Հինգշաբթի, 11 Մայիս 2023-ին, երեկոյեան ժամը 6-ին, Գոքինիոյ «Զաւարեան» կեդրոնի «Զաքարեան-Սարաճեան» սրահին մէջ, Հ.Կ.Խաչի Շրջանային վարչութիւնը գումարեց միջվարչական ժողով, «Սիրոյ Պազար»ի քննարկման եւ միութեան յառաջիկայ գործունէութեան զեկուցումի օրակարգով:
Շրջանային վարչութիւնը զեկուցեց «Սիրոյ Պազար»ի կազմակերպչական աշխատանքներուն, ձեռնարկի իրագործման եւ արդիւնքի մասին ու ներկայացուց իր գնահատականը: Ապա, ներկայացուեցան Շրջ. վարչութեան եւ մասնաճիւղերու վարչութեանց յառաջիկայ ծրագիրները:
Կարծիքներու արտայայտումէն եւ փոխանակումէն վերջ, Ժողովը եզրակացուց թէ այս տարի Սիրոյ Պազարը արձանագրեց բացառիկ յաջողութիւն ամէն տեսակետէ եւ իր մեծ գոհունակութիւնը յայտնեց։
Շրջանային վարչութիւնը անգամ մը եւս վարձքը կատար ըսաւ այս յաջողութեան սատար հանդիսացող ընկերուհիներուն եւ բոլոր նուիրատուներուն, որոնց հանդէպ շնորհակալական խօսք տեղադրուած էր յատուկ պաստառի վրայ պազարին օրը, նաեւ՝ գրաւոր ուղղարկուած է առանձնաբար։
Շրջանային վարչութիւնը յայտարարեց, թէ ստացած է նաեւ պատկառելի նոր դրամական յատկացում-նուիրատուութիւն մը ի քաջալերանք Պազարին, Նէա Զմիռնիի քաղաքապետութեան կողմէ։
Այս առիթով Հայ Կապոյտ Խաչի երախտագիտութիւնը կը յայտնենք Նէա Զմիռնիի քաղաքապետութեան։
Յայտարարուեցաւ նաեւ, թէ միութեան 83-րդ Բացառիկ Պատգամաւորական ժողովը տեղի պիտի ունենայ Չորեքշաբթի, 21 Յունիսին, ընտրելու համար պատգամաւորներ, որոնք պիտի մասնակցին Հ.Օ.Մ.ի 73-րդ Համահայկական Պատգամաւորական ժողովին, որ տեղի պիտի ունենայ 16-21 Հոկտեմբեր 2023-ին, Հայաստանի մէջ:
Ժողովի աւարտին, Շրջանային վարչութիւնը պատրաստած էր հիւրասիրութիւն-ճաշկերոյթ մը, պազարի աշխատանքներուն մասնակցող բոլոր ընկերուհիներուն համար:
Երեկոն ընթացաւ հաճելի ընկերային մթնոլորտի մէջ, կենացներու ու մաղթանքներու փոխանակումով:
Թղթակից
