20 տարի կազմակերպական բարձր կորով
20 տարի խաչուհիներու կամաւոր անխոնջ աշխատանք
Յունաստանի Հայ Կապոյտ Խաչը 93 տարի հաշուող իր բեղուն ճանապարհի ընթացքին, բազմածիր իր գործունէութիւնը ընդլայնած եւ միշտ հարստացուցած է տարբեր տեսակի նախաձեռնութիւններով։
20 տարիներ առաջ, մեծ ոստում մը արձանագրուեցաւ, երբ միութեան գաղութային ծանր պարտաւորութիւնները եւ Հ.Օ.Մ.ի համահայկական ծրագիրները յաւելեալ նիւթական եւ պիւտճէական պարտականութիւններ աւելցուցին Հայ Կապոյտ Խաչին վրայ։ Այդ ժամանակ էր, որ հսկայական յանձնառութիւն մը ստանձնեցին Հ. Կ. Խաչի Շրջանային Վարչութիւնն ու տարբեր շրջաններու հինգ մասնաճիւղերը, ծրագրելով, կազմակերպելով եւ մեծագոյն յաջողութեամբ իրականացնելով Հայ Կապոյտ Խաչի «Սիրոյ Պազարը»։ Այս տարի դարձեալ «Սիրոյ պազար»ը կը վայելէր Հայաստանի առաջին տիկին Ռիթա Սարգսեանի հովանաւորութիւնը։
20 տարի արդէն անցած է սկզբնական այդ Պազարէն, եւ անցնող տարիներու ընթացքին, Զափիոյի Էղլի սրահը, ինչպէս եւ Զափիոն եւ Ինթերքոնթինենթալ պանդոկը եղած են հայ եւ յոյն ժողովուրդի սիրուած ժամադրավայրերը, ամէն տարուայ Զատիկի նախորդած շրջանին։
«Սիրոյ Պազարը» կենսունակութեան, հայկական մշակոյթի եւ հայկական աւանդութիւններու գեղեցիկ ձեռնարկ մըն է։ Բազմակողմանի այս կազմակերպումը, միայն հայկական ճաշերու եւ անուշեղէններու պազար մը չէ, այլ շատ աւելին կը մատուցէ կամաւոր խաչուհիներուն եւ այցելու հայ թէ յոյն մեր բարեկամներուն։ «Սիրոյ Պազարը» Հայ Կապոյտ Խաչի տարեկան գործունէութեան գագաթնակէտը կը կազմէ, իր նախապատրաստական շրջանի երկար տեւողութեամբ, ցուցադրուած ապրանքներու քանակութեամբ եւ որակով ու գոյացած եկամուտով։
Այս տարուան «Սիրոյ Պազար»ը կազմակերպուեցաւ Ինթերքոնթինենթալ պանդոկի Աֆրոտիթի ընդարձակ սրահին մէջ, Կիրակի՝ 2 Ապրիլ 2017ին, առտուան ժամը 11էն մինչեւ ժամը 5։ Մեծ յաջողութեամբ պսակուած փայլուն ձեռնարկ մըն էր, ուր ներկայ եղան Հ. Կ. Խաչի բարեկամները եւ իրենց մասնակցութեամբ ջերմացուցին պազարի սրահը, իրենց գործնական աջակցութիւնը յայտնելով միութեան աշխատանքներուն ու ծրագիրներուն։
Շուրջ երկու ամսուան եռուզեռը իր աւարտին հասաւ «Սիրոյ Պազար»ի յաջող կազմակերպումով։ Սիրով եւ բարձր ճաշակով զարդարուած սրահի պատրաստութիւնը սիրայօժարօրէն ստանձնած էր արհեստավարժ ձեւաւորող պրն. Մարտիկ Մանիկեան, որ գեղարուեստական ըմբռնումով ամբողջացուցած էր սրահի ձեւաւորումը։ Փոքրիկ տաղաւարներուն տակ ճոխ սեղաններ զետեղուած էին, որոնց վրայ ներկայացուած էր ընտիր ապրանքատեսակը։
Հայկական գինիներ ու քոնիակներ, չոր միրգեր, հայկական համեղ ճաշեր, անուշեղէններ, զարդեր, տնային իրեր, փոքրերու եւ մեծահասակներու հագուստեղէններ, կնոջական վզնոցներ ու մատանիներ, տարբեր գոհարեղէններ, եւայլն:
Հ.Օ.Մ.ի ու Հայ Կապոյտ Խաչի աշխատանքները մեծապէս գնահատելով՝ պազարին ներկայ գտնուեցաւ Յունաստանի մօտ Հ.Հ. դեսպան պրն. Ֆադէյ Չարչօղլեան եւ իր տիկինը, Յունաստանի Հ.Հ. հիւպատոս տիկ. Աննա Խաչատրեան, ինչպէս նաեւ պրն. դեսպանի եւ Հայ Կապոյտ Խաչի հրաւէրին ընդառաջած՝ Աթէնքի մէջ պաշտօնավարող օտար դեսպաններու տիկիններ, որոնք մեծ գոհունակութեամբ շրջեցան եւ գնումներ կատարեցին Պազարէն։
«Պազարի» յաջողութեան սատարելով՝ ներկայ գտնուեցան նաեւ Կաթողիկոսական Փոխանորդ Կոմիտաս Արք. Օհանեան, Աթէնքի եւ Գոքինիոյ հոգեւոր հայրերը, Վերապատուելի Վիգէն Չոլաքեան, Յունահայոց Ազգային Վարչութեան, Հ.Յ.Դ. Կեդրոնական Կոմիտէի ներկայացուցիչներ, մեր գաղութի միութիւններու վարչականներ ու անդամներ:
Մեծ խանդավառութիւն ստեղծեց բոլորին մօտ Թեսաղոնիկէէն ժամանած՝ Մակեդոնիոյ եւ Թրակիոյ Հայ Գթութեան Խաչի ընկերուհիներու պատուիրակութեան ներկայութիւնը, որոնք ընդառաջելով Հայ Կապոյտ Խաչի Շրջանային Վարչութեան հրաւէրին, ոչ միայն ֆիզիքական իրենց ներկայութեամբ, այլ նաեւ անուշեղէններու վաճառքով ու նուէրներով, գործնական մասնակցութիւն բերին Պազարին։
Սեղան մը յատկացուած էր Հ.Յ.Դ. Երիտասարդական Միութեան, ուր երիտասարդները գիրքեր, ձայնասկաւառակներ եւ շապիկներ կը ծախէին։
Իսկ շատ մեծ թիւով ապրանքատեսակներ նուիրուած էին պազարի հովանաւոր դարձած յունական ընկերութիւններու կողմէ, որոնք սիրայօժար ընդառաջեցին Հ. Կ. Խաչի Շրջանային Վարչութեան դիմումին։ Նոյնպէս նուէրներ կային մեր վաճառական հայրենակիցներուն կողմէ, որոնք միշտ սատար կը կանգնին Հայ Կապոյտ Խաչի աշխատանքներուն։
Քարոզչական լայն աշխատանք
Ինչպէս ծանօթ է, յոյն այցելուներու մեծ թիւ մը հաւատարիմ սիրահարը դարձած է հայկական այս ձեռնարկին եւ ամէն տարի ներկայ կը գտնուի «Սիրոյ Պազարին»։
Ընդհանրապէս, այս զանգուածի ներկայութիւնը կարելի եղած է յաջողցնել թէ՛ անձնական հրաւէրներու եւ բարեկամութիւններու շնորհիւ, բայց նա՛եւ յունական թերթերու եւ համացանցին ընդմէջէն կատարուած քարոզչութեան շնորհիւ:
Հակառակ Շրջանային Վարչութեան հետեւողական ճիգերուն եւ հեռատեսիլային յայտագիրներու մօտ տարուած ճնշումներուն, այս տարի կարելի չեղաւ ելոյթ ապահովել հեռատեսիլի կայաններէն, MEGA կայանի փակման պատճառով, ուր երկար տարիներ այդ յայտագրի արտադրող Տիգրան Յովակիմեան միշտ ալ կը դասաւորէր Հ. Կ. Խաչի ընկերուհիներու ելոյթները, որոնց պատրաստած ճաշատեսակները թափ կուտային Պազարի քարոզչական աշխատանքին։
Այսուհանդերձ, ժողովուրդի մասնակցութիւնը բաւարարեց բոլորի ակնկալութիւնները։
