Կիրակի՝ 18 Մարտ 2018ի առաւօտեան Ս. եւ Անմահ Պատարագէն անմիջապէս ետք, Թեսաղոնիկէի ազգապատկան «Տէր-Զաքարեան» սրահէն ներս պաշտօնապէս տեղի ունեցաւ Հ.Գ.Խ.ի Մակեդոնիոյ եւ Թրակիոյ Շրջանի Պատգամաւորական 46րդ Ժողովը, ներկայութեամբ՝ Մակեդոնիոյ եւ Թրակիոյ մէջ գտնուող մասնաճիւղներու պատգամաւորներուն, ինչպէս նաեւ շրջանէն ներս գործող միութիւններու, հաստատութիւններու եւ կառոյցներու ներկայացուցիչներու։
Ժողովը բացուեցաւ Թեսաղոնիկէի «Մալաքեան-Գասպարեան» Ծաղկոց Շաբաթօրեայի աւարտական դասարանի կատարած Հ.Օ.Մ.ի քայլերգով եւ Շրջանային Վարչութեան ատենապետուհի՝ ընկերուհի Նուէր Տէրէյեանի բարի գալստեան ողջոյնի խօսքով։ Ընտրուեցաւ առժամեայ, ապա եւ մնայուն Դիւան՝ ընկերուհի Զապէլ Այվազեան՝ նախագահ եւ ընկերուհի Իրեն Յովհաննէսեան՝ քարտուղար։
Կատարուեցաւ լիազօրագիրներու ստուգում։ Իրաւասու ձայնով Ժողովին կը մասնակցէին 19 պատգամաւոր։ Բանաւոր բացատրութեամբ, բացակայ էին Տիտմոթիխօ-Օրէսթիատայի «Նայիրի» մասնաճիւղին պատգամաւորները։
Բանաձեւի յանձնախումբ ընտրուեցան՝ Ստեփանոս Վրդ. Փաշայեան եւ ընկերուհի Ռուզաննա Զօհրապեան։
Օրակարգի յաջորդ կէտին համաձայն արտասանուեցան ողջոյնի խօսքեր՝ Յունաստանի հայոց թեմի առաջնորդ Գեղամ Արք. Խաչերեանի ողջոյնի խօսքը, զոր ընթերցեց շրջանի Հոգեւոր Հովիւը, Ազգային Վարչութեան կողմէ ողջոյնի խօսքը փոխանցեց՝ տիկ. Վերա Պլէճեան, Հ.Յ.Դ. Կեդրոնական Կոմիտէի կողմէ ողջոյնի խօսքը փոխանցեց ընկերուհի Ատրինէ Ստեփանեան, Թեսաղոնիկէի «Ս. Աստուածածին» եկեղեցւոյ Թաղական Խորհուրդի կողմէ ողջոյնի խօսքով հանդէս եկաւ ատենապետ պրն. Արթին Աբրահամեան եւ «Մալաքեան-Գասպարեան» Ծաղկոցի կազմի կողմէ ողջոյնի խօսքը փոխանցեց՝ տնօրէնուհի ընկերուհի Զապէլ Գալֆայեան։ Դիւանի կողմէ ընթերցուեցան բարի յաջողութեան մաղթանքներով նամակներ՝ Հ.Օ.Մ.ի Կեդրոնական Վարչութեան, Հայ Կապոյտ Խաչի, Թեսաղոնիկէի Հ.Մ.Ը.Մ.ի եւ Թրակիոյ Հոգեւոր Հովիւին կողմէ։
Ողջոյնի խօսքերէն ետք, ընթերցուեցաւ Հ.Գ.Խ.ի շրջանաւարտ Շրջանային Վարչութեան երկամեայ գործունէութեան տեղեկագիրը՝ ընկերուհիներ Մարգրիտ Գոստիկեանի եւ Իրեն Յովհաննէսեանի կողմէ, իսկ նիւթական տեղեկագիրը ամենայն մանրամասնութեամբ ներկայացուց գանձապահուհի ընկերուհի Մանիշակ Մարտիկեան։ Ժողովը անցաւ շրջանաւարտ Շրջանային Վարչութեան գործունէութեան վերաբերեալ լուսաբանական հարցումներուն եւ քննարկումին։ Ժողովականներու կողմէ դրական գնահատուեցաւ վարչութեան գործունէութիւնը, եղան տարբեր առաջարկներ եւ տրուեցան լուսաբանութիւններ։ Հաշուեքննիչ յանձնախումբին կողմէ տրուեցաւ գնահատանք՝ կատարուած հաշուական աշխատանքներուն կապակցութեամբ։
