Հայ Կապոյտ Խաչի Շրջանային Վարչութիւնը գումարեց միջվարչական ժողով Չորեքշաբթի, 8 Յունիս 2022-ին, Գոքինիոյ «Զաւարեան» կեդրոնի «Զաքարեան-Սարաճեան» զոյգ սրահներէն ներս:
Ժողովին մասնակցեցան Հ.Կ.Խաչի Շրջանային վարչութիւնը, մասնաճիւղերու վարչութիւնները, յանձնախումբերու, ինչպէս նաեւ «Սիրոյ Պազար»ին աշխատանքներուն մասնակցած ընկերուհիները:
Մասնաճիւղերու վարչութիւնները եւ Շրջանային վարչութիւնը զեկոյցներ տուին իրենց իրագործած ու ապագայ ծրագիրներուն շուրջ:
Ապա, ժողովի օրակարգ դարձաւ «Սիրոյ Պազար»ը, որ համավարակի պատճառով երկու վերջին տարիներուն տեղի չունեցաւ:
Շրջանային վարչութիւնը ներկայացուց՝ դժուարութիւնները, որ դիմագրաւեց կազմակերպչական գետնի վրայ, նկատի առնելով, որ տարբեր էր նախորդ տարիներէն, նախապատրաստական աշխատանքներու ընթացքը եւ ձեռնարկի արդիւնքը, որը շատ յաջող գնահատեց:
Յաջորդաբար, ընկերուհիները արտայայտեցին իրենց կարծիքը ու զանազան շահաբեր նշումներ ըրին օրակարգին շուրջ:
Ժողովը եզրակացուց, թէ այս տարի եւս, հակառակ «Սիրոյ Պազար»ի կազմակերպման որոշումին նախնական վերապահութեան՝ համավարակի անկայուն ընթացքին պատճառով «Սիրոյ Պազար»ը շատ յաջող անցաւ եւ հասաւ իր նպատակին:
Ժողովի աւարտին, «Զաւարեան» կեդրոնի տանիքը Շրջանային Վարչութիւնը հիւրասիրեց պազարի աշխատանքներուն մասնակցող ընկերուհիներուն:
Երեկոն իր աւարտին հասաւ ընկերային ու զուարթ մթնոլորտի մէջ:
