Քանի մը տարուան ընրդմիջումէն ետք, որ ստիպողաբար պարտադրուեցաւ համավարակի տարածումին պատճառով, Յունաստանի Համազգայինի կառոյցը դարձեալ ներկայացաւ հանրութեան առջեւ, երգապարային շքեղ հանդիսութեամբ եւ ժողովրդային խրախճանքով մը, որ լաւագոյն տպաւորութիւնները թողուց հայ հանրութեան։
Համազգգայինի պարի միաւորի կազմակերպութեամբ, Շաբաթ, 28 Յունուար 2023-ի երեկոյեան, Գոքինիոյ «Զաւարեան» կեդրոնի «Վահան եւ Տիրուհի Տէր Յովսէփեան» մարզադաշտը ժամադրավայրը եղաւ աւելի քան 350 հայրենակիցներու, որոնք փութացած էին ըմբոշխնելու հայ երգի ու պարի շարք մը, մասնակցութեամբ Համազգայինի երեք պարախումբերուն եւ հայ երգիչներու։ Ելոյթի նպատակն էր ապահովել անհրաժեշտ գումարը՝ վերանորոգելու համար պարախումբի բոլոր տարազներիը, որոնք պիտի գործածուին Մայիսի ելոյթին։
Խրախճանքէն առաջ, արդէն մեծ եռուզեր կը տիրէր մարզադաշտի մուտքին, որովհետեւ տեղի ունեցաւ Հ.Կ.Խաչի բարերարներու՝ «Վահան եւ Տիրուհի Տէր Յովսէփեան»ներու անունով փակ մարզադաշտի անուանատուչութիւնը։ Արդէն, մեր թերթի 2 Փետրուարի թիւով տուինք մանրամասն թղթակցութիւնը այդ նշանակալից ելոյթին։
Համազգայինի կազմակերպած խրախճանքին ներկայ եղան Թեմակալ Առաջնորդ Գեղամ արք. Խաչերեան, շրջանի հոգեւոր հովիւ Պարէտ քհնյ. Խաչերեան, Նիքէայի քաղաքապետ Եորղոս Իոաքիմիտիս, Ազգային վարչութեան ատենապետ Թագւոր Յովակիմեան եւ անդամները, Հ.Յ.Դ. Կեդր. կոմիտէի ներկայացուցիչ ընկ. Հռիփսիմէ Յարութիւնեան եւ անդամները, Հ.Յ.Դ. Գոքինիոյ «Վարանդեան» կոմիտէի կազմը, Հ.Կ.Խաչի, Համազգայինի եւ Հ.Մ.Ը.Մ.-ի Շրջանային վարչութիւնները եւ տեղական վարչութիւնները։ Աւելի քան 350 հայրենակիցներ ողողած էին վերանորոգուած մարզադաշտը, ստեղծելով հայաբոյր գեղեցիկ մթնոլորտ մը։
Բացումը կատարուեցաւ ընկ. Անդօ Շահպազեանի կողմէ, որ յայտնեց ելոյթի նպատակը եւ շեշտեց նոր տարազներու ապահովման անհրաժեշտութիւնը, որպէսզի կարելի ըլլայ նոր տեսքով եւ պարերով ներկայանալ հանրութեան առջեւ։ Ան հրաւիրեց բոլոր հայրենակիցները ներկայ ըլլալու Մայիսի սկիզբը ծրագրուած պարախմբային համոյթին, որ տեղի պիտի ունենայ Այիա Փարասքեւիի գոլեճի թատերասրահին մէջ։ Հանդիսավարը ներկայացուց նաեւ օրուան յայտագիրը եւ բոլորին մաղթեց բարի վայելում։
Յայտնութիւն մը եղաւ Համազգայինի «Մարալօ», «Նանոր« եւ «Նայիրի» պարախումբերու երեւումը դաշտին մէջ, մօտ 100 երկսեռ պատանիներու եւ երիտասարդներու մասնակցութեամբ, որոնք իրենց գլխաւոր պարուսոյց Էտկար Էկեանի եւ օգնական Աննա Պօղոսեանի արհեստավարժ ուսուցութեան տակ, զմայլեցին ներկաները եւ անսահման խանդավառութեան մթնոլորտին մէջ խլեցին ջերմ ծափահարութիւններ։
Որքա՜ն խրախուսիչ էր տեսնել «Մարալօ»-ի փոքրիկները, որոնք նուրբ շարժումներով գեղեկցօրէն հրամցուցին իրենց պարերը, տալով ապագայի խոստումնալից նախանշանը՝ աւելի բարձր մակարդակի խումբերուն մէջ շարունակելու համար իրենց զբաղումը հայ պարով։
«Նանոր» պարախումբի պատանիները ի յայտ բերին լաւ պատրաստուած եւ ինքնավստահ ներկայացում մը. անոնք այլեւս պատրաստ են առանձին ներկայացումներով կամ հաւաքաբար ցոյց տալ ամբողջական ծրագիր մը։ Տղոց եւ աղջիկներու համակարգուած շարժուձեւերը ցոյց տուին, թէ անցնող ամիսներուն որքան հետեւողական աշխատանք տարուած է կատարելագործելու համար իրենց մասնակցութիւնը։
Ալ ինչպէս արտայայտուիլ «Նայիրի» պարախումբին մասին, որ սոյն ձեռնարկի նպատակին համար հրաւիրած էր նաեւ անցեալի պարողները, որոնք ներկայ պարողներու կողքին, կախարդական ներկայացման մը հրճուանքը պատճառեցին ներկայ բազմութեան։ Տղոց առնական շարժումներով եւ աղջիկներու հեզաճկուն շարժուձեւերով հայ պարի նմուշները բարձր ոգեւորութիւն ստեղծեցին։ Խանդավառութիւնը հասաւ իր գագաթնակէտին, երբ պարախումբը կատարեց «Բերդ» պարը, ուր ծածանեցան Հայաստանի եւ Արցախի դրօշները, մինչ ժողովուրդը ջերմ բացագանչութիւններով իր զգացումները կ՚արտայայտէր։ Այս բոլորին համար գնահատանքի յատուկ խօսք կ՚երթայ ընկ. էտկար Էկեանին եւ ընկ. Աննա Պօղոսեանին, որոնք տարիներու իրենց նուիրումով յաջողած են լաւ պատրաստուած պարախումբեր պահել։
Յայտագիրը շարունակուեցաւ հայկական երգերով։ Բեմ հրաւիրուեցաւ յունական հեռատեսիլէն երգի մրցումի մասնակցող երգչուհի Արմինէ Բարիկեան, որ երգիչ ու նուագող Յովսէփ Թոփալեանի նուագակցութեամբ հմայեց ներկաները հայկական աւանդական երգացանկով մը։ Իսկապէս, Արմինէի մեկնաբանութիւնը գնահատանքի արժանի էր, որ իր խորունկ ձայնով եւ արտայայտչական երանգաւորումով գեղեցկացուց ելոյթի յայտագիրը։ Յատկշանական էր իր մենապարը Համազգայինի երկու պարողներու՝ ընկ. Մարի Տանկուրեանի եւ Սուլա Պարտաքճեանի կողքին, որոնք հեզասահ շարժումներու նրբութեան մէջ ստեղծեցին գեղեցիկ պատկեր մը։
Ապա, երգիչ Յովսէփ Թոփալեան խանդավառ երգացանկով մը ոտքի հանեց ներկայ ժողովուրդը եւ հրաւիրեց պարել հայկական շուրջպարեր, ուր մեծն ու փոքրիկը միասնաբար աւելի ջերմացուցին մթնոլորտը։
Ելոյթին համար նախատեսուած էր ճոխ ու յարգի նուէրներով վիճակահանութիւն։ Նուէրները սիրայօժար տրամադրուած էին հայրենակիցներու կողմէ։
Համազգայինի կառոյցը կարողացաւ ոգեւորութիւն պատճառող իր ելոյթով համախմբել հայրենակիցներու ստուար թիւ մը։ Գովելի էր երիտասարդ տարրի զօրաշարժը ելոյթը կատարելապէս հրամցնելու ճիգին մէջ։ Թէ՛ յայտագիրի անթերի ներկայացումով, թէ՛ ալ ընդունելութեան ու սպասարկութեան յաջող մատուցումով, Համազգայինի վարչական միաւորները ու անոնց շուրջ բոլորուած երիտասարդ խաւը յաջողապէս կազմեցին խոստումնալից ապագայի մը խորապատկերը։
Վարձքը կատար բոլորին։
