Չորեքշաբթի, 21 Յունիս 2023-ին Ֆիքսի «Արամ Մանուկեան» ակումբի «Աւետիքեան» սրահին մէջ տեղի ունեցաւ Հայ Կապոյտ Խաչի Բացառիկ Պատգամաւորական ժողովը, քննարկելու համար Հայ Օգնութեան Միութեան յառաջիկայ 73-րդ Համահայկական Պատգամաւորական ժողովին օրակարգերը, որ տեղի պիտի ունենայ 16-21 Հոկտեմբեր 2023-ին, Երեւանի մէջ։
Ժողովին մասնակցեցան Հ.Կ.Խաչի 5 մասնաճիւղերէն ընտրուած պատգամաւորները, Շրջանային վարչութեան եւ վարչութիւններու պատգամաւորները, խորհրդակացական ձայնով անդամուհիներ եւ հրաւիրեալներ։
Նաեւ Ժողովին առցանց կապով մասնակցեցաւ եւ իր ողջոյնի խօսքը ուղղեց Հ.Օ.Մ.ի Կեդրոնական վարչութեան կապ անդամը մեր միաւորին հետ՝ ընկերուհի Թալին Մկրտիչեան։
Կարդացուեցաւ Հ.Օ.Մ.ի Կեդրոնական վարչութեան ղրկած քառամեայ ամփոփ տեղեկագիրը, ապա Կ. Վ. ներկայացուցիչ ընկերուհին լուսաբանեց ներկաներու հարցականները։
Տեղեկագիրին մէջ ներկայացուեցան Հ.Օ.Մ.ի խնամատարական, կրթական, բարեսիրական ծրագիրներու արդիւնքները՝ Արցախի 44-օրեայ պատերազմի, ինչպէս նաեւ Սուրիոյ երկրաշարժի ու Լիբանանի նաւահանգիստին մէջ տեղի ունեցած պայթումի, տնտեսական եւ ընկերային տագնապները դիմագրաւելու անմիջական օժանդակութեան ծրագիրները:
Ժողովը բանաձեւեց եւ քուէարկեց իր առաջարկները եւ ընտրեց շրջանիս միաւորի պատգամաւորը, որ պիտի մասնակցի Հ.Օ.Մ.ի 73-րդ Համահայկական Պատգամաւորական Ժողովին:
