Երեքշաբթի՝ 14 Դեկտեմբեր 2021-ի երեկոյեան, Հ.Կ.Խաչի Շրջանային վարչութիւնը իր նստավայրը հրաւիրած էր, 2020/2021 դպրոցական տարեշրջանի համալսարանի մուտքի քննութիւններուն մէջ յաջողած եւ այս տարի համալսարան նոր մուտք գործած գաղութիս հայ ուսանողները:
Այս տարի համաճարակի պատճառով կարելի չեղաւ սոյն հանդիպումը իրագործել միութեանս միջվարչական ժողովի ընթացքին, ինչպէս ծրագրուած էր: Նաեւ, զանազան յարգելի պատճառներով, նոր ուսանողներու միայն փոքր թիւ մը կարողացաւ ներկայանալ:
Շրջանային վարչութեան ատենապետուհին՝ ընկ.հի Լիզա Աւագեան շնորհաւորեց երիտասարդները, անոնց մաղթելով նորանոր նուաճումներ իրենց ուսանողական կեանքի ընթացքին:
Ան շեշտեց, թէ բոլորիս համար հպարտութիւն է, երբ հայ երիտասարդներ կը յաջողին իրենց մասնագիտութեանց մէջ եւ նշեց, թէ վստահաբար նաեւ բոլորիս փափաքն ու ակնկալութիւնն է, որ նոր սերունդը աշխոյժ մասնակցութիւն ունենայ գաղութային կեանքին եւ իր յաջողութիւններով օգտակար հանդիսանայ հայութեան ու հայրենիքին։
Աւարտին, տեղի ունեցաւ հիւրասիրութիւն եւ յանձնուեցան Հ.Կ.Խաչի կողմէ խորհրդանշական յուշանուէրներ:
Այս առթիւ Շրջանային Վարչութիւնս ջերմ շնորհակալութիւն կը յայտնէ ընկ.հի Կարինէ Յարութիւնեան-Թոքաթլեանին, որ սիրայօժար տրամադրեց Հայ Կապոյտ Խաչին յուշանուէրները:
