ՎԻԳԷՆ ՄԻՆԱՍԵԱՆ
13, 20 եւ 21 Յունուարին, Հ.Մ.Ը.Մ.-ի Աթէնքի,Գոքինիոյ եւ Գարէայի սկաուտական մասնաճիւղերը կատարեցին իրենց տարեկան աւանդական գաթայի կտրումը։ Ներկայ էին միութեան Շրջանային վարչութեան, շրջանային խորհուրդի եւ տեղւոյն վարչութիւններու անդամներ։ Գոքինիոյ սկաուտական մասնաճիւղին ներկայ եղաւ նաեւ Սարոնիքոսի շրջանային փոխ խմբապետ եղբ. Նիքոս Գրինոս։ Գաթայի կտրումները կատարեց Պարետ քհնյ. Խաչերեան, որ մաղթեց յաջող եւ առողջ տարի բոլոր ներկաներուն։ Նոյն օրը, Աթէնքի վոհմակի կարգ մը քոյրեր եւ եղբայրներ կատարեցին իրենց խոստումը եւ ստացան եռագոյն փողկապը, իսկ Գոքինիոյ խումբի երկու եղբայրներ ստացան առաջնորդներու երկորեայ արշաւի պէճը։ Նաեւ եղբ. Գրիգոր Մոսկոֆեան ստացաւ խմբապետի աստիճան։ Երկու մասնաճիւղերու գաթայի բախտաւորները ստացան նուէրներ։ Կարգ մը խմբապետներ մասնակցեցան նաեւ Սարոնիքոսի ֆետերասիօնի յունական սկաուտական կողմէ կազմակերպուած գաթայի կտրումին։
***
Շաբաթ 27 եւ Կիրակի 28 Յունուար 2024-ին, Գարէայի «Ազատամարտ» ակումբէն ներս տեղի ունեցաւ միջվոհմակային (գայլիկ-արծուիկներու) գիշերում, ուր մասնակցեցան 30 քոյրեր եւ եղբայրներ։ Իսկ 10 եւ 11 Փետրուարի, նոյն վայրին մէջ, կատարուեցաւ միջխմբային (արի-արենուշներու) գիշերում, որոնք 25 հոգիով մասնակցեցան երեք մասնաճիւղերէն։ Գիշերումներու ընթացքին մասնակցողները ստացան սկաուտական եւ այլ գիտելիքներ։ Աշխուժ, խանդաւար եւ արդիւնաբեր գիշերումներէն ետք, փոքրիկները վերադարձան՝ անհամբեր սպասելով յաջորդ արշաւին։
***
Շաբաթ 27 եւ Կիրակի 28 Յունուարին, Հ.Մ.Ը.Մ.֊ի Շրջանային վարչութեան եւ Շրջանային սկաուտական խորհուրդի անդամներ, ինչպէս նաեւ Շրջանային խմբապետուհին, ներկայ գտնուեցան Թեսաղոնիկէի մէջ յունական սկաուտական ֆետերասիոնին (Σ.Ε.Π.) կողմէ կազմակերպուած հիմնադրութեան 110-ամեակի տարեդարձին եւ աւանդական ամանորեայ գաթայի կտրումին։
***
Շաբաթ 27 Յունուարի, երեկոյեան, Զաւարեան կեդրոնի «Վահան եւ Տիրուհի Տէր Յովսէփեան» մարզադաշտին մէջ, տեղի ունեցաւ, Գոքինիոյ սկաուտական խորհուրդին կողմէ կազմակերպուած նախնական օգնութեան դաստիարակչական դասախօսութիւն, որ ներկայացուց Յունաստանի Կարմիր Խաչի նախնական օգնութեան պատասխանատու Մանոս Աբոսթոլոփուլոս։
***
Չորեքշաբթի 7 Փետրուարին, Զաւարեան կեդրոնի «Վահան եւ Տիրուհի Տէր Յովսէփեան» մարզադաշտին մէջ, Գոքինիոյ սկաուտական մասնաճիւղի խմբապետ եղբ. Վիգէն Մինասեան, պատուոյ յուշատախտակով մը պարգեւատրուեցաւ Հ.Մ.Ը.Մ.-ի Գոգինիոյ մասնաճիւղի վարչութեան կողմէ, առ ի գնահատանք Հ.Մ.Ը.Մ.-ի կեդրոնական Վարչութեան «ԱՐԱՐԱՏԵԱՆ ԿԱՐԳ»-ի արժանացման։ Եղբ. Վիգէն Մինասեան սկսած է նաեւ հետեւի, սկաուտական համաշխարհային բարձրագոյն գիտելիքներու (wood badge) դասնթացքներուն, որոնք պիտի աւարտէ Օգոստոսին։
