Թուրքիա «Fatih» եւ «Yavuz» անունով հորատող նաւերը Կիպրոսի ափամերձ ծովը ուղարկելէ յետոյ, այժմ 3րդ հորատող նաւը այնտեղ ուղարկելու ընթացքին մէջ է: Այս մասին կը յայտնէ BBCի թրքական ծառայութիւնը՝ յղում ընելով անգլիական «Times» թերթին: Լուրը կը հաղորդէ «Էրմէնիհապէր»ը։ Կը նշուի, որ անգլիական թերթը Թուրքիոյ այս քայլը բնորոշած է որպէս Եւրոպական միութեան ուղղուած մարտահրաւէր՝ հակառակ Պրիւքսելի բազմաթիւ զգուշացումներուն: «Յանդուգն Թուրքիան 3րդ հորատող նաւը կը տեղակայէ Միջերկրական ծովին մէջ» վերնագրով յօդուածին մէջ նշուած է, որ Անգարան բանակցութիւններ կը վարէ 3րդ հորատող նաւը ձեռք բերելու նպատակով: Բանակցութիւններ կ՚ընթանան նաեւ Նորվեկիոյ հետ. այդ երկրէն Թուրքիա արդէն գնած է առաջին 2 հորատող նաւերը: Թերթը անդրադարձած է նաեւ 27 Նոյեմբերի Թուրքիոյ ու Լիպիայի միջեւ Միջերկրական ծովի արեւելեան մասէն ներս բացառիկ տնտեսական գօտի ստեղծելու ու երկու երկիրներուն համար անոր սահմանները որոշելու նպատակով կնքուած համաձանագիրին: Հեղինակը նշած է, որ Յունաստանի շահերուն հակասող համաձայնագիրը հանդիպած է Աթէնքի քննադատութեան ու դատապարտումին:
Իտալական ռազմանաւ Կիպրոսի շուրջ.
«մենք պատրաստ ենք», կ՚ըսէ Իտալիա
«Իտալիա ռազմանաւ մը ղրկած է Կիպրոսի մօտ, իր ազգային շահերը պաշտպանելու համար», կը գրէ իտալական «Լա Ռեփուպլիքա» թերթը, աւելցնելով, որ նաւը անցեալ Ուրբաթ հասաւ Կիպրոս։ Թերթը կը յիշեցնէ, թէ Հոկտեմբերին Թուրքիա վերսկսաւ հորատումներու աշխատանքները Կիպրոսի ափամերձ ծովերուն մէջ, տարածութեան մը վրայ, որ արդէն կապտուած է ֆրանսական «Total» եւ իտալական «Eni» ընկերութիւններուն կողմէ։ Իտալական «Martinego» ռազմանաւը անցեալ Ուրբաթ հասաւ Լառնաքայի նաւահանգիստը եւ շրջագայութիւններ կը կատարէ արեւելեան Միջերկրականի մէջ, «նպատակ ունենալով հսկել ծովային շրջանները, յարգելու համար միջազգային օրէնքները եւ պաշտպանելու համար ազգային շահերը», կը նշուի Իտալիոյ կողմէ հրապարակուած պաշտօնական հաղորդագրութեան մէջ։ «Յաջորդ օրերուն, «Martinego» ռազմանաւը պիտի մասնակցի Յունաստանի եւ Կիպրոսի միացեալ ռազմափորձերուն», կը նշէ թերթը։ «Անգարային ղրկուած պատգամը յստակ է. եթէ պէտք պիտի ըլլայ մեր դրօշը ցոյց տալ, մենք պատրաստ ենք», կ՚ընդգծէ իտալական թերթը։
