«Նոր Յառաջ» կը հաղորդէ, որ Ֆրանսայի խորհրդարանական ընտրութիւններու երկրորդ փուլ անցած հինգ հայ թեկնածուներէն չորսը ընտրուած են: Միակ բացառութիւնը Պուշ-տիւ-Ռոնի մէջ Փասքալ Շամասեանն է, որ հակառակ առաջին փուլին իր արձանագրած լայն առաւելութեան՝ պարտուեցաւ հանրապետական Վալերի Պուայէէն:
Այսպէս, ընտրուած են`
– Օ-տը-Սէնի մէջ «Յառաջ Ընթացող Հանրապետութիւնը» կուսակցութեան թեկնածու Ժաք Մարիլոսեան ձայներու 57,81%ով` ընդդէմ Հանրապետական Էրիք Պարտոաթիի,
– Ռոնի մէջ Տանիէլ Ղազարեան («Յառաջ Ընթացող Հանրապետութիւնը» կուսակցութեան թեկնածու) 52,35%ով` ընդդէմ Հանրապետական Ֆիլիփ Մէօնիէի, որ Ռոնի շրջանային խորհուրդի փոխ-նախագահն է,
– Շէրի մէջ Նատիա Եսայեան (ԺողովրդավարականՇարժում) 52,57%ով` ընդդէմ համայնավար Նիքոլա Սանսիւի,
– Էօռ եւ Լուառի մէջ Կիյոմ Գասպարեան («Յառաջ Ընթացող Հանրապետութիւնը» կուսակցութեան թեկնածու) 55,18%ով` ընդդէմ Հանրապետական Ֆրանք Մասելիւսի:
Հայ Դատի յանձնախումբի զօրակցութիւնը վայելող միւս թեկնածուներէն ընտրուեցան Մարին Պրընիէ (Հանրապետական, Ծովային Ալպեաններ), Լիւք Գարվունաս (Ընկերվարական, Վալ-տը-Մառն), Ֆրանսուազ Տիւմա (LREM, Կառ), Ֆրանսուա Միշել Լամպեռ (LREM, Պիւշ-տիւ-Ռոն), Ֆրանսուա Փիւփոնի (Ընկերվարական, Վալ-տ՛Ուազ), Կի Թեսիէ (Հանրապետական, Պուշ-տիւ-Ռոն):
Իսկ «Ֆրանսա-Արցախ բարեկամութեան շրջանակ»ի համանախագահ Ֆրանսուա Ռոշպլուան (Անկախ Դեմոկրատականներու Միութիւն, Լուառ) պարտուեցաւ երեսփոխանական վեց շրջաններ բոլորելէ ետք, ինչպէս նաեւ պարտութիւն կրեց կրթութեան նախկին նախարար Նաժատ Վալօ-Պելքասեմ (Ընկերվարական, Ռոն):
