Այս Կիրակի, 4 Փետրուար 2024-ին, Յունաստանի Հայ Կապոյտ Խաչի Շրջանային վարչութեան նախաձեռնութեամբ եւ Յունաստանի մէջ գործող միութիւններուն օժանդակութեամբ, դրամահաւաք-Ֆոնեթոն պիտի կատարուի, ի նպաստ արցախահայութեան։
Նոր նախաձեռնութիւն մը չէ կատարուելիք դրամահաւաքը. արդէն երեք ամիս առաջ մեկնարկած ձեռնարկ մըն է, հետեւելով Հ.Օ.Մ.-ի կողմէ ի գործ դրուած ծրագիրներուն, որոնք նպատակ ունին օգնութեան ձեռք երկարելու Արցախի հողէն արմատախիլ եղած հայութեան։ Հայ Օգնութեան Միութեան մնայուն կիզակէտը կը հանդիսանայ բռնի տեղահանուած ժողովուրդի օժանդակութեան ծրագիրը, որու ծիրէն ներս, յունահայութեան եւս կոչ կ՚ուղղուի մասնակից դառնալու կարեւոր այս ծրագիրի յաջողութեան։
Այսօր, աւելի քան երբեք, հրամայական կը դառնայ Արցախի մարտնչող ժողովուրդին օգնութեան հասնելու կարիքը։ Աւելի քան 120.000 հայրենակիցներու բռնի տեղահանումը անտարբեր չէ ձգած ոեւէ հայ, որուն գերագոյն պարտականութիւնը կը դառնայ անգամ մը եւս կանգնիլ մեր արծուաբոյնի հայութեան կողքին, նախ ամոքելու համար անոր սպիացած ցաւերը, ապա յոյսի ճամբայ ստեղծելու համար՝ վերապրումի, վերակենսաւորման ու վերադարձի յոյսի փայփայումով։
Այսօր, Հայ Օգնութեան Միութիւնը կը ներկայանայ հայութեան զանգուածներուն առջեւ յստակ եւ գործնական ծրագիրներով։ Կեդրոնական վարչութիւնը որոշած է որդեգրել Հայաստանի գիւղերուն մէջ արցախահայ ընտանիքներու բնակարաններ ապահովելու «Յոյսի օճախներ» խորագրեալ խիստ կարեւոր եւ օգտաշատ ծրագիրը։ Մինչեւ այսօր, Հ.Օ.Մ.-ը նպաստած է աւելի քան 7000 ընտանիքի։
Այս նախաձեռնութիւնը միայն մարդասիրական բնոյթի զօրաշարժ մը չէ, այլ իր մէջ կը պարփակէ ազգային նպատակ՝ արցախահայութիւնը պահելու իր սեփական հողերուն կողքին, թոյլ չտալու, որ ան ցիրուցան զանգուած մը դառնայ, այլ կազմակերպ վիճակով, ազգային մտասեւեռումներուն կառչած, իր ինքնորոշման իրաւունքի տէր ըլլալու նախանձախնդրութեամբ, ապրի ու գոյատեւէ հայկեան հողի ուժին ներգործութեան տակ։
Իսկ մենք՝ յունահայերս, իրաւունք չունինք անտես առնելու արցախահայութեան կոչերը ու անոնց սեփական պայքարի իրաւունքը։ Յունահայութիւնը երբեք անտարբեր չէ կանգնած հայ ժողովուրդի նորանոր պատմութեան տաք ու պաղ օրերուն հանդէպ։ Արցախի ազատագրական պայքարի հերոսական մարտնչումներու օրերէն, մինչեւ 2016-ի քառօրեայ պատերազմը ու անկէ ետք 2020-ին Ատրպէյճանի սանձազերծած պատերազմի հետեւանքներուն դիմաց, յունահայ գաղութը, միշտ արձագանգելով Հայ Օգնութեան Միութեան եւ Յունաստանի Հայ Կապոյտ Խաչի զօրաւոր կոչերուն, օգնութեան ձեռք երկարած է Արցախին ու անոր հերոսական ժողովուրդին, իր բախտին չթողելով հայրենի ժողովուրդի ճակատագիրն ու ապրելու վճռակամութիւնը։
Եթէ շաբաթ մը առաջ յունահայութիւնը իր բողոքի ու զօրակցութեան ձայնը միացուց «Եւրոպացիներ յանուն Արցախի» համաեւրոպական զօրաշարժին, այս անգամ, պահանջատիրական եւ ուժական քայլերուն կողքին, մեր սիրտին ու խիղճին պարտքը ընելու յարմարագոյն պահը հասած է։
Այս Կիրակի, 4 Փետրուարին, կամաւորներ հեռաձայնային կապով պիտի դիմեն բոլոր հայրենակիցներուն, որպէսզի ամէն մէկը, իր կարելիութեան սահմաններուն մէջ, սատարէ արցախահայութեան օժանդակութեան հրամայական գործին։
Այս Կիրակի, բոլորս միասին, լայն բանանք մեր սիրտերը գալիք կոչին, չզլանանք օգնութեան ձեռք երկարելու Հ.Օ.Մ-ի համահայկական ծրագիրին, ու անոր միջոցով Յունաստանի Հայ Կապոյտ Խաչի մարդասիրական մեծ ծրագիրին։
Թոյլ պիտի չտանք, որ արցախահայութեան յոյսը ի սպառ մարի։
Թոյլ պիտի չտանք, որ Ատրպէյճանի հայատեաց քաղաքականութիւնը կորստեան տանի Արցախի ժողովուրդի ապրելու վճռակամութիւնը։ Թոյլ պիտի չտանք, որ կորսուի մեր արծուաբոյնի յոյսը, անոր պատմական եւ իրաւական ժառանգութիւնը։
-Իրարու թիկունք կանգնելով եւ միասնական ճիքերով կրնանք յոյս ներշնչել հպարտ արցախահայութեան։
— Անկոտրում կամքով պիտի յաղթահարենք բոլոր դժուարութիւնները։
- Կիրակի օր, բոլորս միասին, յանուն արցախահայութեան, յանուն ազգային արժանապատուութեան։
