Հ.Կ.Խաչի «Սիրոյ Պազար»ը տեղի ունեցաւ Կիրակի, 2 Ապրիլ 2023-ին, առաւօտեան ժամը 11-էն մինչեւ երեկոյեան 5, «Ինթերքոնթինենթըլ» հիւրանոցի «Apհrodite» շքեղ սրահին մէջ
«Սիրոյ Պազարը» կը նկատուի Հայ Կապոյտ Խաչի տարեկան գործունէութեան ամէնէն կարեւոր ձեռնարկներէն մէկը, իր ապահոված հասոյթով, այլ նաեւ՝ իր քարոզչական արդիւնքով, որով միութեան նպատակները, գործելաձեւն ու ծրագիրները լայնօրէն կը ծանօթացուին մեր գաղութի անդամներուն եւ յոյն հասարակութեան:
Միութեան մասնաճիւղերու ընկերուհիները՝ համախմբուած, խանդավառութեամբ եւ բարձր գիտակցութիւնը ունենալով իրենց աշխատանքի անհրաժեշտութեան, իբրեւ մէկ մարմին, գործեցին եւ յաջող աւարտին հասցուցին այս ձեռնարկը:
Մեր հայրենակիցներու, ինչպէս նաեւ մեր յոյն բարեկամներու հոծ բազմութիւն մը ներկայ եղաւ եւ քաջալերեց Հ.Կ.Խաչի Պազարը:
Հ. Կ. Խաչի դիմատետրի ու «Ազատ Օր»ի էջերու ընդմէջէն կատարուած քարոզչութեան շնորհիւ, հայ եւ յոյն բարեկամներ, որոնք ամէն տարի կը սպասեն այս կարեւոր նախաձեռնութեան կազմակերպումը, դարձեալ այցելեցին եւ իրենց ներկայութեամբ, նուիրատուութիւններով ու գնումներով քաջալերեցին Հ.Կ.Խաչի Շրջանային վարչութեան կազմակերպած «Սիրոյ Պազար»ը:
Յատկապէս, Հ.Կ.Խաչի դիմատետրի էջին մէջ Պազարի յայտարարութիւնն ու տարբեր գրառումները լայնածաւալ եւ շարունակական էին: Ներկայացուեցաւ Պազարի բարեսիրական նպատակը, ակումբներու մէջ կամաւոր խաչուհիներու նախապատրաստական աշխատանքները, ճաշատեսակները ու այլ տեղեկութիւններ ընդհանրապէս Պազարին մասին:
Ձեռնարկը իրենց ներկայութեամբ պատուեցին Յունաստանի թեմի Առաջնորդ Գեղամ արք. Խաչերեան, Գերապայծառ Յովսէփ ծ.վրդ. Պէզազեան, Վերապատուելի Վիգէն Չոլաքեան, Հ.Յ.Դ. Կեդրոնական Կոմիտէի եւ Ազգային վարչութեան անդամները, Գոքինիոյ «Ս. Յակոբ» եկեղեցւոյ հոգեւոր հովիւ Պարէտ քհնյ. Խաչերեան, Նէոս Գոզմոսի «Ս. Կարաապետ» եկեղեցւոյ հոգեւոր հովիւ Նարեկ քհնյ. Շահինեան, ինչպէս նաեւ մեր գաղութի մէջ գործող բոլոր միութիւններու վարչականներ ու անդամներ:
Կ’արժէ շեշտել, թէ իրենց ներկայութեամբ եւ գնահատական խօսքերով մեր միութեան ու գաղութին հանդէպ իրենց աջակցութիւնը յայտնեցին երկրի քաղաքական գործիչներ եւ պաշտօնական անձնաւորութիւններ: Պազարը այցելեցին նաեւ Յունաստանի քաղացիական պաշտպանութեան նախարար Թաքիս Թէոտորիքաքոս, հելլէն խորհրդարանի Ա. փոխնախագահ պրն. Նիքիթաս Քաքլամանիս, փոխնախարարներ պրն. Քոսթաս Քացաֆատոս, տիկ. Տոմնա Միխայիլիտու, տիկ. Սոֆիա Վուլթեփսի, Ատիկէի մարզպետ պրն. Եորղոս Փաթուլիս, Աթէնքի քաղաքապետ պրն. Քոսթաս Պաքոեաննիս, Բիրէայի քաղաքապետ պրն. Եաննիս Մորալիս, Նիքէա-Ռենտիի քաղաքապետ պրն. Եորղոս Իոաքիմիտիս, Նէա Զմիռնիի փոխ քաղաքապետներ պրն. Վակելիս Խաչատուրեան եւ տիկ. Քլէրի Տէլիեաննի, մեծ թիւով յոյն երեսփոխաններ՝ պրն. Իոաննիս Մելաս, պրն. Տիմիթրիս Մարքոփուլոս, պրն. Եաննիս Պալաֆաս, պրն. Եաննիս Թրաղաքիս, պրն. Տիմիթրիս Խարիթու, երեսփոխանական թեկնածու՝ տիկ. Ակելիքի Լէվենտի, դերասանուհի տիկ. Խրիսթինա Ալեքսանեան, հայ եւ յոյն ընկերութիւններու նուիրատուներ:
***
Հիւրանոցի ընդարձակ շքեղ սրահին մէջ սեղաններ զետեղուած էին, որոնց վրայ ներկայացուած էին հայկական աւանդական ճաշեր, արեւելեան անուշեղէններ, չոր միրգեր, հայկական գինիներ ու քոնիակներ, հագուստեղէններ, կնոջական զարդեղէններ, վզնոցներ ու մատանիներ, տարբեր գոհարեղէններ, զատկուան մոմեր եւ զարդեր, պայուսակներ, եւ այլն: Հայաստանեան միրքեր, քաղցրեղէն ու շոքոլաներ նաեւ մեր լաւաշ հացը զետեղուած էին ուշագրաւ սեղանի մը վրայ, որպէսզի հայրենիքի համը եւ բոյրը չպակսի մեր պազարէն:
Հայ Կապոյտ Խաչի Շրջանային վարչութիւնը գաղութիս միութիւններուն տրամադրած էր յատուկ սեղաններ, որպէսզի ներկայացնեն իրենց գործունէութիւնն ու ապրանքատեսակը: Այսպէս, Հ.Յ.Դ. Երիտասարդական ու Պատանեկան միութիւններուն յատկացուած էին յատուկ սեղաններ, ուր երիտասարդները գիրքեր, գրիչներ, հրահաններ եւ շապիկներ կը ծախէին ու պատանիները՝ իրենց ձեռային աշխատանքները։ Սեղաններ տրամադրուած էին նաեւ Հ.Կ.Խաչի «Լեւոն եւ Սոֆիա Յակոբեան» վարժարանի Ծնողական միութեան, «Համազգային»ին եւ «Արմենիքա» պարբերաթերթին:
***
Ամէն տարի, այցելուներու ուշադրութիւնը եւ հետաքրքրութիւնը կը գրաւէ յատուկ սրահ մը «սրճարան-ճաշարան»ի բնոյթով, ուր զետեղուած կ’ըլլան խնամքով, ճոխ ճաշատեսակներ եւ անուշեղէններ՝ պատրաստուած Հ.Կ.Խաչի ընկերուհիներուն կողմէ:
Այցելուները առիթը ունեցան առատ եւ համեղ աղանդերները տեղւոյն վրայ համտեսելու, ճաշակելու եւ բարեկամներով ժամանակ անցնելու սեղաններու շուրջ նստելով, գաւաթ մը գինիով ու զուարթ մթնոլորտի մէջ ուրախ ժամեր անցնելու:
***
«Սիրոյ Պազարը» հայկական ճաշերու եւ անուշեղէններու մատուցումէն անդին, այցելու հայ թէ յոյն մեր բարեկամներուն կամաւոր աշխատանքի եւ գործակցութեան արժէքին փաստը կու տայ, միութեան բարեսիրական ու հայակրթական ծրագիրները իրականացնելու անհրաժեշտ հասոյթը ապահովելով:
«Սիրոյ Պազար»ի հսկայական աշխատանքը արդիւնք է Հ. Կ. Խաչի Շրջանային եւ հինգ տեղական մասնաճիւղերու՝ Գոքինիոյ «Սօսէ», Ֆիքսի «Ռուբինա», Գարէա-Կեսարիանիի «Աղթամար», Աթէնքի «Ծովինար» եւ Ֆալիրոյի «Նայիրի» մասնաճիւղերու անդամուհիներուն համախումբ աշխատանքին։
