Ընդառաջելով հրաւէրներու՝ Յունաստանի «Համազգային»ի «Նայիրի» եւ «Նանոր» պարախումբները հայ մշակոյթը ներկայացուցին համայնքային կեանքէն, ինչպէս նաեւ Աթէնքի եւ յարակից շրջաններէ ներս: Հայկական ու ժողովրդական, աւանդական, նաեւ ժամանակակից երգ ու պարի, ազգային տարազի հայկական շունչով՝ մթնոլորտ եւ որակ հաղորդեցին յոյն եւ օտարազգի հանդիսատեսին՝ արժանանալով ներկաներու, ապա եւ կազմակերպիչներու գնահատանքին:
Սինեւրօ — «Աւանդական պարերու 2րդ մշակութային փառատօն»
Շաբաթ՝ 7 Յուլիսի առաւօտեան, «Համազգային»ի «Նայիրի» պարախումբը պարուսոյցի, ատենապետի եւ միաւորի անդամներու ուղեկցութեամբ մեկնեցաւ դէպի Փելոբոնէսի Ախայիա Նահանգի «Սինեւրօ» գիւղը, ուր կը գտնուի նաեւ հայկական ճարտարապետական ոճով կառուցուած Ս. Խաչ մատուռը: Այս դրախտավայրի, ինչպէս որ կը նկարագրեն այցելուները, սեփականատիրոջ՝ ծանօթ հայ արուեստագէտ Մարտիկ Մանիկեանի հրաւէրով էր, որ երկրորդ անգամ ըլլալով «Համազգային»ի պարախումբը կը մասնակցէր «Աւանդական պարերու 2րդ մշակութային փառատօն»ին:
Ելոյթը տեղի ունեցաւ Շաբաթ երեկոյեան, համալիրին բացօթեայ ամֆիթատրոնին մէջ: «Նայիրի» երկսեռ պարախումբը հանդես եկաւ «Քերծի», «Շատախի», «Դաւիթ Բէկ», «Մենք ենք, մեր սարերը» գեղեցիկ բեմադրուած պարերով (Պարուսոյց՝ Էտկար Էկեան): Փառատօնին կը մասնակցէին նաեւ Էղիոյէն, Փաթրայէն, Կրետէ կղզիէն եւ այլ շուրջ 10 գիւղերէ ու շրջաններէ ժամանած պարախումբներ: Յաջորդ օրը, պարախումբի եւ վարչութեան անդամները կատարեցին նաեւ շրջապտոյտ մը՝ այցելելով համալիրի զոյգ ազգագրական թանգարանները, Ս. Խաչ հայկական մատուռը եւ բնութեան գեղատեսիլ այլ վայրեր, ապա՝ ծովափը լողալէն եւ ճաշէն ետք՝ վերադարձան:
Ելոյթ՝ Գարէա
Նոյն օրը, Շաբաթ՝ 7 Յուլիսի երեկոյեան, Գարէայի «Ս. Սահակ եւ Ս. Մեսրոպ» խորանի օծման եւ անուանակոչութեան Բ. տարեդարձին առիթով՝ տեղի ունեցաւ հանդիսաւոր Սուրբ Պատարագ եւ մատաղօրհնութիւն Գարէայի «Ազատամարտ» ակումբէն ներս:
«Համազգային»ի «Նանոր» պարախումբը՝ ընդառաջելով Գարէա-Կեսարիանիի Թաղային Խորհուրդի հրաւէրին, «Շատախի», «Փափուրի» եւ «Ծաղկաձոր» պարերով, ակումբի բացօթեայ դաշտին մէջ ելոյթ ունեցաւ եւ կենսուրախութիւն, ժպիտ պարգեւեց ներկաներուն՝ պատանի պարուհիներու գեղեցիկ պարը լուսաւորեց եւ ջերմացուց հոգիները (Պարուսոյց՝ Աննա Պօղոսեան):
Յունաստանի հայոց թեմի առաջնորդ Գեղամ Արք. Խաչերեան, որ նախագահեց Ս. Պատարագին եւ ներկայ եղաւ մատաղօրհնութեան տօնախմբութեան, իր խօսքին մէջ յատուկ շնորհաւորեց «Համազգային»ի «Նանոր» պարախումբի պարուհիներու ելոյթը՝ մաղթելով անոնց յարատեւ յաջողութիւն: Շնորհաւորանքի եւ շնորհակալութեան խօսք ուղղեցին նաեւ շրջանի հոգեւոր հովիւը՝ Նարեկ Քհնյ. Շահինեան եւ Թաղային Խորհուրդի ներկայացուցիչ Ասատուր Եզեկիէլեան։ Ներկայ գտնուեցան նաեւ Գոքինիոյ հոգեւոր հովիւ Վահրիճ Վրդ. Ղարախանեան եւ Ազգային Վարչութեան ատենապետ Պօղոս Չոլաքեան, ինչպէս եւ տեղւոյն ու շրջաններէն ժամանած հայրենակիցներ։
Երեկոն ընթացաւ գեղեցիկ ժամանցով, ապա՝ ընթրիքի հիւրասիրութեան հրաւիրուեցան մեր պարուհիները։
