Թրքական «Haber7» լրատուական կայքը ներկայացուցած է Թուրքիոյ մէջ գործող «Հայկական անհիմն պնդումներու դէմ պայքարի միութեան» (ASİMDER) ղեկավար Կէոքսել Կիւլպէյի հարցազրոյցը, ուր վերջինս այս անգամ Հայաստանը կը մեղադրէ քիւրտ զինեալներուն ապաստան տալու մէջ:
Արցախեան հակամարտութեան վերաբերեալ ատրպէյճանական քարոզչութեան եւ ակնյայտ ապատեղեկատուութեան տարածմամբ յայտնի վերոնշեալ կազմակերպութեան նախագահը մասնաւորապէս յայտնած է, որ իբր Հայաստան Քիւրտիստանի Աշխատաւորական Կուսակցութեան (PKK) եւ Քիւրտիստանի Ազատ Կեանքի Կուսակցութեան (PJAK) ահաբեկիչներ տեղաւորած է Վարդենիսի մէջ: Կիւլպէյի հերթական անհեթեթ յայտարարութիւնը արագ արտատպուած է ատրպէյճանական կայքերուն կողմէ, մինչ անդին թրքական մամուլը «լուրջ չէ ընդունած» այս պնդումը: Ուստի ուշագրաւ է, որ Կիւլպէյի այս «բացայայտում»ը, որ Թուրքիոյ համար կարծես թէ պէտք է մեծ կարեւորութիւն ունենար, տեղ գտած է միայն թրքական երկու ցած վարկանիշ ունեցող կայքերու մէջ:
Ի դէպ ատրպէյճանական «Հագգըն.ազ»ի հրապարակած նիւթին մէջ առկայ է նաեւ տեսանիւթ, որ սակայն Երեւանի ժամանակով 18:00 դրութեամբ հասանելի չէ: Սակայն նիւթի սկզբնաղբիւրին մէջ որեւէ տեսանիւթ չէ հրապարակուած:
Նախկին հետախոյզ, Արցախեան պատերազմի մասնակից Վովա Վարդանով այս առիթով իր ֆէյսպուքեան էջին մէջ գրած է, որ «Հագգըն»ի հրապարակած տեսանիւթը իր վարած «Ողջ մնալու արուեստ» (ՈՄԱՅ) դասընթացքէն է, եւ վերոնշեալ պնդումներուն հետ որեւէ կապ չունի: Նշենք, որ Ատրպէյճանի կողմէ տնտեսաւորուող հակահայկական «ASİMDER» կազմակերպութեան կողմէ կատարուող անհիմն յայտարարութիւնները, որոնք երբեք, որեւէ ապացոյցներով չեն ուղեկցուիր, նորութիւն չեն եւ նոյնիսկ թրքական հեղինակաւոր լրատուական կայքերու կողմէ արձագանգ չեն ստանար:
