«Արեւմտահայոց Ազգային Համագումար» միջազգային ոչ-կառավարական կազմակերպութեան համանախագահ Արագած Ախոյեանի նախաձեռնութեամբ՝ ճանաչողական այցով Արցախ այցելած խումբ մը թուրք հասարակական-քաղաքական եւ մշակութային գործիչներ, Սեպտեմբեր 25ի, Ստեփանակերտի մէջ հանդէս եկած են մամլոյ ասուլիսով:
«Արցախփրես»ի հաղորդմամբ` թրքական Կանաչներու եւ Ձախակողմեաններու կուսակցութեան հիմնադիր անդամ, «Անգարայի մտքի հարթակ» հասարակական կազմակերպութեան ղեկավար, Թուրքիոյ 23րդ գումարման խորհրդարանի պատգամաւոր Ուֆուք Ուրաս ըսած է, որ իրենք շատ տպաւորուած են Արցախ այցելութենէն եւ իրենց ստացած ջերմ վերաբերմունքէն:
Անոր խօսքով` իրենք կողմ են, որպէսզի Թուրքիան առերեսուի իր պատմութեան հետ եւ ճանչնայ Հայոց Ցեղասպանութիւնը, իսկ ատրպէյճանական-ղարաբաղեան հակամարտութիւնը խաղաղ լուծում ունենայ:
«Միջազգային իրաւունքի տեսանկիւնէ օրէնք կայ. ով սեղանին չի նստիր, ան իրաւացի չէ: Պէտք է նախ եւ առաջ մէկ կողմ ձգել` ո՛վ է իրաւացի եւ ո՛վ ոչ հարցը, ու ընդհանուր սեղանի շուրջ նստիլ` խօսելու եւ լուծումներ գտնելու համար»,- ըսած է Ուֆուք Ուրաս եւ աւելցուցած, որ Արցախի մէջ պաշտօնատարներու կողմէ հնչեցուած այն միտքը, որ հարցերը պէտք է խաղաղութեամբ լուծուին եւ ոչ թէ պատերազմով, այս առումով յուսադրող է իրենց համար:
Ըստ թուրք գործիչին, հասարակութիւնները ընդհանրապէս հակուած են միայն իրենց ցաւը տեսնելու, եւ շատ ժամանակ այդ ցաւերը մրցակցութեան մէջ կը դնեն: «Մենք պէտք է հասկնանք, որ ատոնք մեր ընդհանուր ցաւն են եւ այդ տեսանկիւնէ մօտենանք հարցերուն: Մենք թրքական հասարակութեան մէջ լուսաւորելու, տեղեկացնելու այդ գործառոյթը կը կատարենք եւ պիտի փորձենք այս այցէն ետք եւս մեր տպաւորութիւնները փոխանցել թուրք հանրութեան»,- ըսած է ան:
«Արցախփրես»ի այն հարցադրման, թէ Արցախ այցելելէ ետք արդեօք չե՞ն վախնար Ատրպէյճանի «սեւ ցուցակ»ին վրայ յայտնուելէ՝ Ուրաս պատասխանած է ասացուածքով. «Ան ով անձրեւի տակ կը մտնէ, երբեք պէտք չէ վախնայ թրջուելէ»: «Չեմ գիտեր` մեր այցը քաղաքական ի՛նչ հետեւանքներ պիտի ունենայ Պաքուի մէջ, որովհետեւ գիտենք, որ հոն բողոքի ալիքը մեծ է այս առումով, բայց կ՛ուզենք յայտնել, որ սա նաեւ իրենց համար է: Մենք խաղաղութիւն կ՛ուզենք. ատոր համար ալ այցելեցինք Արցախ»,- ըսած է թուրք քաղաքական գործիչը:
Իսկ գրող, հասարակական գործիչ Սայիտ Չէքինօղլու նշած է, որ ինք կու գայ այնպիսի տարածքէ մը, ուր տարիներ շարունակ ցեղասպանութիւն գործուած է հայերու, Պոնտոսի յոյներու եւ ասորիներու նկատմամբ: «Ես ցեղասպանագէտ եմ, իրաւապաշտպան եւ, հոս գալով, յանգեցայ այն եզրակացութեան, որ Ցեղասպանութեան հարցի եւ Արցախի հիմնախնդրի միջեւ ինչ-որ ընդհանուր կապ կայ»,- ըսած է Ս. Չէքինօղլու: Անդրադառնալով Հայոց Ցեղասպանութեան խնդիրին` թուրք մտաւորականը դիտել տուաւ, որ Օսմանեան Թուրքիոյ դաշնակիցներ Գերմանիան եւ Աւստրիան, որոնք ժամանակին իրենց մեղքի բաժինը ունեցած են հայերու նկատմամբ իրականացուած յանցագործութիւններուն մէջ, պաշտօնապէս ճանչցած են Հայոց Ցեղասպանութիւնը, սակայն ժամանակակից Թուրքիան կը շարունակէ զայն մերժել, ինչ որ կը դժուարացնէ հայ-թրքական յարաբերութիւններու վերականգնումը:
