Կիրակի՝ 29 Ապրիլ 2018ին առաւօտեան ժամը 10-2, Ֆիքսի «Արամ Մանուկեան» ակումբէն ներս տեղի ունեցաւ Հ. Կ. Խաչի Շրջանային Վարչութեան կազմակերպած արիւնատուութեան երկրորդ փուլը: Առաջին փուլը տեղի ունեցած էր Կիրակի՝ 15 Ապրիլին, Գոքինիոյ «Զաւարեան» Կեդրոնէն ներս ու ապահովուած էր 13 շիշ արիւն, թէեւ ներկայացած էին աւելի մեծ թիւով հայրենակիցներ:
Այս անգամ, կարելի եղաւ 31 հոգիէ արիւն ստանալ, հակառակ որ 45 հոգի ներկայացաւ, սակայն առողջապահական տարբեր պատճառներով՝ մէկ մասը մերժուեցաւ:
Գոքինիոյ եւ Ֆիքսի շրջաններէն ներս կատարուած արիւնատուութեան ընթացքին ստացուած արեան քանակութիւնը տրամադրուեցաւ Էվանկելիզմոս հիւանդանոցի համակարգի պահեստանոցներուն՝ հարստացնելով Հ. Կ. Խաչի անունով պահ դրուած արեան քանակը:
Ամէն տարի իրագործուող այս նախաձեռնութիւնը, միշտ իր շուրջ կը համախմբէ արիւն տալու կամաւորներ, որոնցմէ շատեր ամէն տարի ներկայ կ’ըլլան արիւնատուութեան արշաւին, հոգեկան բարձր գոհունակութիւն ստանալով իրենց կատարած մատուցումով։
