«Ռոյթըրզ».- Թուրքիոյ իշխանութիւնները Ապրիլ 29ին աւելի քան 3900 պետական պաշտօնեաներ հեռացուցած են քաղաքացիական ծառայութենէ, բանակի եւ զինուորական ոստիկանութեան մարզերէ, ինչ որ անցեալ Յուլիս 15ի զինուորական յեղաշրջման փորձէն ետք տեղի ունեցած նորագոյն լայնածաւալ «մաքրագործում»ն է: Պաշտօնազուրկ եղածները կ՛ամբաստանուին «ահաբեկչական կազմակերպութիւններու հետ առնչութիւն ունենալու եւ ազգային ապահովութեան վտանգ ներկայացնելու» յանցանքներով։
Նշենք, որ յեղաշրջման փորձէն ի վեր, աւելի քան 120.000 հոգի պաշտօնազրկուած է, իսկ աւելի քան 40.000 անձ՝ ձերբակալուած:
Ապրիլ 29ին Թուրքիոյ մէջ արգիլուեցաւ նաեւ «Ուիքիփիտիա» համացանցային հանրագիտարանը։ Արգիլումը կատարուեցաւ հիմնուելով թիւ 5651 օրէնքին վրայ, որ կը վերաբերի համացանցի կարգաւորման եւ տուեալ մարզին մէջ կատարուած յանցագործութիւններու դէմ պայքարին: Թուրք պաշտօնատարներ այդ կայքի ղեկավարութեան փոխանցած են, թէ որոշումը «Թուրքիոյ վարկին վրայ բացասական ազդեցութիւն ձգող հրապարակումներու»ն կապուած է, քննադատելով յատկապէս ահաբեկչական կազմակերպութիւններու եւ Անգարայի միջեւ կապերուն մասին հրապարակումները։ Յիշեցնենք, որ սահմանադրական փոփոխութիւններու հանրաքուէէն ետք, այդ հանրագիտարանի կայքին վրայ Էրտողան բռնապետ որակուած էր կարգ մը հեղինակներու կողմէ։ «Ուիքիփիտիա»ի հիմնադիր Ճիմի Ուէյլզ, հակադարձելով արգիլման որոշումին՝ գրած է.- «Տեղեկութեան հասանելիութիւն ունենալը մարդկային հիմնարար իրաւունք է: Ո՛վ թուրք ժողովուրդ, այս իրաւունքին համար պայքարին մէջ միշտ պիտի ըլլանք քու կողքիդ»:
Թուրքիա անցեալին ժամանակաւորապէս արգիլած էր նաեւ ընկերային ցանցեր, ինչպէս՝ «Ֆէյսպուք» եւ «Թուիթըր»:
