հայրերը իրենց գնահատանքի խօսքը ուղեցին սկաուտներուն եւ շնորհաւորեցին անոնց պատուաբեր ներկայութիւնը տողանցքներուն։
Նոյն օրուան կէսօրին, Գոքինիոյ «Զաւարեան» կեդրոնին մէջ, տեղի ունեցաւ խնճոյք-խրախճանք, որ կազմակերպուած էր Գոքինիոյ Հ.Մ.Ը.Մ.ի վարչութեան կողմէ։ Նուագախումբի ճով յայտագրով, խօսքերով եւ վիճակահանութեամբ խնճոյքը ունեցաւ իր ակնկալուած յաջողութիւնը։
Շաբաթ՝ 26 Հոկտեմբերին, Հ.Մ.Ը.Մ.ի Գոքինիոյ մասնաճիւղի վոլէյ պոլի տղոց խումբը եւ վարչութեան անդամները ճամբորդեցին Կրետէի Իրաքլիօ քաղաքը, մրցում ունենալու համար համանուն խումբին հետ։
Մրցումէն առաջ, խումբը այցելեց Իրաքլիոյի հայկական պատմական «Ս. Յովհաննու Կարապետ» եկեղեցին, ուր խանդավառութեամբ դիմաւորուեցին հոգաբարձութեան անդամներուն կողմէ։ Տեղի ունեցաւ նուէրներու փոխանակում, Հ.Մ.Ը.Մ.ի խումբը եկեղեցւոյ նուիրեց միութեան 100ամեակին առթիւ հրատարակուած շքեղ յուշամատեանը։
Յաջորդող մրցումին ներկայ եղան նաեւ Իրաքլիոյի փոքրաթիւ համայնքի անդամներ, որոնք ջերմօրէն քաջալերեցին խումբի խաղարկութիւնը։ Հ.Մ.Ը.Մ.ի խումբը փայլուն յաղթանակ մը տարաւ՝ 3-1 արդիւնքով։
