Շաբաթ, 30 Մարտ 2024-ին, ժամը 18:00-ին, Թեսաղոնիկէի Ս. Աստուածածին եկեղեցւոյ հոգեւոր հովիւը այցելեց Սերրեսի համայնքին։
Նկատի ունենալով, որ կը գտնուինք Մեծ Պահոց ժամանակաշրջանին մէջ, Հայր սուրբը կատարեց հսկումի արարողութիւն, ապա հոգեւոր խորհրդածութիւն։ Հոգեւոր խորհրդածութեան ընթացքին, հայր սուրբը անցնող երկու Կիրակիներուն իմաստը վերաթարմացուց հաւատացեալներուն միտքերուն մէջ, ապա մեկնաբանեց յաջորդ օրուան Աւետարանական առակին՝ «Անառակ Որդի»-ին մէջ տիրող գաղափարը: Հայ սուրբը նախ նշեց, որ այս առակը կը յիշեցնէ մեզմէ իւրաքանչիւրիս, թէ ինչպէս աշխարհիկ հաճոյքներէ կը տարուինք եւ օրէ օր կը հեռանանք Աստուծոյ խնամքէն։ Սակայն որոշ ժամանակ ետք, կ՚անդրադառնանք մեր առած սխալ որոշումներուն։ Հայր սուրբը յիշեցուց, որ այս պարագային միայն անդրադառնալը կարեւոր չէ, այլ զղջալ ու ապաշխարելն է, որ մեզ կրկին Աստուծոյ որդի ըլլալու կ՚արժանացնէ։
Ապա, շարունակելով իր խօսքը ըսաւ, որ Աստուած մեզ կը դիտէ եւ ամէն օր գրկաբաց մեզի կը սպասէ, որպէսզի մեզ ազատէ եւ նոր պատմուճանով պարուրելով՝ փրկութիւն շնորհէ մեզի, մեր մատներուն մատանի անցընելով՝ մեզ կրկին Իր որդիները կոչուելու իշխանութեան արժանացնէ, իսկ նոր կօշիկներ հագցնելով՝ մեր առջեւ նոր ճանապարհ մը պատրաստէ։ Այլ խօսքով, մեզ նոր մարդ դարձնէ։
Աստուած Հայր է բոլորին, հակառակ միւս որդիներու չկամութեան, կ’ընդունի ճշմարտապէս զղջացող որդիները եւ զանոնք կը վերահաստատէ նախկին երանութեան եւ երջանիկ իրաւունքներուն մէջ։
Արարողութենէն ետք, Սերրեսի համայնքը պատրաստած էր կոկիկ հիւրասիրութիւն։
Թղթակից
