Քսանթիի Թաղային խորհուրդը նախաձեռնութիւնը ունեցաւ դիմելու տեղւոյն քաղաքապետութեան, որպէսզի Թեսաղոնիկէի «Համազգային»ի «Մասիս» պարախումբը ելոյթ մը ունենայ քաղաքի շարք մը ձեռնարկներու ծիրէն ներս բարեկենդանի առթիւ՝ առաջարկ մը մը, որ սիրով ընդունուեցաւ քաղաքապետարանէն եւ Շաբաթ՝ 15 Փետրուարի երեկոյեան վայելեցինք «Մասիս» պարախումբի համերգը, ինչպէս նաեւ 400է աւելի յոյն ժողովուրդի ներկայութիւնը, որոնք խանդավարութեամբ հետեւեցան ձեռնարկին եւ որոնց գոհունակութիւնը յայտնի էր անոր աւարտին:
«Մասիս» պարախումբը ներկայացուց 10 պարեր սքանչելի պարագրութիւններով՝ Ռաֆայէլ Վարդազարեանի պարուսուցութեամբ: Ներկայ էին քաղաքի փոխ քաղաքապետը, քաղաքապետարանի անդամներ, շրջանիս հոգեւոր հովիւ Արտաւազդ վրդ. Շարոյեան, կառոյցներու ներկայացուցիչներ եւ մեծ թիւով հայրենակիցներ:
Համերգի բացումը կատարեց պարախումբի անդամ Վահէ Երիջեան եւ ներկայացուց մէկ առ մէկ պարերը, բացատրելով իւրաքանչիւրին պատմութիւնը: Նաեւ ան զանազան տեղեկութիւններ տուաւ հայկական աւանդութիւններու, ինչպէս Հայաստանի նաեւ պատմական մասերուն շուրջ։
Պարերուն միջեւ, իր անուշ ձայնով մեներգեց երիտասարդ Մարիա Սփիրիտոնիտու, կիթառի ընկերակցութեամբ՝ Ռաֆայէլ Վարդազարեանի, Ան ներկայացուցւ ծանօթ երգեր, ինչպէս՝ «Կիլիկիա», «Պինկէօլ», «Փրոսֆիղաքի», «Կրունկ» եւ «Տուն իմ հայրենի»: Փակման խօսքը կատարեց Թաղային խորհուրդի ատենապետ պրն. Թագւոր Գարաօղլանեան, շնորհաւորելով բոլորը այս գեղեցիկ երեկոյին համար:
Ելոյթէն ետք, ի պատիւ պարախումբին Թաղային խորհուրդը, Հայ Գթութեան Խաչի անդամուհիներու օգնութեամբ, կազմակերպեց հիւրասիրութիւն ազգապատկան սրահէն ներս, ուր ժողովուրդը եւ պարախումբի անդամները հաճելի ժամեր վայելեցին երգերով ու պարերով:
Զ. Ա.
