Հ.Մ.Ը.Մ.ի սկաուտական 2016-2017 տարեշրջանը իր աւարտին հասաւ ամառնային բանակումի կազմակերպումով, որ տեղի ունեցաւ 1-5 Յուլիս 2017ին, Սունիօ շրջանի սկաուտական բանակավայրէն ներս։
Բանակումին իրենց մասնակցութիւնը բերին 60 քոյրեր եւ եղբայրներ՝ գայլիկներ, արի-արենուշներ եւ աստիճանաւորական կազմ։
Բանակողներու դաստիարակչական շարքը, որ իրագործուեցաւ՝ շարունակութիւնն էր սկաուտներու այս տարեշրջանի դաստիարակչական շարքին, որ ամբողջացաւ այս 5 օրուան ընթացքին։
Խաղերով, երգերով եւ անսահման մանկական երեւակայութեամբ անցան այս հինգ օրերը, որոնք վստահաբար անմոռանալի պիտի մնան քոյրերու եւ եղբարներու մտքին եւ սրտին մէջ, ինչպէս որ բոլորս շատ լաւ գիտենք մեր անձնական փորձառութենէն։
Բանակումի յաջող կազմակերպման եւ իրագործման աշխատանքը կը պարտինք բանակումի կազմակերպիչ յանձնախումբին, ինչպէս նաեւ՝ գայլիկներու եւ սկաուտներու ճիւղերու խմբապետներուն եւ Ֆիքսի ու Գոքինիոյ Սկատուական Խորհուրդներուն, որոնք սիրայօժարօրէն տրամադրուեցան՝ անտեսելով բանակումի դժուար պայմանները ու իրենց կարելին ըրին՝ ի սպաս ամբողջ սկաուտական մեր շարժումի յաջողութեան։
2017-2018 տարեշրջանի Սեպտեմբերին, դարձեալ նոր ուժերով պիտի հանդիպինք, շարունակելու համար մեր գործունէութիւնը։
Բարի հանգիստ եւ բարի ամառ։
Բարձրացիր-բարձրացուր
Հ.Մ.Ը.Մ.ի Շրջանային Սկաուտական Խորհուրդ եւ Խմբապետութիւն