Նիքոլէյքա — «Առաջին մանկական համաշխարհային փառատօն»
Շաբաթ երեկոյեան՝ 21 Յուլիս 2018ին, Ախայիա շրջանի Նիքոլէյքա ծովափնեայ գիւղին մէջ, «Համազգային»ի «Նանոր» պարախումբը առաջին անգամ ըլլալով մասնակցեցաւ առաջին «մանկական համաշխարհային փառատօն»ին։
«Շատ անգամներ հրաւէր ստացած ենք եւ «Նայիրի» պարախումբը ելոյթ ունեցած է այս փառատօնին՝ «Աւանդական պարերու փառատօն» խորագիրով: Այս տարի, սակայն, փոխակերպուած մանկական փառատօնի անուան ներքոյ՝ առաջին անգամն էր, որ մասնակցեցաւ «Նանոր»: Նման փառատօններուն «Համազգային»ի մասնակցութիւնը շատ կարեւոր է, յատկապէս նոր յարաբերութիւներ, ծանօթութիւններ, շփում ձեռք բերելու նպատակով զանազան երկիրներու ներկայացուցիչներու հետ, ինչ որ ապագային կրնայ նոր հնարաւորութիւններ ստեղծել մեր հայկական մշակոյթի տարածման եւ ներկայացման համար».- դիտել կուտայ պարախումբի միաւորի ատենապետ Անդրանիկ Շահպազեան։
Հրապարակի բացօթեայ բեմին վրայ, «Նանոր» պարախումբը հանդէս եկաւ չորս պարերով՝ «Մենք ենք, մեր սարերը», «Դաւիթ Բէկ», «Ծաղկաձոր» եւ «Փափուրի», պարուսոյց Աննա Պօղոսեանի ղեկավարութեամբ: Փառատօնին իրենց ազգային, աւանդական եւ ժողովրդական պարերով կը մասնակցէին նաեւ Սերպիոյ, Պուլկարիոյ, Պրազիլի, Չինաստանի եւ այլ երկիրներու պարախումբներ:
Այցելութեան ընթացքին «Համազգային»ի պարախումբի միաւորի վարչութեան անդամներ ըրին կարելին՝ մասնակիցներուն ժամանակը հետաքրքիր, օգտաւէտ եւ յիշարժան դարձնելու համար, որպէսզի հայ պատանիին փափաքը եւ սէրը, օտար երկիրներու մէջ, ամուր եւ կապուած մնան հայկական ընկերային միջավայրին, մշակոյթին եւ հայապահպանութեան գաղափարին:
Բացատրելով, թէ ի՛նչ նշանակութիւն ունի նման փառատօններուն մասնակցութիւնը եւ ո՛րն է նպատակը՝ պարուսոյց Էտկար Էկեան կ’ըսէ.- «Շատ տարբեր նշանակութիւն ունի «Համազգային»ի պարախումբներուն մասնակցութիւնը Յունաստանի տարբեր շրջաններէ հրաւէր ուղարկած փառատօններուն, մշակութային երեկոներուն եւ գաղութային կեանքէն ներս տեղի ունեցող ձեռնարկներուն։ Պարախումբի մը համար յոյն եւ օտար հանդիսատեսին առջեւ ելոյթը աւելի նշանակալի կը նկատուի՝ այն առումով, որ կը զգայ մեծ պատասխանատուութիւն հայ մշակոյթն ու արուեստը, Հայաստան անունը ճանաչելի եւ լսելի դարձնելու անգամ մը եւս օտարին առջեւ: Իսկ համայնքէն ներս տեղի ունեցող մեր ելոյթներու ժամանակ, «խանդավառութիւն» բառը ամէնէն յարմար բնորոշումն է՝ այն իմաստով, որ տեսնելով իրենց զաւակներու, թոռներու, քոյր-եղբայրներու պարը՝ կ՚արթնցնէ յիշողութիւններ հայրենիքէն, աւանդոյթներէն: Այսպիսով, իրենց խանդավառութիւնը ջերմ ծափահարութիւններու հետ միասին մեզի կը փոխանցուի եւ փոխադարձաբար կը յուզէ, կ’ոգեւորէ՝ մենք ալ կ՚ապրինք ժողովուրդին զգացումները:
«Ամփոփելով՝ կ՚ուզէի ըսել, որ պարախումբը ունի ե՛ւ յուզումի, ե՛ւ խանդավառութեան կարիքը, սակայն զուգահեռաբար, նպատակն է՝ Յունաստանի ամենահեռաւոր անկիւնին անգամ ներկայացնել հայկական մշակոյթն ու աւանդոյթները»:
«Համազգային»ի թղթակից
