Հայաստանի նախագահի նստավայրին մէջ, Սերժ Սարգսեան առանձնազրոյց ունեցաւ երկօրեայ պաշտօնական այցով Երեւան ժամանած Տաճիկիստանի նախագահ Էմոմալի Ռահմոնիի հետ: Առանձնազրոյցէն ետք տեղի ունեցաւ ընդլայնուած կազմով հանդիպում՝ երկու երկիրներու պաշտօնական պատուիրակութիւններու անդամներուն մասնակցութեամբ:
Բարձր մակարդակի բանակցութիւններէ ետք կատարուեցաւ համատեղ յայտարարութիւն, նաեւ՝ ստորագրուեցան Հայաստանի Հանրապետութեան եւ Տաճիկիստանի Հանրապետութեան միջեւ շարք մը ոլորտներէ ներս երկկողմ համագործակցութեան խորացման ուղղուած փաստաթուղթեր:
Նաեւ՝ ստորագրուեցան երկու հանրապետութիւններուն միջեւ քաղաքացիներու փոխադարձ այցելութիւններու, օդային հաղորդակցութեան, հեռահաղորդակցութեան եւ փոստային կապի բնագաւառին մէջ համագործակցութեան, կրթութեան որակաւորումներու, գիտական աստիճաններու ու գիտական կոչումներու փոխ-ճանաչման եւ համադրելիութեան, երիտասարդութեան հետ աշխատանքի եւ մարմնամարզութեան ու առողջապահութեան բնագաւառներուն մէջ համագործակցութեան վերաբերեալ փաստաթուղթեր: Նախագահներ Սերժ Սարգսեան եւ Էմոմալի Ռահմոնի իրենց հանդիպման արդիւնքները ամփոփեցին զանգուածային լրատուամիջոցներու ներկայացուցիչներուն կատարուած յայտարարութիւններով:
Հայաստան — Տաճիկիստան
Հայաստան - Տաճիկիստան յարաբերութիւնները կը գտնուին նոր փուլի սեմին