Ընդառաջելով Հայ Յեղափոխական Դաշնակցութեան Հայ Դատի Յանձնախումբի հրաւէրին՝ Յունաստան իր այցելութեան շրջագիծէն ներս, Արցախի Հանրապետութեան Մշակոյթի, Երիտասարդութեան եւ զբօսաշրջութեան նախարար պ. Լեռնիկ Յովհաննիսեան Երեքշաբթի 19 Մարտ 2019ին, հանդիպեցաւ Աթէնքի արուարձաններէն Վիրոնայի քաղաքապետ պ. Ղրիղորիս Քաթոփոտիսի հետ:Ներկայ էր Վիրոնայի փոխ քաղաքապետ տիկին Լեմոնիա Քլոնարի, որ Մշակոյթի ու Երիտասարդութեան փոխ քաղաքապետն է։
Պրն. նախարարին կը ընկերակցէին Հ.Յ.Դ. Հայ Դատի Յանձնախումբի եւ Աթէնքի Հ.Յ.Դ. Կոմիտէի ընկերները։
Շատ բարեկամական հանդիպման ընթացքին, պրն. քաղաքապետը ընդգծեց շրջանի մէջ հայութեան երկար տարիներու աշխուժ ներկայութիւնը ու կարեւորեց համագործակցութիւնը՝ հասարակաց հարցերու կապակցութեամբ։
Պրն. Նախարարը իր կարգին, ծանօթացուց պրն. քաղաքապետին Արցախի Հանրապետութեան վերաբերեալ վերջին զարգացումներու հարցերը եւ իր երախտագիտութիւնը յայտնեց Վիրոնայի քաղաքապետարանի եւ անձնապէս քաղաքապետի աջակցութեան՝ Արցախի ժողովուրդի ինքնորոշման իրաւունքի պայքարին:
Յունական մամուլի անդրադարձ
Արցախի նախարարի Յունաստան այցելութեան առիթով, հարցազրոյցներ եւ մամլոյ յայտարարութիւններ տրուեցան հելլէն եւ օտար մամուլի ու հեռատեսիլի մի քանի խմբագիրներու մօտ, որոնք լոյս պիտի տեսնեն յառաջիկայ օրերուն ընթացքին։
Այս Կիրակի 24 Մարտին նախատեսուած է փրոֆ. Խրիսթոտուլոս Եալուրիտիսի կողմէ Արցախին նուիրուած յօդուած, «Էլէֆթէրոս Թիփոս» թերթին մէջ։
Նոյնպէս, հարցազրոյց մը տրուած է FreedomTV.gr համացանցային հեռատեսիլին, որ շուտով տեղադրուած կ’ըլլայ իրենց կայքէջին մէջ։
