Ինչպէս նշած էինք մեր նախորդ թիւով, Հայաստանի պաշտպանութեան փոխնախարար Կարէն Բրուտեանի հրաւէրով, Յունաստանի պաշտպանութան փոխնախարար Նիքոս Խարտալիաս 2 եւ 3 Յունիսին այցելեց Հայաստան եւ ունեցաւ բարձր կարգի հանդիպումներ, որոնց ընթացքին քննուեցան երկու երկիրներու միջեւ պաշտպանութեան ոլորտէն ներս գործակցութեան ընդլայնման հնարաւորութիւնները, ինչպէս նաեւ վերահաստատուեցան երկու բարեկամ պետութիւններու բարձր կապերը եւ հասարակաց մարտահրաւէրները։
Յարգանքի տուրք Ծիծեռնակաբերդի մէջ
Իր ժամանումէն անմիջապէս յետոյ, Նիքոս Խարտալիաս ու իր պատուիրակութիւնը այցելեցին Ծիծեռնակաբերդի Հայոց ցեղասպանութեան յուշահամալիրը եւ ծաղկեպսակ զետեղեցին Եղեռնի զոհերու յիշատակին, ապա իջնելով անմառ կրակին մօտ ծաղիկներ խոնարհեցուցին։ Յաջորդաբար, անոնք առիթը ունեցան այցելելու Ցեղասպանութեան թանգարանը, որու յուշամատեանին մէջ փոխնախարարը արձանագրեց՝ «Միաւորուած եղբայրական կապերով, մեր վսեմ ազգերը կը շարունակեն իրենց ուղին դարերուն ընդմէջէն, հասարակաց սրբազան պարտքով մը՝ երբեք չմոռնալ»։
Այցելութիւն Մայր Աթոռ Ս. Էջմիածին
Նոյն օրը՝ ուղեկցութեամբ Հայաստանի պաշտպանութեան փոխ նախարար Կարէն Բրուտեանի, Նիքոս Խարտալիաս եւ իր պատուիրակութիւնը այցելութիւն կատարեցին Ս. Էջմիածին եւ հանդիպում ունեցան Գարեգին Բ. Ամենայն հայոց Կաթողիկոսին հետ։
Վեհափառ հայրապետը իր ուրախութիւնը յայտնեց երկու երկիրներու ռազմական գերատեսչութիւններուն միջեւ ձեւաւորուած սերտ գործակցութեան առնչութեամբ։ Անդրադարձ կատարելով տարածաշրջանէն ներս տիրող բարդ իրավիճակին՝ Կաթողիկոսը իր մտահոգութիւնը արտայայտեց Հայաստանի եւ Արցախի նկատմամբ Ատրպէյճանի ոտնձգութիւններուն եւ վերջ չունեցող սպառնալիքներուն համար։ Այս առիթով, Գարեգին Բ. վստահութիւն յայտնեց, որ Հայաստանի Զինեալ ուժերը պիտի կարողանան ոգի եւ կամք դրսեւորել կանխելու Ատրպէյճանի ռազմատենչ նկրտումները։ Ամենայն Հայոց Կաթողիկոսը, ի դէմս Նիքոս Խարտալիասի, իր երախտագիտութիւնը յայտնեց Յունաստանի իշխանութիւններուն եւ ժողովուրդին արցախեան պատերազմի ծանր օրերուն Հայաստանին ցուցաբերած եղբայրական զօրակցութեան եւ աջակցութեան համար։ Յունաստանի ազգային պաշտպանութեան փոխնախարարը, շնորհակալութիւն յայտնելով ջերմ ընդունելութեան համար, ընդգծեց, որ հայ եւ յոյն ժողովուրդներու բարեկամութիւնը կու գայ դարերու խորքերէն։ Յոյն նախարարը, անդրադառնալով հայ-յունական ռազմական գործակցութեան, նշեց, որ Յունաստանի պաշտպանութեան նախարարութիւնը պատրաստակամ է ամէն ջանք ներդնելու՝ զայն առաւել խորացնելու համար եւ աջակցելու Հայաստանին առկայ մարտահրաւէրներու յաղթահարման գործին։
Հանդիպում պաշտպանութեան նախարարին հետ
2 Յունիսին Հայաստանի պաշտպանութեան նախարար Սուրէն Պապիկեան ընդունեց Յունաստանի ազգային պաշտպանութեան փոխնախարար Նիքոս Խարտալիասի գլխաւորած պատուիրակութիւնը:
Հ.Հ. պաշտպանութեան նախարարը բարձր գնահատած է պաշտպանական ոլորտէն ներս հայ-յունական գործակցութեան ներկայ մակարդակը եւ կարեւորած է յատկապէս ռազմա-արհեստագիտական ուղղութեամբ փոխգործակցութեան զարգացման անհրաժեշտութիւնը:
Նիքոս Խարտալիաս հաստատած է գործակցութիւնը զարգացնելու յունական կողմի պատրաստակամութիւնը եւ նշած, որ երկու երկիրներուն միջեւ առկայ ջերմ, բարեկամական յարաբերութիւնները կը պարտաւորեցնեն առաւել խորացնել փոխգործակցութիւնը` ներկայ մարտահրաւէրները դիմակայելու նպատակով:
Հանդիպումի ընթացքին քննարկուած են նաեւ տարածաշրջանային անվտանգութեան առնչուող հարցեր: Հայ նախարարը ներկայացուցած է Արցախի մէջ 44-օրեայ պատերազմէն յետոյ ստեղծուած անվտանգային իրավիճակը եւ շարունակուող սպառնալիքները: Նոյն օրը Յունաստանի պաշտպանութեան փոխնախարարի գլխաւորած պատուիրակութիւնը ընդունուած է նաեւ Հայաստանի պաշտպանութեան նախարարի տեղակալ Կարէն Բրուտեանի կողմէ: Քննարկուած են ռազմա-արհեստագիտական բնագավառին մէջ գործակցութեան զարգացման հնարաւորութիւնները:
Նիքոս Խարտալիաս այցելեց Պ.Ա.Հ.Հ.-ը
3 Յունիսին, Նիքոս Խարտալիաս եւ իր գլխաւորած պատուիրակութիւնը այցելեցին Հայաստանի Պաշտպանութեան ազգային հետազօտական համալսարանը, ուր դիմաւորուեցան Համալսարանի ընդհ. տնօրէն, զօրավար Գենատի Տաւարածեանի կողմէ։
Յունական պատուիրակութեան անդամները ծանօթացան համալսարանի հիմնադրութեան ու անոր պատմութեան, ինչպէս նաեւ անոնց ներկայացուեցան ուսումնական ծրագիրներու եւ գործունէութեան հիմնական ուղեցոյցները։ Գենատի Տաւարածեան եւ Նիքոս Խարտալիաս կարեւորեցին հայ-յունական բարեկամական կապերու եւ փոխգործակցութեան զարգացումը, յատկապէս ռազմական կրթութեան ոլորտին մէջ:
Այցելութիւն «Վազգէն Սարգսեան» ռազմական ուսումնարան
Նոյն օրուան մէջ, Պաշտպանութեան նախարարութեան Վ.Սարգսեանի անուան ռազմական համալսարանի պետ, գնդապետ Ա.Երոյեան ընդունեց Յունաստանի պաշտպանութեան փոխնախարար Նիքոս Խարտալիասի գլխաւորած պատուիրակութիւնը:
Հանդիպումի ընթացքին հիւրերը ծանօթացան համալսարանի գործունէութեան, ուսումնական գործընթացին, ինչպէս նաեւ Հայաստանի ռազմա-արդիւնաբերական արտադրանքի որոշ նմուշներուն:
Քննարկուեցան երկու երկիրներու միջեւ ռազմաուսումնական հաստատութիւններու գործակցութեան, փորձառութեան փոխանակման եւ շարք մը այլ հարցեր: