Հ.Մ.Ը.Մ.ի երիտասարդական Ա. համագումարին առիթով, որ այսօր կը մեկնարկէ Աթէնքի մէջ, Հ.Մ.Ը.Մի Կեդրոնական Վարչութիւնը, Չորեքշաբթի՝ 8 Մայիս 2019ի երեկոյեան, զեկուցական հանդիպում ունեցաւ Հ.Մ.Ը.Մ.ի Յունաստանի Շրջ. Վարչութեան եւ Ատիկէի մասնաճիւղներու վարչութեանց եւ սկաուտական խմբապետական միաւորներուն հետ՝ Ֆիքսի «Ա. Մանուկեան» ակումբին մէջ։
Հանդիպումի բացումը կատարեց Շրջ. Վարչութեան փոխ-ատենապետ եղբ. Հայկազ Տէօքմէճեան, որ բարի գալուստ մաղթեց Կեդր. Վարչութեան անդամներուն եւ մաղթեց, որ երիտասարդական համագումարը ըլլայ այն կարեւոր ազդակը Միութեան յարատեւման եւ նորանոր նուաճումներուն համար՝ Հայաստանի եւ Սփիւռքի տարածքին։
Յաջորդաբար, խօսք առաւ Հ.Մ.Ը.Մ.ի Կեդրոնական Վարչութեան ատենապետ եղբ. Գառնիկ Մկրտիչեան, որ խօսեցաւ Հ.Մ.Ը.Մ.ի առաքելութեան մասին եւ մանրամասն տեղեկութիւններ տուաւ Միութեան կատարած աշխատանքներուն շուրջ, ինչպէս նաեւ անդրադարձաւ երիտասարդական Ա. համագումարին։ Ան յայտնեց, թէ Պատգամաւորական Ընդհ. Ժողովէն առաջ գումարուող սոյն համագումարը, առաւել կենսունակութիւն եւ կազմակերպչական հզօրացում կը միտի յառաջ բերել, յատկապէս երիտասարդ Հ.Մ.Ը.Մ.ականները աւելի կապելով Միութեան նպատակներուն, սատարելով Հայաստանի եւ Սփիւռքի մէջ հայապահպանման փորձերուն, ինչպէս նաեւ Հ.Մ.Ը.Մ.ի 100ամեակէն ետք աշխատանքի նոր թափ ստեղծելու համար միութեան շարքերէն ներս։
Մասնաճիւղներու վարչութիւնները եւ սկաուտական միաւորները իրենց մանրամասն զեկոյցները ներկայացուցին Կեդր. Վարչութեան, նշելով կարեւոր նուաճումները եւ ցարդ կատարուած աշխատանքները։ Առաւել, ներկայացուցին իրենց ապագայ ծրագիրներու բաժինները՝ մարզական, սկաուտական եւ երիտասարդական բնագաւառներէն ներս։ Հանդիպումի աւարտին, Շրջանային Վարչութիւնը յուշատախտակ նուիրեց Գոքինիոյ սկաուտական մասնաճիւղի խմբապետ՝ եղբ. Վիգէն Մինասեանին, որ անցեալ տարի, այլ Հ.Մ.Ը.Մ.ականներու խումբի մը հետ, նուաճեց Արարատ լերան գագաթը։
