Ռուս-իսրայէլացի պլոկըր Ալեքսանտր Լափշին յայտնեց, որ իր ձերբակալութեան համար Ատրպէյճան ծախսած է մէկ միլիառ տոլար: Այս մասին պլոկըրը գրած է իր դիմատետրի էջին վրայ: «Դժուար է այս բոլորը արտայայտել գումարի յստակ չափով: Կը համարձակիմ ենթադրելու, որ Պաքուի բանտին մէջ իմ մնալուն համար ատրպէյճանցի ժողովուրդը վճարած է ոչ պակաս, քան 1 միլիառ տոլար: Որպէսզի հասկնաք, թէ ի՛նչ է մէկ միլիառ տոլարը Ատրպէյճանի համար, կ՛ըսեմ, որ միջին աշխատավարձը Պաքուի մէջ չի գերազանցեր ամսական 300 տոլարը, իսկ շրջաններու մէջ՝ 200 տոլարը: Կենսաթոշակները առնուազն 100 տոլար կը կազմեն»,- կը գրէ Լափշին: Պլոկըրը կը յայտնէ, որ այդ գումարով անոնք կրնային կացարաններ կառուցել Ղարաբաղէն փախստականներու համար, որոնք աղքատութեան մէջ կ՛ապրին: Լափշին կը գրէ, որ իր հետ կապուած պատմութեան պատճառով, անշուշտ, ոչ ոք չխզեց Պաքուի հետ իր դիւանագիտական յարաբերութիւնները, պատժամիջոցներ չսահմանեց եւ չդադրեցուց զէնք վաճառելը, սակայն «անուղղակի վնասը, կը կարծեմ, հսկայական է եւ ակնյայտօրէն չի համապատասխաներ իմ անձին նկատմամբ վնասի տարողութեան»: Ըստ անոր՝ Ռուսիոյ նախագահ Փութին այն մարդը չէր, որ կը հանդուրժէր իր նկատմամբ Ատրպէյճանի արհամարհանքը, եւ անմիջապէս դադրեցուց իր տարածքին մէջ չափազանց ազդեցիկ «Համառուսական-ատրպէյճանական քոնկրէսի» գործունէութիւնը:
«Ակնյայտօրէն, իմ պատմութիւնը շատ զբօսաշրջիկներ ետ կանգնեցուց Ատրպէյճան այցելելու միտքէն: Եւ երբեք կարելի չէ գիտնալ, թէ որքանո՞վ. կրնայ ըլլալ ընդամէնը հազար, կամ հարիւր հազար: Բայց այս մէկը նոյնպէս միլիոնաւոր տոլարի վնաս է: Հինգ միլիոն, թէ քսան՝ այդ գումարներով անոնք կրնային փոքր թաղամաս կառուցել աղքատութեան մէջ ապրող Ղարաբաղէն փախստականներուն համար»,- կը գրէ Լափշին:
