Ուրբաթ, 23 Սեպտեմբերին «Ազատ Օր»-ի խմբագրատուն այցելեց Համազգայինի Կեդրոնական վարչութեան անդամ ընկ. Յասմիկ Շահինեան։ Իրեն կ՚ընկերակցէր Յունաստանի Համազգայինի Շրջանային վարչութեան ատենապետուհի ընկ. Յուլիանա Մանուկեան։ Օգտուելով իր Յունաստան այցելութենէն, թերթիս խմբագրութիւնը հետաքրքրական զրոյց մը ունեցաւ ընկերուհիին հետ՝ Համազգայինի կրթական, մշակութային եւ երիտասարդական ծրագիրներուն մասին։
Իր կեցութեան առիթով, ընկ. Յ. Շահինեան այցելեց Հ.Կ.Խաչի երեք ազգային վարժարանները եւ մօտէն իրազեկ դարձաւ կրթական ծրագիրներուն ու հայերէնի դասաւանդութեան։ Խօսելով այն մթնոլորտին մասին, որ ծանօթացաւ մեր վարժարաններէն ներս, ան յայտնեց, թէ շատ հարազատ զգաց, նշմարելով, թէ եռանդը չի պակսիր ուսուցիչներուն եւ աշակերտներուն մօտ, իսկ յատուկ շեշտ դրաւ հայերէն լեզուի ու պատմութեան արդի դասագիրքերու գործածութեան վրայ։
Ան նաեւ կարեւորեց Եւրոպայի մէջ գործող հայկական վարժարաններուն միջեւ յարաբերական կապեր ստեղծելու հնարաւորութիւնները։
Անդրադառնալով Ֆրանսայի մէջ՝ Համազգայինի անունով գործող վարժարաններուն մասին, ընկ. Շահինեան ներկայացուց Մարսէյլի ճեմարանի պատկերը, որ իր մանկապարտէզով, նախակրթարանի ու երկրորդականի բաժիններով կը պահէ 385 աշակերտներ։ Փարիզի մէջ կը գործէ «Համազգային-Թարգմանչաց» վարժարանը 138 աշակերտներով, որ ան եւս միջնակարգ բաժին ունենալու հնարաւորութիւնը ունի։ Ընկերուհին նշմարեց, որ կարելի է յարաբերական ու գործակցական կապեր ստեղծել Յունաստանի Հ.Կ.Խաչի եւ Ֆրանսայի Համազգայինի վարժարաններուն միջեւ՝ կրթական, մշակութային եւ մանկավարժական ծրագիրներու փոխանակման նպատակով ու աշակերտներուն միջեւ սերտ կապեր ստեղծելու ակնկալութեամբ։
Յաջորդաբար, մանրամասնելով Համազգայինի ծրագիրներուն մասին Եւրոպայի մէջ, եղաւ անդրադարձ «Youth Links Europe» ծրագիրին, որ կը միտի եւրոպական ցամաքամասի հայ երիտասարդները ծանօթացնել արուեստի մասնագէտներու եւ հայ մշակոյթի ոլորտներուն հետ։ 2023-ին համար սոյն հանդիպումը նախատեսուած է իրագործել Մարսէյլի մէջ, իսկ անցեալին նման հանդիպում կայացած է Վենետիկի մէջ։ Ընկերուհին մատնանշեց, թէ սոյն ծրագիրը շատ կարեւոր կը նկատուի, սակայն պէտք է զօրացնել քարոզչական բաժինը, որպէսզի աւելի մեծ թիւով երիտասարդներ տեղեակ պահուին ու մասնակցութիւն բերեն։
Ընկ. Շահինեան յայտնեց, թէ ներկայիս Համազգայինը մասնաճիւղեր կը պահէ Յունաստանի, Ֆրանսայի եւ Շուէտի հայկական գաղութներէն ներս։ Սակայն, նկատի ունենալով, թէ Եւրոպայի այլ երկիրներու մէջ եւս բաւական ստուար է հայութեան թիւը, Համազգայինը ծրագիր կը մշակէ եւ կարելիութիւնները կը քննէ ընդլայնելու մասնաճիւղերու թիւը, հիմնելով նոր միաւորներ։ Այսպէս, կարելի է նաեւ ստեղծել միջ-մասնաճիւղային ցանց մը, որ հետամուտ պիտի ըլլայ համատեղ ծրագիրներու ու գործունէութեան ընդլայնման։ Մեր խօսակիցը կարեւորութեամբ շեշտեց նաեւ զանազան ծրագիրներուն համար յատուկ նիւթական աղբիւրներ ստեղծելու անհրաժեշտութիւնը։
Ան ընդգծեց, թէ այսօր Եւրոպայի մէջ ապրող հայութիւնը կարեւոր ուժ կը ներկայացնէ, որ կրնայ սատարել մշակութային կեանքի ծաղկացման, նկատելով, թէ Հայաստանէն մեծ թիւով հայրենակիցներ մնայուն կայք հաստատած են եւրոպական քաղաքներու մէջ եւ կը պահեն մշակութային ու գեղարուեստական բարձր հետաքրքրութիւն։
* * *
Յասմիկ Շահինեան դուստրն է հանգուցեալ մանկավարժ եւ մտաւորական Գրիգոր Շահինեանի։ Ծնած է Լիբանան եւ կազմաւորուած է մտաւորական մթնոլորտի մէջ, յատկապէս հօր անմիջական շունչին տակ։ Ան մնայուն կայք հաստատած է Փարիզի մէջ եւ կը զբաղի մանկավարժութեամբ, ինչպէս նաեւ մանկապատանեկան գրականութեան մասնագէտ է։ Կ՚աշխատի Ֆրանսայի ազգային գրադարանի մանկապատանեկան կեդրոնի միջազգային բաժինէն ներս։ 2014-էն ի վեր, կեդրոնի մէկ բաժանմունքը կը գործէ Հայաստանի մէջ եւս։ Միջազգային կեդրոնին նպատակն է ծանօթացնել ու տարածել իւրաքանչիւր երկրի մանկապատանեկան գրականութիւնը։
Փարիզի մէջ ան կը պահէ հայկական մանկապատանեկան գիրքերու «Քոթոթ» հրատարակչատունը (https://www.editions-kotot.com)։ Հեղինակն է հայերէն լեզուով մանկական երեք գիրքերու։
