2024-ի երկրորդ շաբթուան ընթացքին, Համազգայինի կառոյցները վերսկսան իրենց աշխատանքները, կատարելով աւանդական գաթայի կտրումը։ Հաւաքոյթներուն տիրեց տօնական մթնոլորտ, փոխադարձուեցան մաղթանքներ ընկերներուն միջեւ, իսկ ակնյայտ էր երիտասարդական շունչը։
10 Յունուարին, առաջին հաւաքոյթը կատարեց նորակազմ ձայնային համոյթը (անսամպլ)։ Գաթայի բախտւոր շահողը եղաւ ընկ. Լուսինէ Թէփէլեան եւ ստացաւ նուէրը` լրագրող Ալեքսանտրոս Փիղատասի գիրքը, «100 από τη Μικρασιατική Καταστροφή. Ιστορική διαδρομή, προσφυγιά και μνήμη» (100 տարի Փոքր Ասիոյ աղէտէն. պատմական ընթացք, գաղթականութիւն եւ յուշ), հրատարակուած Հ.Յ.Դ. Հայ դատի յանձնախումբի կողմէն։ Նշենք, որ գեղարուեստական այս նոր խմբակը կը գործէ ծանօթ երաժիշտ ընկ. Ստեփան Թէքիրեանի ղեկավարութեամբ։
Յաջորդ օրը, հերթը հասաւ թատերախումբին։ Թատերականի փորձէն ետք տեղի ունեցաւ գաթայի կտրումը։ Օրուան բախտաւորները` բեմադրիչ ընկ. Յակոբ Պարսամեան եւ երիտասարդ անդամ ընկ. Արշակ Գաւլաքեան ստացան մէկական գիրք` տիկ. Մարգարիտա Մնացականեանի «Ճերմակաշուշան անուրջներ», յունարէնի թարգմանուած ընկ. Ժագ Տամատեանին կողմէն։
Շաբթուան վերջաւորութեան, խանդավառութեամբ տեղի ունեցաւ պարախումբերու վերամուտը, Շաբաթ օր` «Մարալօ», Կիրակի օր` «Նանօր» եւ «Նայիրի» խումբերու անդամներուն եւ պարուսոյցներուն կազմին ներկայութեամբ՝ ընկ. Էտկար Էկեան, ընկ. Աննա Պօղոսեան եւ օգնական ընկերներ Արամ Պետրոսեան, Օննիկ Պետրոսեան, Սուլա Պարտաքճեան եւ Անի Արտումեան։ Կարկանդակներու պատրաստումն ու նուիրումը եղաւ տիկ. Լիլիթ Քոլոյեանի սեփական փուռի կողմէն։
Նախատեսուած էին չորս նուէրներ` երկու «Մարալօ»-ին եւ մէկական «Նանօր»-ին ու «Նայիրի»-ին համար։ Բախտաւոր պարողները. փոքրիկներ Կարօ Աւագեան ու Փանաեոթիս Ցաքիրօղլու, պատանի` Ալեքս Էկեան եւ ընկ. Տիգրան Յունանեան։ Ամէն մէկուն շնորհուեցաւ սպառողական արժեթուղթ մը, տրամադրուած «Public» ընկերութեան գրախանութներուն կողմէն։
Բոլոր հաւաքոյթներուն ներկայ էր Շրջանային վարչութիւնը, ատենապետուհի ընկ. Յուլիանա Մանուկեանի գլխաւորութեամբ, որ շնորհաւորեց անդամներու տրամադրելիութիւնը աշխատանքներուն, գնահատելով ստեղծագործական ոգին եւ մաղթելով լաւ ու գործունեայ տարեշրջան մը, անձնական, ընտանեկան եւ միութենական յաջողութիւններով։
Վարձքը կատար բոլորին։
Համազգայինի թղթակից
Ժագ Տամատեան
