Տնօրինութեամբ Թեմակալ Առաջնորդ Գեղամ արք. Խաչերեանի եւ ընդառաջելով Սէրրէսի Թաղային խորհուրդի փափաքին, Թեսաղոնիկէի «Ս. Աստուածածին» եկեղեցւոյ հոգեւոր հովիւ Ստեփանոս վրդ. Փաշայեան, սկսած է հերթական այցելութիւններ կատարել Սէրրէսի մօտակայ շրջանի հայ համայնքին մօտ եւ յանձն առած է համայնքի հոգեւոր եւ ազգային կարիքներուն համար զբաղելու պարտականութիւնը։
Այսպէս, 19 Հոկտեմբեր 2019ի երեկոյեան, հայր սուրբը հանդիպում մը ունեցաւ Սէրրէսի համայնքի ժողովուրդին հետ եւ հոգեւոր աշխատանքներու ծրագիրները ներկայացուց։ Ան, առաջին հերթին, իր շնորհակալութիւնը յայտնեց շրջանի Թաղական խորհուրդին գեղեցիկ մտայղցումին համար, ապա ծանօթացաւ բոլոր ներկաներուն հետ, փափաք յայտնեց յաջորդական այցելութեամբ իւրաքանչիւրին տունը այցելել եւ օրհնել, խորհուրդներու վերաբերեալ (մկրտութիւն, պսակ, թաղում, եւայլն) մատնանշեց հայկական աւանդութիւնները եւ սրբութիւնները հետեւելու կարեւորութիւնը, ընդգծեց դպրաց դաս յառաջացնելու ծրագիրը, որպէսզի Ս. պատարագի երգեցողութիւնը միանուագ եւ միաշունչ կերպով կատարուի, ինչպէս նաեւ խնդրեց Սէրրէսի հայութեան մարդահամարը ունենալ։ Առաջին հանդիպումին, հայր սուրբի ղեկավարութեամբ կատարուեցաւ տէրունական «Հայր Մեր»ի Եկմալեան տարբերակը սորվելու փորձը։ Աւարտին, ան գօտեպնդեց ու ոգեշնչեց բոլորին, միասնաբար աշխատելու եւ բարձր յանձնառութեամբ շրջանը ծաղկեցնելու համար։
Սէրրէսի Թաղական Խորհուրդն ու ներկաները բարձր տրամադրութեամբ իրենց խորին շնորհակալութիւնը յայտնեցին Առաջնորդ Սրբազան հօր եւ հայր սուրբին՝ համայնքի հոգեւոր կեանքը կազմակերպելու եւ ճիշդ հունի մէջ դնելու կարեւոր գործունէութեան համար։
Տեղի ունեցաւ պատշաճ հիւրասիրութիւն եւ որոշուեցաւ, որ յաջորդ հանդիպումը նկատի ունենալ Շաբաթ՝ 30 Նոյեմբերին համար։
Թղթակից