Ժողովս յառաջացաւ առաջարկներու ընթերցումին եւ քննարկումին՝ կազմակերպչական, խնամատարական, գրաւոր եւ բանաւոր քարոզչութիւն, յարաբերական, հայակրթութիւն, տնտեսական եւ չնախատեսուած հարցերու շուրջ։
Այնուհետեւ Ժողովը կէսօրուան ճաշի դադար առաւ։
Դադարէն ետք, Ժողովս անցաւ իր օրակարգի երկրորդ մասին։ Ժողովականներուն ներկայացաւ վարչութեան իրաւաբան տիկ. Սոֆիա Սաուրիտուն, որ ներկայացուց «Մալաքեան-Գասպարեան» կալուածին եւ անոր տնօրինման մանրամասնութիւնները։
Ժողովին իր զեկոյցով հանդէս եկաւ նաեւ Ամարանոցի Յանձնախումբի անդամ ընկեր Տիգրան Պլէճեան, որ մանրամասնութեամբ եւ հանգամանօրէն ներկայացուց Ամարանոցին հետ կապուած զանազան մանրամասնութիւններ եւ այն աշխատանքները, որ արդէն իսկ կատարուած են եւ պիտի շարունակուին յառաջիկային եւս կատարուիլ։ Եղան նաեւ բազմաթիւ տարբեր առաջարկներ։ Կատարուեցաւ տնտեսական ծրագրում եւ նախահաշիւ, զոր ամենայն բծախընդրութեամբ ներկայացուց գանձապահուհին։ Առաջարկուեցաւ եւ վաւերացուեցաւ, որ նորընտիր վարչութիւնը իր կարելիութեան սահմաններուն մէջ աւելիով նիւթական օժանդակութիւն բերէ Ամարանոցի վերաբացման յոյժ կարեւոր խնդիրին։
Ձայն առաւ ընկերուհի Մաննիկ Աշըրեան եւ իր հրաժեշտի (վարչական անդամի պաշտօնէն) խօսքը յղեց ժողովականներուն։ Ընկերուհին իր յուզական, գեղեցիկ եւ բազմամեայ փորձառութեամբ՝ իր խորունկ խօսքով, որ կարծէք պատգամ ըլլար բոլորին, իր շնորհակալութիւնը յայտնեց եւ նորընտիր Շրջանային Վարչութեան մաղթեց ամենայն յաջողութիւն սոյն դժուար առաքելութեան մէջ։
Ժողովը քուէախոյզ յանձնախումբ ընտրեց ընկերուհիներ Մարալ Խաչերեան, Էլլատա Մանասեան եւ ընկեր Յովիկ Գասապեան։ Գոց քուէարկութեամբ ընտրուեցան հետեւեալ անդամները.-
Ընկերուհի Կիւլա Գասապեան
Ընկերուհի Զապէլ Գալֆայեան
Ընկերուհի Նեկտար Պլէճեան
Ընկերուհի Կիւլա Պէքթաշեան
Ընկերուհի Աննա Խասապի
Ընկերուհի Գարմէն Վահեւնունի
Ընկերուհի Մարիա Գունտաքճեան
Ընկերուհի Վալենթին Մաթէոսեան
Ընկերուհի Հերմինէ Գույումճեան
Ընտրուեցաւ հաշուեքննիչ յանձնախումբ՝ ընկերներ Խաչիկ Փափազեան, Տիգրան Պլէճեան եւ Կարօ Նատեան։
Կատարուեցաւ բանաձեւերու ընթերցում եւ վաւերացում Ժողովին կողմէ։ Բանաձեւի Յանձնախումբը բարձր գնահատեց շրջանաւարտ վարչութեան գործունէութիւնը եւ բանաձեւեց տրուած առաջարկները, որոնք վաւերացուեցան Ժողովին կողմէ։
