Հայոց ցեղասպանութեան 109-ամեակի ոգեկոչման ձեռնարկներու ծիրէն ներս
Հ.Կ.Խաչի արիւնատուութեան արշաւը իր աւարտին հասաւ
Հայոց ցեղասպանութեան 109-ամեակի ոգեկոչման ձեռնարկներու ծիրէն ներս Հ.Կ.Խաչի արիւնատուութեան Բ. փուլը տեղի ունեցաւ երէկ, Կիրակի, 7 Ապրիլ 2024-ին, առաւօտեան ժամը 10:00-էն մինչեւ կէսօրուան ժամը 14:00, Գոքինիոյ «Զաւարեան» կեդրոնէն ներս։
Մեր հայրենակիցները ներկայ եղան «Զաւարեան» կեդրոն, ուր Հ.Կ.Խաչի ընկերուհիները եւ արիւնատուութեան բժշկական խումբը սիրով ընդունեցին անոնց:
Կարելի եղաւ 29 հոգիէ արիւն ստանալ: Ստացուած արեան քանակը տրամադրուեցաւ «Էվանկելիզմոս» հիւանդանոցի համակարգի՝ Հայ Կապոյտ Խաչի անունին պահք դրուած արեան պահեստանոցին։
Այս տարի եւս յաջողութեամբ աւարտեցաւ Հ.Կ.Խաչի Շրջանային վարչութեան կազմակերպած արիւնատուութեան մարդասիրական արշաւը: Միութեան արիւնի պահեստանոցը հարստացաւ յաւելեալ արիւնով, որ կը տրամադրուի կարիքաւոր մեր հայրենակիցներուն, առանց ուշացումի: Հ.Կ.Խաչի խիստ կարեւոր այս նախաձեռնութիւնը օգնութեան ձեռք կ’երկարէ մեր հայրենակիցներուն, որոնք առողջապահական պատճառներով արեան կարիքը կ‘ունենան:
