Շաբաթ, 30 Սեպտեմբեր 2023-ին տեղի ունեցաւ Յունաստանի Հայ Կապոյտ Խաչի 84-րդ Պատգամաւորական ժողովը, Գոքինիոյ «Զաւարեան» կեդրոնի «Սարաճեան-Զագարեան» սրահներէն ներս։
2021-2023 նստաշրջանի ատենապետուհի ընկ. Լիզա Աւագեան ժողովի բացումը յայտարարելով, հրաւիրեց ներկաները մէկ վայրկեանի յոտնկայս լրութեամբ յարգելու Արցախահայութեան զոհերու յիշատակը: Ապա՝ ընկերուհին յայտնեց, թէ հակառակ Արցախի մէջ տիրող կացութեան ստեղծած ծանր մթնոլորտին, միութիւնը պէտք է շարունակէ իր գործունէութիւնը, օգտակար հանդիսանալով հայ ժողովուրդին:
Ներկայութեան ստուգումէն ետք յայտնի եղաւ թէ ժողովին մասնակցեցան 22 պատգամաւորներ Հ.Կ.Խաչի 5 մասնաճիւղերուն կողմէ, խորհրդակցական ձայնով ընկերուհիներ եւ հիւրեր։ Ներկայ էր նաեւ Հ.Յ.Դ. Կեդրոնական կոմիտէի ներկայացուցիչ-կապ ընկերը։
Ժողովին ներկայ եղան նաեւ՝ Հ.Կ.Խաչի վարժարաններու տնօրէնները, որոնք զեկուցեցին վարժարաններու աշակերտութեան թիւին, վարժարաններու դիմագրաւած առօրեայ հարցերուն եւ գործադրուող ծրագիրներուն շուրջ։
Առաջնորդ Սրբազան հօր եւ Ազգային վարչութեան անունով ողջոյնի խօսք ուղղեց Տէր Պարետ քհն. Խաչերեան։
Գրաւոր ողջոյնի խօսք ուղղեց Հ.Գթ. Խաչի Մակետոնիոյ եւ Թրակիոյ Շրջանային վարչութիւնը:
Ժողովին հեռավար կապով մասնակցեցաւ Հ.Օ.Մ.ի Կեդրոնական Վարչութեան կողմէ ընկերուհի Թալին Մկրտիչեան։
Ընկերուհին յաջողութիւն մաղթելէ ետք ժողովի աշխատանքներուն, զեկուցեց Արցախի ժողովուրդի տեղահան դառնալու իրավիճակի մասին, տեղեկացուց, թէ արդէն Կ. Վարչութեան ատենատետուհին կը գտնուի Հայաստան, մօտէն իրազեկ դառնալու համար կացութեան եւ շեշտեց, թէ բոլոր միաւորներն ու անդամուհիները պատրաստակամութեամբ ամգամ մը եւս կոչուած են իրենց կարելին ընելու՝ զօրակցելու համար Արցախի ընտանիքներուն եւ օգնութեան ձեռք երկարելու։
Հ.Կ.Խաչի Պատգամաւորական Ժողովը իր ցաւն ու տագնապը յայտնեց Արցախի վերջին եղելութիւններու մասին, վճռականութեամբ շեշտելով, թէ մեր միութիւնը պատրաստ է կրկին մեր ժողովուրդի կարիքներուն թիկունք հասնելու, «ժողովուրդէս՝ ժողովուրդիս եւ ժողովուրդիս հետ, ժողովուրդիս համար» նշանաբանով։
Ժողովը որոշեց յատուկ խօսքով հանդէս գալ յունահայ գաղութին, այս հարցով։
Շրջանաւարտ Շրջանային Վարչութիւնը ներկայացուց իր նիւթաբարոյական տեղեկագիրը, ապա տեղի ունեցաւ գործունէութեան քննարկումը, որու արդիւնքին ժողովը բարձր գնահատեց տարուած աշխատանքը։ Նաեւ, մատնանշեց այն մարտահրաւէրները որոնց առջեւ կը գտնուի միութիւնը։
Օրակարգերու երկրորդ բաժնով, յաջորդեց կարծիքներու փոխանակում եւ եղան առաջարկներ եւ բանաձեւուեցան որոշումներ յաջորդ տարեշրջանին համար։
Յաջորդաբար, ժողովը ընտրեց 2023-2025 նստաշրջանի 9 անդամ Շրջանային Վարջութիւնը: Այսպէս, ընտրուեցան հետեւեալ ընկերուհիները.-
Լիզա Աւագեան, Նորա Քիւրտօղլեան, Զարուհի Մանկոյեան, Ալիս Յարութիւնեան, Ատրինէ Գնունի, Աննա Գազանճեան, Ճուլիա Ճանիկեան, Նոյեմի Եզեկիէլեան, Շողիկ Պապօղլեան:
Վարձքը կատար բոլոր մասնաճիւղերու վարչութեանց եւ բոլոր գործօն անդամուհիներուն։
Յաջողութեան մաղթանքներ, ուժ եւ կարողութիւն բոլորիս՝ յառաջիկայ տարեշրջանի գործունէութեան համար։
Հ.Կ.Խաչի Շրջանային վարչութիւն