Այնուհետեւ կատարուեցաւ Ժողովի ատենագրութեան ընթերցում եւ վաւերացում։
Հ.Գ.Խ.ի Մակեդոնիոյ եւ Թրակիոյ շրջանի 46րդ Պատգամաւորական Ժողովը փակուեցաւ Հ.Օ.Մ.ի քայլերգով եւ խմբային ու յիշատակի լուսանկարով։
Թղթակից
Ընկերուհի Մաննիկ Աշըրեանի խօսքը
(Արտասանուած՝ Հ.Գ.Խ.Ի Մակեդոնիոյ եւ Թրակիոյ շրջանի
Պատգամաւորական 46րդ Ժողովին)
Սիրելի՛ Ընկերուհիներ,
Նկատի առնելով, թէ այսօր կ’աւարտի նստաշրջանս, որ բնական է վերջինը կ’ըլլայ վարչականի պաշտօնով տարիքի բերմամբ, թոյլ տուէք որ հրաժեշտի պատգամ մը ուղղեմ բոլորիդ, քաղուած 52 տարուան խաչուհիի եւ 38 տարուան վարչականի փորձառութենէս, այն յոյսով, թէ կրնայ օգտակար հանդիսանալ մեր շրջանի ապագայ գործունէութեան։
Նախ՝ պիտի ուզէի շնորհաւորել Ձեզ, որ ընտրած էք Ձեր ազատ կամքով Հ.Օ.Մ.ի նուիրեալներու օրհնեալ բանակին ծառայութեան ուղին։
Վստահ եմ, թէ ամէնքս անկեղծօրէն կը փափաքինք լաւագոյնը բոլորէն սիրուած ու յարգուած մեր մեծ կազմակերպութեան համար։
Հ.Օ.Մ.ը Ազգին սիրտն է, Հ.Օ.Մ.ը Ազգին գուրգուրոտ մայրն է, որ ո՛չ միայն իր զաւակներուն ֆիզիքական կարիքները կը հոգայ 108 երկար տարիներէ ի վեր, այլ՝ իբր գիտակից եւ հեռատես մայր, սփիւռքի տարածքին բարեսիրականի կողքին ունի իր լուրջ ներդրումը հայապահպանման սրբազան գործին մէջ։
Ուստի՝ գիտակցելով Հ.Օ.Մ.ի մեծութեան եւ խաչուհի ըլլալու պատիւին, կը պարտինք ընտրել ծառայութեան ուղիղ ճանապարհ։
Նախ մենք՝ մեծերս, պէտք է մի՛շտ նոր սերունդի կողքին գտնուինք եւ օգնենք մեր փորձառութեամբ, որպէսզի անոնք արդի միջոցները օգտագործելով կառուցեն ներկան եւ իւրացնեն ապագայի տեսլականը։ Քաջալերենք զիրենք։
Երիտասարդներն ալ սակայն, կարեւոր է որ չանտեսեն անցեալի վաստակը, որովհետեւ առանց նախորդ սերունդներու նուիրումին, այսօր Հ.Օ.Մ. գոյութիւն չէր ունենար։
Ֆրանսական ասացուածք մը կ’ըսէ.- «Եթէ երիտասարդները գիտնային, եթէ տարիքոտները կարենային…»։
Մեր փափաքն ու երազը, ուրեմն, որ Հ.Օ.Մ.ը շարունակէ գրել պատուաբեր պատմութիւն, կրնայ իրականութիւն դառնալ, միայն եթէ երիտասարդական խանդը հանդիպի վաստակաւորի փորձառութեան։
Աշխարհ մեզմով չի վերջանար, ո՛չ ալ նորերով կը սկսի։
Հետեւաբար, արդիւնաւէտ գործունէութեան համար, անհրաժեշտ է անշուշտ զոհողութեան ոգի, բայց նաեւ համերաշխ գործակցութեան մթնոլորտ։
Խաչուհիներս քաջ գիտենք, թէ կամաւոր ծառայութիւնը կը պահանջէ զոհողութիւն՝ ժամանակի, հանգիստի, հաճոյքի։ Բայց ո՛չ միայն։ Տարբեր նկարագիրներ, տարբեր մտայնութիւններ կամ մօտեցումներ ու կարծիքներ մի՛շտ գոյութիւն ունին եւ կրնան շատ շինիչ դառնալ։ Կրնան սակայն, նաեւ խանգարել գործակցութիւնը, եթէ անիմաստ տարակարծութիւններու զոհ դարձնենք մեր վսեմ առաքելութիւնը եւ չունենանք հասունութիւնը, խոհեմ ու պաղարիւն կեցուածքով, ազգայինը միշտ գերադասելու անձնականէն։
Բոլորս գիտենք, թէ այդքան ալ դիւրին չէ։ Բայց քանի որ Հ.Օ.Մ.ի կամաւոր ուխտեալներու բանակին կը պատկանինք, Ազգի անցեալին, ներկային ու ապագային սիրոյն, անհրաժեշտ է, որ անձնասիրութեան կամ «ըսի-ըսաւ»ի զոհ չդարձնենք մեր գործը, ո՛չ ալ յուսահատելով լքենք։ Բնական է, մարդ ենք, երբեմն կը վիրաւորուինք, անիրաւուած կը զգանք, կը զայրանանք։
Կը պարտինք սակայն, հանդարտելէ ետք, անդրադառնալ, թէ մենք անձերու չենք ծառայեր, այլ՝ Հ.Օ.Մ.ին, որուն նպատակները շատ վեր են մեր մարդկային տկարութիւններէն։ Հ.Օ.Մ.ը պէտք չէ տեսնենք մեր մասնաճիւղի նեղ սահմաններուն մէջ, ո՛չ իսկ շրջանի կամ յունահայութեան ծիրէն ներս, այլ՝ ունենանք ամբողջական համահայկական պատկերացում, որպէսզի մեր մէջ արմատանայ Հ.Օ.Մ.ի հոյակապութիւնը, որուն առջեւ կ’անհետանան բոլոր ջնջին խնդիրները։
Եզրափակելով՝ կը հաւատամ, թէ բոլորս կրնանք շարունակել մեր գործունէութիւնը խաչուհիի վայել գիտակցութեամբ։
Շնորհակալութիւն Շրջանային Վարչութեան եւ մասնաճիւղիս ընկերուհիներուն, երկարամեայ ներդաշնակ գործակցութեան համար։ Իսկ նորընտիր Շրջանային Վարչութեան՝ ի սրտէ կը մաղթեմ բարի յաջողութիւն եւ նորանոր նուաճումներ։
Ընկերուհի Նուէր Տէրէյեանի ողջոյնի խօսքը
(Արտասանուած՝ Հ.Գ.Խ.Ի Մակեդոնիոյ եւ Թրակիոյ շրջանի
Պատգամաւորական 46րդ Ժողովին)
Սիրելի՛ ընկերուհիներ եւ ընկերներ,
Խոր յուզումով եւ անհուն ուրախութեան զգացումներով՝ բարի գալուստ կը մաղթեմ ձեզ բոլորիդ, Հ.Գ.Խաչի Մակեդոնիոյ եւ Թրակիոյ շրջանի Պատգամաւորական 46րդ Ժողովին։
Յոյսով ենք, որ այս Ժողովը նոր շունչ եւ աշխատելաձեւ պիտի տայ հին փորձառութիւններու կողքին, որպէսզի աւելիով յառաջանայ միութեան գործունէութիւնը։
Հ.Օ.Մ. ունի այն յատկութիւնը՝ երեք սերունդի կիներ միացնելու, որպէսզի ծառայեն այս կազմակերպութեան շարքերուն մէջ եւ սպասարկեն մեր ժողովուրդի մարդասիրական կարիքները, ըլլա՛յ սփիւռքի մէջ, թէ հայրենիքի տարածքին։