Քարոզչութիւնը եղաւ նաեւ «Ազատ Օր»ի կայքէջի եւ թերթի միջոցաւ, որմազդներու տպագրութեամբ եւ վարժարաններուն մէջ աշակերտներուն թռուցիկներու ցրւումով։
Լայն ձեւով օգտագործուեցան յատկապէս «Ֆէյսպուք»ի հնարաւորութիւնները:
20ամեայ յաջող արդիւնքներու նախադրեալները
Ծանօթ է բոլորին, թէ «Սիրոյ Պազար»ի հսկայական աշխատանքը արդիւնք է Հ. Կ. Խաչի Շրջանային եւ հինգ տեղական մասնաճիւղերու՝ Գոքինիոյ «Սօսէ», Ֆիքսի «Ռուբինա», Գարէայի «Աղթամար», Աթէնքի «Ծովինար» եւ Ֆալիրոյի «Նայիրի» մասնաճիւղերու անդամուհիներուն համախումբ աշխատանքին։
Տարուէ տարի նոր անդամուհիներ եւ երիտասարդ ուժեր կուգան միանալու փորձառու Կապոյտ Խաչեան ընկերուհիներուն եւ նոյն հաւատքով, նոյն զօրաւոր կամքով ու նուիրուածութեամբ կը կատարեն գործը՝ լաւապէս գիտակցելով, թէ պազարը իւրայատուկ այն նախաձեռնութիւնն է, որու միջոցաւ պիտի գոյանան անհրաժեշտ գումարները՝ Հ. Կ. Խաչի կրթական-բարեսիրական-խնամատարական աշխատանքներու հոգատարութեան համար։ Այս պատճառով ալ, ճիգ չի խնայուիր, որպէսզի պահպանուի սեղաններուն վրայ հարուստ այլազանութիւնը, ընտիր որակը եւ ընկերային ջերմ մթնոլորտը։
«Պազարի» յաջողութեան կը նպաստէ քովի սրահին մէջ գործող յատուկ վայրը, ուր այցելուներուն հիւթ, գինի եւ աղանդերներ կը հրամցուին, պատրաստուած Հ. Կ. Խաչեան ընկերուհիներուն կողմէ:
Համեղ ու խնամուած, ճոխ պնակները արագօրէն կը սպառին միշտ, սեղաններուն շուրջ բոլորուած ժողովուրդին կողմէ, որոնք զուարթ ու բարեկամական մթնոլորտի մէջ կը վայելեն գեղեցիկ պահը։
Չափազանցութիւն չըլլար եթէ ըսենք, թէ Հ. Կ. Խաչի Շրջանային Վարչութեան կազմակերպած «Սիրոյ Պազար»ը ամէնէն զօրաւոր արտայայտութիւնն է կամաւոր աշխատանքի ուժին։ Մասնաճիւղերու վարչութիւններու եւ անդամուհիներու երկարաշունչ աշխատանքին, անոնց սիրոյ ու նուիրումի զգացումներուն դրսեւորումն է, որուն արդիւնքը կ’ըլլայ կեդրոնական այս ձեռնարկը։
Անկախ թէ ո՛ր ձեւը կ’ընտրէ ամէն մէկը իր ծառայութիւնը մատուցելու համար, անդամուհիներու փոխազդեցութիւնը եւ անոնց կառուցողական համագործակցութիւնը հոգեկան զօրաւոր բաւարարութիւն կը ստեղծեն եւ կը միախմբեն բոլորը միութեան շուրջ։
Կապոյտ Խաչեան ընկերուհի ըլլալը կեանքի ձեւ մըն է, որ յոյս ու լաւատեսութիւն կը ներշնչէ մեր գաղութային կեանքին մէջ։
Վարձքը կատար բոլոր ընկերուհիներուն, իրենց անսակարկ աշխատանքին ու մատուցման համար։ Յաւելեալ նկարներու համար դիտել Հ. Կ. Խաչի Դիմատետրի էջը՝ Armenian Blue Cross Greece: Հ.Կ.Խաչի Շրջանային Վարչութիւնը իր անհուն շնորհակալութիւնը կը յայտնէ բոլոր նուիրատուներուն որոնք սիրայօժարօրէն սատարեցին պազարի նպատակի յաջողութեան:
Մեր վաղուան թիւով լոյս կ’ընծայենք նուիրատուներուն լրիւ ցանկը:
