Հ.Կ.Խ.-ի «Զաւարեան» ազգային վարժարանի
«Հայաստան Ուշագլեան» մանկապարտէզին վարիչ
մանկապարտիզպանուհի Անի Աբիկեանի խօսքը
«Զաւարեան» Վարժարանի Հայաստան Ուշագլեանի պայծառ ծաղկոցը գեղանի ու համեստ ներկայութեամբ՝ իր հրաժեշտը կու տայ այսօր: Իւրաքանչիւր դպրոցական տարեշրջանի հունձքը՝ իր գոյնն ու շեշտը կը դնէ մեր երկարամեակ կրթօճախին, հետք մը ձգելով մեր յունահայ կրթական իրականութեան եւ 95 տարուայ մեր վարժարանի պատմութեան մէջ:
Այս տարուայ հունձքը իր յատկութիւններով, իր ստեղծագործ եւ ընկերասէր ոճով, կրթասէր եւ խաղաղասէր ոգիով, եռանդով եւ կրթական բոլոր ծրագիրներով՝ հայեցի դաստիարակութիւնը ըմբոշխնեց եւ ինքնութիւն մը ստեղծեց: Երկու տարուայ ընթացքին՝ Կոկոն դասարանէն Ծաղիկ դասարան, ականատես եղանք թէ՛ ծնողք, թէ՛ ուցուցիչ, իրենց յառաջդիմութեան եւ բազմակողմանի զարգացումին: Իւրաքանչիւր երեխայ, իւրաքանչիւր Ծաղիկ՝ աճեցաւ ու բազմաթերթիկ եղաւ, զարդարեց մեր մանկարանը ու հարստացուց իր մտային եւ ընկերազգացական աշխարհը:
Եռալեզու միջավայրի մը մէջ, ուր հայերէնը, յունարէնը եւ անգլերէնը ներդաշնակ ձեւով կը զարգանային, այս հունձքը անկարելին կարելի դարձուց, անծանօթին մտերմացաւ, ապացուցելով թէ՝ մեր դիմագրաւուած մտահոգութիւնները եւ դժուարութիւնները կրնան յաղթահարուիլ: Մէկ խօսքով՝ մեր հայերէնի դասապահերը այն գեղեցիկ պահերը եղան, ուր երգը եւ երգախաղը, ստեղծագործութիւնը եւ երեւակայութիւնը, գիտական աշխարհի յայտնաբերումը եւ զանազան կիրարկութիւնները, պատմութիւնները եւ հեքիաթները, կրցան մեր մայրենի լեզուն զարդարել ու մանաւանդ զայն սիրցնել. կրցան աշխարհը ուրախութեամբ ծանօթացնել փոքրիկներուն մեր հայրէնով, վառ պահելով իրենց հետաքրքրութիւնը եւ հաճոյքով մասնակցիլ համապատախան գործունէութիւններուն: Սէրը եւ անհամբերութիւնը զորս ունեցան ամբողջ տարուան ընթացքին մեր մայրէնիին եւ հայերէնի դասապահերուն հանդէպ, քաջալերական եւ յուսաբեր է, թէ՛ մեր լուրջ առաքելութիւնը շարունակելու համար, թէ՛ որովհետեւ այսպէս մեր հունձքը շարունակութիւն մը կը հիւսէ՝ իւրայատուկ թելերով եւ ինքնաբերաբար կը կերտէ հայու ապագան, զանազան խոչընդոտներու մէջ: Երգի ու խաղի միջոցով մեր աւանդութիւններն ու պատմութիւնը պիտի փոխանցուին սերունդէ սերունդ, իսկ երեւակայութեամբ եւ ստեղծագործութեամբ, օղակ — օղակ պիտի օղակեն ու աճեցնեն մեր մշակոյթը:
Այսօր՝ Ծաղիկ դասարանի բեմադրութեան ընթացքին, «Խաղաղութեան պարտէզը» խորագիրով, վայելեցինք իրենց խաղաղ ու ներդաշնակ, անմեղ ներկայութիւնը: Արտասանեցին ոտանաւորներ ու մարդոց խաղաղ համագոյակցութեան պատգամը տուին, զգացնելով խաղաղ աշխարհի մը անհրաժեշտութիւնը՝ նման պարտէզի մը, ուր ծաղիկներու եւ բնութեան շնորհքը ներդաշնակութեան զգացում կը պարգեւեն:
Թէ՛ ոտանաւորներու յօրինումին, թէ՛ ասմունքի ու երգերու ընթացքին, ուր խաղաղ ու ներդաշնակ ոճը կ՚արտացոլար՝ բոլորիս միտքն ու սիրտը Արցախի մեր փոքրիներուն էր, որ ամիսներէ ու մանաւանդ երեք տարիէ ի վեր կը զրկուին հիմնական մանկական ու մարդկային իրաւունքներէ. մեծնալ եւ ապրիլ ջերմ ու խաղաղ մթնոլորտի մը մէջ. ապահով ապրիլ. մանկական գուրգուրանքը ու ընտանեկան ջերմութիւնը ազա՛տօրէն վայելել, անվտանգութեան մեջ խաղալ ու ընկերանալ:
Մեր լուսափայլ Ծաղիկ դասարանի աշակերտները, ինչպէս նաեւ հայութեան բոլոր զաւակները, աշխարհի չորս ծագերուն մեր ներկայի ու ապագայի յոյսն են: Խոր փափաք ու մաղթանք է՝ բոլոր չափահասները, պատասխանատու անձերը ապահովել բոլոր վերոնշեալ մանկական իրաւունքները, մարդկային իրաւունքները ու խաղաղութիւնը ետ բերել մեր հայրենիքին:
Իւրաքանչիւր երեխայ, իւրայատուկ ծաղիկ մըն է, որ աճելու համար պէտք ունի հողի, արեւի ու ջուրի ու մանաւանդ սիրոյ: Մեր գլխաւոր դերն է այս: Կայուն ցանկապատ մը ըլլալ, ո՛ւր որ ըլլանք, ապահովելու բոլոր անհրաժեշտութիւնները, իրենց պաշտապանելու. մեծցնելու ու աճեցնելու ամուր եւ փայլուն անձնաւորւթիւններ եւ սերունդներ:
Տարուան ընթացքին՝ մեր ծրագիրներուն առընթեր իրագործուեցան՝ յաւելեալ հետեւեալ ծրագիրները:
Հայալեզու
Բնապահպանութիւնը ու վերամշակումը
Գաղթականութեան հետ կապուած «Կառաւաններ առանց սահմանի»
Մեր աւանդական ճաշատեսակները
Ընկերութիւնը ու բարեկամութիւնը
Այլազանութիւնը
Մանուկներու իրաւունքները
Զգացումներու աշխարհը
Կենդանիներու համաշխարհային օրը
Խաղաղութեան համաշխարհային օրը
Մեր հաճելի խաղերը՝ քաղուած Անահիտ Սարգիսեանի «Բարեւ Արեւի» շարքէն, որոնք կ՚ընդգրկեն մեր աւանդութիւնները, պատմութիւնն ու մշակոյթը, եւ մեր առօրեան կը գունաւորեն:
Յունալեզու
Υγιεινή Διατροφή
Παγκόσμια Ημέρα Ζώων
Αποταμίευση
Φιλαναγνωσία
Διαφορετικότητα
Αριθμοκυβάκια
Κυκλοφοριακή Αγωγή
Καιρικά Φαινόμενα/Πρόγραμμα STEM
Նաեւ դպրոցական տարեշրջանի ընթացքին տեղի ունեցան ՝
Դեկտեմբեր ամսուն, տօնական նորարար աշխատանոց մը ծնողներուն եւ փոքրիկ աշակերտներուն միջեւ, ուր շքեղ ներկայացումով եւ ինքնաբուխ մաղթանքներով, ստեղծագործութիւններով հաճելի եւ յուզիչ շեշտ մը տուին տօնական այդ օրերուն:
Ապրիլ ամսուն՝ բաց դռներու նորարար գործունէութիւն մը, ուր յաջորդ տարեշրջանի երեխաները առիթը ունեցան ծանօթանալու մանկապարտէզը եւ մասնակցելու զանազան ստեղծագործ աշխատութիւններու:
Մայիս ամսուն՝ նշեցինք յուզիչ մթնոլորտի մը մէջ Մայրերու օրը:
Ու տեղի ունեցան բոլոր ազգային տօնակատարութիւնները ստեղծագործ ոգիով, երգով, պարով ու խաղով, յարգելով տարիքային բոլոր յատկութիւնները:
Շնորհակալական խօսք՝
Գերաշնորհ Սրբազան հօր:
Սուրբ Յակոբ եկեղեցուոյ հոգեւոր հովիւին, թաղային եւ տիկնաց մարմիններուն:
Ազգային վարչութեան, Տնտեսական եւ Ուսումնական խորհուրդներուն:
Հայ Կապոյտ Խաչի «Սօսէ» մասնաճիւղին:
Տնօրէնութեան, տիկին Մինասեան Հայկանուշին, որ միշտ մեր կողքին է ու կը քաջալերէ մեր դաստիրակչական ծրագիրները։
Ծնողական միութեան, որ միշտ թիկունք կը կանգնի որեւէ տեսակի կարիքներու ու յանձն առաւ Ծաղիկ դասարանի յուշանուէրներուն:
Գարպաճաքեան Սօսիին, որ Հայ ուսոցչական կազմի բացակայութեան ընթացքին, դասընթացքի մը պատճառով՝ սիրայօժար ստանցնեց Մանկապարտէզի հայալեզու ծրագիրը
Կտիկեան Վարդին, որ Մայրերու օրուան տօնակատարութեան ընթացիքին մարզանքի խաղեր կազմակերպեց մայրերուն եւ փոքրերուն միջեւ, պարգեւելով իւրայատուկ ու անմոռանալի պահ մը:
Մանկակապարտիզպանուհի Էֆիին Քիրիաքիտուին եւ Թամար Պետոյեանին, որոնց հետ բրունձք մը ըլլալով համագործակցութիւնը կատարեալին հասաւ տարի մը եւս եւ յաջողութեամբ կատարուեցան մեր դաստիարակչական ծրագիրներն եւ թիրախները:
Մասնաւոր շնորհակալութիւն մեր բոլոր գիտակից ծնողներուն, որ միշտ կը գնահատեն մեր նախաձեռնութիւններն ու դրական լիցքով մեր ծրագիրները կը քաջալերեն:
Շնորհակալութիւններ մանկապարտէզի աշակերտութեան բոլոր ծնողներուն, որ վստահեցաք ձեր զաւակները հայկական մեր այս վարժարանին:
Յատուկ շնորհաւորութիւններ մեր սիրելի շրջանաւարտ աշակերտներուն, մաղթելով յաջող դպրոցական կեանք մը ունենան «Զաւարեան» նախակրթարանին մէջ ու արժանանան աւելի բարձր վկայականներու:
Սիրելի Ծաղիկ դասարանի աշակերտներ՝
Ձեր օրինակելի խմբային ոճը, համագործակցութիւնը եւ եռանդը թող միշտ ձեզի ուղեկցէ յաջորդ մարզերուն մէջ: Միասին ըլլալը սկզբունք մըն է, միասին շարունակելը յառաջդիմութիւն մըն է, իսկ միասին աշխատիլը յաջողութիւնն է: Սրտագին շնորհաւորութիւններս, մաղթելով յառաջդիմութիւն յաջորդ մարզերուն մէջ:
Վրարձքերնիդ կատա՛ր, սիրելի փոքրիկներ: