Վերջին օրերի լարուած, պայթիւնավտանգ իրավիճակը հանգուցալուծելու, երկխօսութեան հարթակ ստեղծելու Հ.Յ. Դաշնակցութեան ջանքերը երէկ յոյս էին առաջացրել, որ հնարաւոր կը լինի փոխ-զիջումային եւ կառուցողական լուծումներ գտնել: Մենք ամէն ինչ արել էինք կողմերին երկխօսութեան, բանակցութիւնների բերելու համար:
Ցաւօք, սկսած գործընթացը, բեւեռացած մօտեցումների պատճառով, այսօր տապալուեց: Բայց նոյնիսկ վերջին իրադարձութիւններից յետոյ մենք շարունակում ենք հաւատալ, որ ցանկացած փակուղային իրավիճակում կարելի է ելքեր գտնել եւ շտկել կացութիւնը:
Այս առումով կարեւոր է, որ բոլոր կողմերը հասկանան՝ յաղթողներ ու պարտուողներ չեն կարող լինել: Հասարակութեան եւ պետութեան շահերը վեր են ամէն ինչից: Կոչ ենք անում բոլորին՝ սթափ գնահատել իրավիճակը, զերծ մնալ ծայրայեղութիւններից եւ բանական ու իրատեսական լուծումներ փնտրել:
Այլ տարբերակ ուղղակի գոյութիւն չունի: Մեզ ոչ ոք հակառակը չի կարող համոզել:
Իր սկզբունքային դիրքորոշումներին հաւատարիմ՝ Դաշնակցութիւնը շարունակելու է երկխօսութեանն ուղղուած հետեւողական ջանքերը:
Հ.Յ.Դ. Հայաստանի Գերագոյն Մարմին
