Թեսաղոնիկէի «Մալաքեան-Գասպարեան» շաբաթօրեայ դպրոցի բացում
Հ.Գթ.Խաչի Թեսաղոնիկէի «Մալաքեան-Գասպարեան» շաբաթօրեայ դպրոցը, Շաբաթ՝ 5 Հոկտեմբեր 2019ի առաւօտեան, իր 2019-20 ուսումնական-կրթական տարեշրջանի դռները անգամ մը եւս բացաւ, «Ս. Աստուածածին» եկեղեցւոյ մէջ բացման ջրօրհնէքի հանդիսաւոր արարողութեամբ, որ կատարեց Թեսաղոնիկէի հոգեւոր հովիւ՝ Ստեփանոս վրդ. Փաշայեան, սարկաւագաց դասին մասնակցութեամբ։
Ներկայ էին Թեսաղոնիկէի ազգային եւ միութենական. կառոյցներու ներկայացուցիչները, տնօրէնութիւնը, ուսուցչական կազմն ու ծնողները, դպրոցի բարեկամներն ու բարերարները, ինչպէս նաեւ հին եւ նոր աշակերտներ։ Աւարտին, յաջորդաբար ողջոյնի, բարի գալստեան, տարեմուտի բացման առիթով, ինչպէս նաեւ դպրոցէն ներս կարգ ու կանոնի որոշ տեղեկութիւններով խօսք առին տնօրէնուհի ընկ. Զապէլ Գալֆայեանն ու եկեղեցւոյս թաղական խորհուրդի ատենապետ Արթին Աբրահամեան, ինչպէս նաեւ Հ.Գթ.Խաչի Մակեդոնիոյ եւ Թրակիոյ Շրջանային վարչութեան ատենապետուհի՝ ընկ. Կիւլա Գասապեան։ Ապա, հայր սուրբը իր ողջոյնի խօսքին մէջ առաջին հերթին, Յունաստանի հայոց թեմի առաջնորդ Գեղամ արք. Խաչերեանի անունով շնորհաւորական խօսքեր փոխանցեց բոլորին։ Ապա, ան անդրադարձաւ հայ դպրոցի կարեւորութեան ու անոր պահպանման, յորդորելով բոլորին հայ լեզուն անաղարտ պահելու, մշտական կերպով օգտագործելու, իրենց հայու ինքնութիւնը բարձր պահելու, յատկապէս իրենց օճախներէն ու մասնաւորաբար ա՛յս դպրոցէն ներս։ Ան բարձրօրէն գնահատեց այն ծնողները, որոնք իրենց զաւակները կ’ուղարկեն նաեւ հայկական դպրոց՝ հայ ընտանիքի ջահը միշտ վառ պահելու վճռակամութեամբ։ Ի վերջոյ, հայր սուրբը դպրոցի մեծ ընտանիքին բարի վերամուտ եւ յաջողութիւններով լի տարեշրջան մը մաղթեց եւ իր օրհնութիւնը բաշխեց բոլորին։
Ջրռրհնէքի արարողութենէն ետք, աշակերտները իրենց ուսոցչուհիներու ընկերակցութեամբ անցան դասարանները, կատարելու համար օրուան դասապահերը։
Արեւելեան Մակեդոնիոյ եւ Թրակիոյ միօրեայ վարժարաններու բացում
Անցնող երկու շարունակական շաբաթավերջերու ընթացքին, տեղի ունեցան Արեւելեան Մակեդոնիոյ եւ Թրակիոյ Հ.Գթ.Խաչի միօրեայ վարժարաններու բացման արարողութիւններ։
Օգտուելով Յունահայոց Թեմակալ Առաջնորդ Գեղամ արք. Խաչերեանի Թրակիա ներկայութենէն, առաջին հերթին, Գոմոթինիի մէջ Շաբաթ՝ 21 Սեպտեմբերի երեկոյեան կատարուեցաւ ջրօրհնէքի արարողութիւն, ներկայութեամբ Հ.Գթ.Խաչի շրջանային եւ տեղական վարչութիւններու անդամներուն, ծնողներուն եւ աշակերտութեան, ինչպէս նաեւ թաղային խորհուրդներու ներկայացուցիչներուն։
Չորեքշաբթի, 25 Սեպտեմբեր 2019ի երեկոյեան ժամը 5։00ին Օրէսթիատայի հիւրանոցի սրահէն ներս ժողովրդային հաւաքի ընթացքին, ձեռամբ Սրբազան հօր տեղի ունեցաւ միօրեայ վարժարանի մանուկներու եւ աղի օրհնութիւն։
Երկու բացման արարողութիւններուն, Առաջնորդ Սրբազան հայրը յատուկ կերպով շեշտեց հայ դպրոցի կարեւորութիւնը եւ հայ գիրն ու գրականութիւնը սորվելու հրամայականը։ Ան ընդգծեց, թէ սփիւռքի մէջ պարտինք բոլորս բարձր պահել ազգային ինքնութիւնը եւ ամէն կերպով կառչած մնալ հայ լեզուի պահպահման։ Ան նաեւ ջերմօրէն շնորհաւորեց Հ.Գ.Խաչի ժրաջան անդամները, ուսուցչուհիները եւ ծնողները, ապա իր հայրական օրհնութիւնը բաշխեց բոլոր աշակերտութեան։
Կիրակի 6 Հոկտեմբերի առաւօտեան, Արտավազդ վրդ. Շարոյեան կատարեց Քսանթիի միօրեայ վարժարանի օրհնութիւնը, ներկայութեամբ աշակերտներուն, ծնողներուն եւ ուսուցիչներուն։։
Նոյն օրուայ առաւօտուն, արեւելեան Մակեդոնիոյ եւ Թրակիոյ հոգեւոր հովիւ Յովհաննէս Վրդ. Սաղտըճեան կատարեց Ալեքսանտրուպոլսոյ միօրեայ վարժարանի բացումը։
Երկու հոգեւորականները, իրենց կարգին բարի սկիզբ մաղթեցին աշակերտութեան եւ շնորհաւորեցին ծնողներն ու ուսուցիչները հայեցի դաստիարակութեան նոր տարեշրջանի մեկնարկին առիթով։
Նաեւ, նոյն շաբաթավերջին իր դռները բացաւ Գավալայի միօրեայ վարժարանը, ուր հոն եւս Հ.Գ.Խաչի անդամներու եւ թաղային խորհուրդի ներկայութեամբ սկիզբ առին նոր տարեշրջանի դասընթացքները։
Այսպէս, այս տարի եւս, հիւսիսային Յունաստանի մէջ աւելի քան 200 աշակերտներ կը մասնակցին Հ.Գ.Խաչի միօրեայ վարժարաններուն, որոնք իրենց ուսուցիչներու անմիջական հսկողութեան տակ, ամէն շաբաթավերջին կը հետեւին հայ լեզուի ու պատմութեան դասերուն, շնորհիւ Հ.Գ.Խաչի ազգանուէր գործունէութեան եւ շրջաններու թաղային խորհուրդներու անվերապահ աջակցութեան։
