Ինչպէս ամէն տարի, Հ.Մ.Ը.Մ.ի Աթէնքի մասնաճիւղը կազմակերպեց աւանդական գաթայի կտրումը, որ տեղի ունեցաւ Երկուշաբթի՝ 28 Յունուարին, Ֆիքսի «Արամ Մանուկեան» ակումբի «Աւետիքեան» սրահէն ներս:
Բերնէ-բերան լեցուն սրահին մէջ ներկայ էին Հ.Մ.Ը.Մ.ի Շրջանային Վարչութիւնը, Հ.Յ.Դ. «Արամ Մանուկեան» Կոմիտէն, Հ. Կ. Խաչի Ֆիքսի «Ռուբինա» մասնաճիւղի վարչութեան ներկայացուցիչներ, Հ.Մ.Ը.Մ.ի շրջանի սկաուտական կազմը, Ծնողական Միութիւնը, մարզիկներ, սկաուտներ, Հ.Մ.Ը.Մ.ական քոյրեր եւ եղբայրներ:
Ելոյթի բացումը կատարեց քոյր Եղիս Ղեւոնդեան, որ բարի գալուստի իր խօսքէն ետք հրաւիրեց ներկաները՝ մէկ վայրկեանի յոտնկայս լռութեամբ յարգելու վաստակաւոր Հ.Մ.Ը.Մ.ական եղբ. Օննիկ Շանկայեանի յիշատակը, որ երկու օր առաջ առյաւէտ բաժնուեցաւ մեզմէ:
Քոյր Ղեւոնդեան իր բացման խօսքին մէջ անդրադարձաւ Հ.Մ.Ը.Մ.ի առաքելութեան ու նպատակին, Հ.Մ.Ը.Մ.ի համաշխարհային կառոյցին ու գործունէութեան եւ իր խօսքը փակեց՝ ըսելով, թէ այսօր 100ամեակի առաւել մէկ տարի թեւակոխած ենք ու այս մէկը կը նշանակէ վերածնունդ, նոր խանդավառութիւն եւ ուժ՝ շարունակելու հայապահպանման ու հայակերտումի աշխատանքը:
Ապա՝ հրաւիրեց Հ.Մ.Ը.Մ.ի Աթէնքի մասնաճիւղի ատենապետ եղբ. Յովիկ Տէր-Յովակիմեանը, որ ի միջի այլոց անդրադարձաւ Հ.Մ.Ը.Մ.ի մասնաճիւղի մարզական ու սկաուտական խումբերուն:
Այսօր Հ.Մ.Ը.Մ.ի Աթէնքի մասնաճիւղը, բացի իր սկաուտական միաւորէն, կը պահէ ոտնագնդակի երէցներու խումբ, կողովագնդակի՝ երէցներու, երիտասարդներու, պատանիներու եւ ակադեմիայի խումբեր, ինչպէս նաեւ լողորդականի եւ վազքի խումբեր:
Եղբ. ատենապետի ներկայացումէն ետք, հրաւիրուեցաւ քոյր Անկելիքի Քերոբեան, որպէսզի փոխանցէ Սկաուտական Խորհուրդի ողջոյնի խօսքը:
Վիտէօ երիզի ներկայացումէն ետք, որուն մէջ կը ցուցադրուէին մասնաճիւղին խումբերը, վերջապէս հասաւ պարգեւատրումներու ժամը:
Այս տարի վարչութեան որոշումով պատուոյ յուշատախտակը յանձնուեցաւ Հ.Մ.Ը.Մ.ի Սկաուտական Խորհուրդին, զոր ստացաւ քոյր Անկելիքի Քերոբեան (յանուն Խորհուրդին) եւ որ յանձնուեցաւ Հ.Մ.Ը.Մ.ի Շրջանային Վարչութեան անդամ քոյր Ակնէս Թոքաթլեանի կողմէ:
Լողորդական մարզիկներու պարգեւատրումէն առաջ խօսքը տրուեցաւ լողորդականի մարզիչ Նիքոլ Վուցինային, ներկայացնելու համար 2018ի լողորդականի մարզական նուաճումները: Յաջորդաբար պարգեւատրուեցան լողորդականի 5 մարզիկներ, որոնք 2018ի ընթացքին լողորդականի զանազան մրցումներուն ստացած էին շքանշաններ: Լողորդներու բաժակները յանձնեց Հ.Մ.Ը.Մ.ական եւ երկու շարունակական տարի «Ju Jitsu»ի աշխարհի ախոյեան եղբ. Արա Ճանիկեան:
Ձեռնարկի վերջաւորութեան հրաւիրուեցաւ շրջանի հոգեւոր հովիւ Նարեկ Քհնյ. Շահինեան՝ օրհնելու համար գաթան, իր կողքին ունենալով եղբ. Կարպիս Ճանիկեանը:
Յաջորդեց հիւրասիրութիւն:
ԹՂԹԱԿԻՑ