Փորձառու կապոյտխաչեան ընկերուհիները զօրաւոր կամքով ու նուիրուածութեամբ կը կատարեն գործը՝ լաւապէս գիտակցելով, թէ Պազարը իւրայատուկ այն նախաձեռնութիւնն է, որու միջոցաւ պիտի գոյանան անհրաժեշտ գումարները՝ Հ. Կ. Խաչի կրթական, բարեսիրական, խնամատարական աշխատանքներու հոգատարութեան համար։ Այս պատճառով ալ, ճիգ չի խնայուիր, որպէսզի պահպանուի սեղաններուն վրայ հարուստ այլազանութիւնը, ընտիր որակը եւ ընկերային ջերմ մթնոլորտը։
Հարկ է նշել, թէ Պազարի յաջողութեան կը նպաստեն մեր բոլոր անհատներու եւ ընկերութիւններու նուիրատուութիւնները, առանց որոնց ներդրումին, դժուար պիտի ըլլար ամէն այս հսկայական աշխատանքի իրագործումը: Յունական եւ հայկական վաճառական ընկերութիւններ եւ անհատ հայրենակիցներ հովանաւոր դարձան «Սիրոյ Պազար»ին, ընդառաջելով Հ.Կ.Խաչի Շրջանային Վարչութեան դիմումին։ Մեծ թիւով նիւթեր եւ ապրանքատեսակներ սիրայօժար նուիրուեցան անոնց կողմէ:
Կ’արժէ նշել, թէ անոնցմէ շատեր տարիներէ ի վեր միշտ սատար կը կանգնին Հայ Կապոյտ Խաչի աշխատանքներուն։
Առ ի շնորհակալութիւն, պազարի մուտքին զետեղուած էր յատկապէս պատրաստուած պաստառ մը նուիրատուներու անուններով:
***
Հ. Կ. Խաչի Շրջանային Վարչութեան կազմակերպած «Սիրոյ Պազար»ը ամէնէն զօրաւոր արտայայտութիւնն է կամաւոր աշխատանքի ուժին։ Մասնաճիւղերու վարչութիւններու եւ անդամուհիներու երկարաշունչ աշխատանքին, անոնց սիրոյ ու նուիրումի զգացումներուն դրսեւորումն է, որուն արդիւնքը կ՚ըլլայ կեդրոնական այս ձեռնարկը։ Վարձքը կատար բոլոր ընկերուհիներուն, իրենց անսակարկ աշխատանքին ու նուիրումին համար։
Շնորհակալական խօսք
Հ. Կ. Խաչի Շրջանային վարչութիւնը իր խորին շնորհակալութիւնը կը յայտնէ «Սիրոյ Պազար»ին հովանաւոր դարձած անհատներուն եւ հայկական եւ յունական ընկերութիւններուն, որոնք դրամական յատկացում կատարելով, կամ նիւթապէս աջակցելով եւ մեծ թիւով ապրանքատեսակներ նուիրելով՝ մեծապէս սատարեցին մեր ձեռնարկի յաջողութեան:
***
Մեր անկեղծ շնորհակալութիւնները կը յայտնենք Հայ Կապոյտ Խաչի բոլոր ընկերուհիներուն, որոնց աշխատանքով կարելի եղաւ իրագործել այս հսկայ աշխատանքը։
Ամիսներու հետեւողական կամաւոր աշխատանքի եւ նուիրումի արդիւնքն է, որ վայելեցինք բոլորս։
Մեծ շնորհակալութիւն՝ բոլոր հայ եւ յոյն մեր բարեկամներուն, որոնք անգամ մը եւս այցելեցին եւ քաջալերեցին մեր պազարը։
Վարձքը կատար բոլորին։
Հ. Կ. ԽԱՉԻ ՇՐՋԱՆԱՅԻՆ ՎԱՐՉՈՒԹԻՒՆ