Հ.Օ.Մ. այն միութիւնն է, որ իր զաւակները նուիրաբերած է հայ ազգային պայքարին՝ գիտակցելով, որ հաւաքականութեան գոյատեւումը կը պահանջէ յարատեւութիւն, կամք եւ պայքար։
Սիրելի՛ ընկերուհիներ եւ ընկերներ, ամէն երկու տարին անգամ մը գումարուող այս Ժողովը ո՛չ միայն առիթը կ’ընծայէ մեզի ներկայացնելու մեր աշխատանքը, հաշուեյարդար ընելու, այլ նաեւ՝ կը ստեղծէ նոր թիրախներ եւ նոր գործելակերպ կը ճշդէ։
Պատգամաւորական Ժողովը նստաշրջան մը կը փակէ, բայց միաժամանակ՝ նոր էջ մը կը բանայ Հ.Օ.Մ.ի անթառամ պատմութեան մէջ։ Նոր էջ մը, օժտուած՝ նոր եռանդով, նոր կամքով ու նուիրական նոր ոգիով։
Գրեթէ երկու տարիներ առաջ, 2016ի Մարտին եւ այժմ շրջանաւարտ Շրջանային Վարչութիւնը արժանացաւ պատգամաւորներու քուէին եւ սրբազան պարտականութիւնը ստանձնեց՝ շարունակելու Հ.Օ.Մ.ի առաքելութիւնը մեր շրջանէն ներս։
Մեր նստաշրջանի առաջին իսկ օրէն յայտնեցինք մեր կամքը, ոչ մէկ ճիգ խնայելու ի սպաս մեր ժողովուրդին, ինչպէս նաեւ մեր դրօշը բարձրացնելու շինարար եւ ազգօգուտ աշխատանքով։
Կը փափաքինք վստահեցնել ձեզի, թէ մեր երթի ընթացքին հանդիպեցանք բազում դժուարութիւններու, հակազդեցութիւններու եւ երբեմն գտնուեցանք անել վիճակի դիմաց։
Յատուկ հպարտութեամբ կը յայտնենք, թէ մեր նստաշրջանի ընթացքին շարունակեցինք մեր բոլոր ոյժերով քաջալերել «Մալաքեան-Գասպարեան» Ծաղկոցը, մեր ներկայութեամբ ամէն շաբաթ եւ մասնակցելով դպրոցի ու մանկական պարախումբի բոլոր ձեռնարկներուն։ Նաեւ Ամարանոցի վերաբացման գծով շարունակեցինք աշխատիլ անդադար, մինչեւ օրս, միշտ լաւատես ըլլալով, որ հեռու չէ այն օրը, երբ Եռագոյնը, ինչպէս նաեւ Հ.Օ.Մ.ի մեր դրօշը, դարձեա՛լ պիտի ծածանի Ամարանոցի հողին վրայ եւ հայորդիներու ուրախ ձայները կեանք պիտի տան մեր սիրելի Ամարանոցին ու նաեւ մեր սիրտերուն մէջ։
Յատուկ ուրախութեամբ կը նշենք, որ յաջողեցանք վերակազմել Ալեքսանտրուպոլսոյ «Երեւան» մասնաճիւղի վարչութիւնը եւ այս ձեւով բոլորելու մասնաճիւղներուն օղակները Հիւսիսային Յունաստանի տարածքին։
Սիրելինե՛ր, Հ.Գ.Խ.ի Շրջանային Վարչութիւնը, հետեւելով Հ.Օ.Մ.ի լուսամիտ հիմնադիրներու առողջ եւ անխափան ուղիին, պարտականութիւն ունի սփիւռքեան այս համաշխարհային եւ մանաւանդ Յունաստանի տնտեսական ծանր տագնապի պայմաններու միջավայրէն ներս, վառ պահելու հայութիւնը եւ իր ծառայութեան ոգին եւ մանաւանդ իր աննկուն հաւատքը, որքան ալ ահաւոր ըլլան ձուլման վտանգները ու պայմանները։
Մեր նստաշրջանին վարչութիւնը արժանացաւ ստանալու 2 Բարերարներէ շօշափելի ժառանգութիւն։ Հանգուցեալ Արթին Գալուստեանի փափաքին համաձայն, իր ժառանգութենէն փոքր բաժին մը տրուեցաւ նաեւ վարչութեանս, իսկ Գրիգոր եւ Արմենուհի Խաչատուրեաններու փափաքով, իրենց մահէն ետք ժառանգեցինք 5 յարկաբաժիններ ու նաեւ շօշափելի գումար մը։
Պարտք կը զգամ շեշտելու վարչութեան անդամներու պատրաստակամութիւնը, զոհաբերութեան ոգին եւ անձնուէր ամէնօրեայ հոգատարութիւնը, լաւագոյն ձեւով խնամելու՝ Խաչատուրեան եղբայրներուն ծանր առողջական վիճակը 12 ամիսէ ի վեր։ Ա՛յս է Հ.Օ.Մ.ուհիի ոգին։
Խաչուհիներս պէտք է հաւատանք Հ.Գ.Խ.ի առաքելութեան, որովհետեւ կը վստահինք մեր նուիրեալ ընկերուհիներուն, որոնք կ’ապրին, կը շնչեն եւ իրենց կեանքի նպատակը դարձուցած են հայութեան ծառայելը ի գին ամէն զոհողութեան։
Սիրելի՛ ընկերուհիներ եւ ընկերներ, վերջացնելէ առաջ մեր խօսքը, շնորհակալութիւն կ’ուզենք յայտնել բոլոր անոնց, որոնք վարչութեան կողքին գտնուեցան այս նստաշրջանի ընթացքին։
Շնորհակալութիւն Հ.Օ.Մ.ի Կեդրոնական Վարչութեան եւ մասնաւորաբար իր անդամուհիին՝ Եւրոպայի ներկայացուցիչ ընկերուհի Լիզա Աւագեանին, որ իր փորձառութենէն եւ թելադրանքներէն օգտուեցաւ նաեւ վարչութիւնս։
Շնորհակալութեան խօսք ունինք Թեսաղոնիկէի «Ս. Աստուածածին» եկեղեցւոյ Թաղական Խորհուրդի անդամներուն, որոնք նիւթա-բարոյական աջակցութեամբ քաջալերեցին մեր վարչութեան։
Մեր խորին շնորհակալութիւնները Յունաստանի հայոց թեմի նորընտիր բարեջան առաջնորդ Գեղամ Արք. Խաչերեանին, Թեսաղոնիկէի հոգեւոր հովիւ Ստեփանոս Վրդ. Փաշայեանին, ինչպէս նաեւ Թրակիոյ շրջանի հոգեւոր հովիւ Պարէտ Քհնյ. Խաչերեանին, որոնք միշտ մեր միութեան ու մասնաճիւղներուն կողքին գտնուեցան։
Մեր սրտագին շնորհակալութիւնը ընկերուհի Զապէլ Գալֆայեանին, որ կը շարունակէ վարել «Մալաքեան-Գասպարեան» Ծաղկոցի տնօրէնութիւնը, իր կողքին միշտ ունենալով 8 նուիրեալ ընկերուհիներ, մեր ուսուցչական կազմը, ուրախութեամբ եւ ամենայն գիտակցութեամբ յառաջ տանելով սոյն դժուար, բայց միաժամանակ քաղցր առաքելութիւնը։
Մեր շնորհակալութիւնները նաեւ նորակազմ Ծնողական Յանձնախումբի ընկերուհիներուն՝ իրենց հոգածութեան ու գուրգուրանքին՝ մեր դպրոցի աշակերտներուն հանդէպ։
Յատուկ շնորհակալութեան խօսք ունինք վարչութեանս տարիներու գործակից՝ Ընկեր Խաչիկ Փափազեանին, իր անդադար շարունակական գործակցութեան հեսեր՝ տնտեսական հարցերու վերաբերեալ։
Վերջին յարգանքի եւ շնորհակալութեան խօսք ունինք Հ.Յ.Դ.ի մեր ընկերներուն, Յունաստանի Կապոյտ Խաչին, Թեսաղոնիկէի «Ս. Աստուածածին» եկեղեցւոյ Տիկնաց Միութեան, Ամարանոցի յանձնախումբի անդամներուն, Հ.Յ.Դ. Թեսաղոնիկէի «Սողոմոն Թեհլիրեան» Երիտասարդական Խումբին, ինչպէս նաեւ Մակեդոնիոյ եւ Թրակիոյ մեր բոլոր մասնաճիւղներուն, որոնց պատասխանատուութեան շնորհիւ կարելի եղաւ վարչութեանս աշխատանքներու իրականացումը։
Թոյլ տուէք իմ շնորհակալական խօսքս յայտնելու վարչութեան 6 տեղւոյն եւ 2 հեռանիստ ընկերուհիներուն, ինչպէս նաեւ վարչութեանս վարիչ քարտուղարին՝ ընկերուհի Իրեն Յովհաննէսեանին, որոնք պատասխանատուութեամբ սատարեցին եւ դիւրացուցին վարչութեանս աշխատանքները։
Թեսաղոնիկէի մեր գաղութը, ամբողջ յունահայ գաղութին նման, աստիճանաբար զարգացաւ եւ իր պատմութեան մէջ շատ վերադասաւորումներու ենթարկուեցաւ։ Օսմանեան տիրապետութեան ընթացքին փոքր համայնք մըն էր, երբ հիմնեց մեր եկեղեցին։ Աւելի քան մէկ-երկու տասնամեակ անց, ընդունեց ու ընդգրկեց գաղթականներու հսկայական ալիք մը, Ցեղասպանութենէն եւ Փոքր Ասիոյ աղէտէն վերջ։ Անոնց շնորհիւ գաղութը ծաղկեցաւ եւ զարգացաւ, ստեղծեց կառոյցներ, միութիւններ, մեծ կրթական հաստատութիւններ։ Ծնաւ յայտնի մտաւորականներ, կարեւո՛ր անձնաւորութիւններ…։
Քանի մը տասնեակ տարի անց, զանգուածային ներգաղթի պատճառով դէպի Հայաստան, գաղութը նորէն նօսրացաւ…, հակառակ ատոր, ինքզինք պահպանեց, շնորհիւ իր անդամներու կամաւոր եւ անշահախնդիր նուիրումին, համեստութեան, բարոյականութեան, մէկը միւսին հանդէպ յարգանքի շնորհիւ…։
Այս արժէքներուն շնորհիւ պահպանեց իր միասնութիւնը, պահպանեց իր կառոյցները, որոնց կարգին նաեւ մեր կազմակերպութիւնը՝ Հ.Գ.Խաչը՝ նախանձելի բարեսիրական եւ կրթական իր գործունէութեամբ, որ հաւաքական ջանքերու եւ անձնուիրութեան պտո՛ւղն է, ուր ԵՍը կը նահանջէ եւ իր տեղը կու տայ ՄԵՆՔին, առանց սահմանափակումներու։
Այս սրահին մէջ ներկաներու մե՛ծ մասը, վստա՛հ եմ, կրնան իրենց յիշողութեան մէջ բերել՝ իրենց մօր, կամ հօր, մեծ մայրիկին կամ մեծ հայրիկին գործունէութիւնը՝ Հայ Գթութեան Խաչի կամ այլ կազմակերպութիւններու մէջ…։
— Ա՛յս արժէքները ստացանք մե՛նք եւս մեր նախորդներէն։
— Ա՛յս արժէքներով ընթացանք ու շարունակեցինք մեր ուղին, ի շահ մեր Գաղութին։
Յուսա՛մ որ ա՛յս արժէքներով նոր մարտահրաւէրներու առջեւ կանգնած, կը շարունակուի վա՛ղն ալ մեր սիրելի կազմակերպութեան ճանապարհը…։
