Քաղաքական կեդրոնական ձեռնարկ
Հ.Յ.Դ. Հայ դատի յանձնախումբի եւ Թեսաղոնիկէի մարզպետարանի համակազմակերպութեամբ, Կիրակի, 23 Ապրիլին, քաղաքի Զինուորական սրահին մէջ տեղի ունեցաւ քաղաքական կեդրոնական ձեռնարկ, ներկայութեամբ շրջանիս հոգեւոր հովիւ Եղիա աբղ. Մալխասեանին, Թաղային խորհուրդի ատենապետ Արթին Աբրահամեանի, Ազգ. կառոյցներու եւ հաստատութիւններու, միութիւններու, ինչպէս նաեւ յոյն հոգեւոր, քաղաքական եւ պետական անձնաւորութիւններու, յոյն ու հայ ժողովուրդի ներկայութեան:
Ձեռնարկի բացման խօսքը կատարուեցաւ Հ.Յ.Դ. Երիտ. միութեան անդամուհի Ալէքսիա Ռաֆաիլիտուի կողմէ: Ապա հրաւիրուեցան քաղաքական եւ պետական անձնաւորութիւնները ու իրենց ողջոյնի խօսքը փոխանցեցին ներկաներուն:
Մշակութային ծիրէն ներս, հանդէս եկաւ Գալամարիայի երգչախումբը, ղեկավարութեամբ Եաննիս Քուքասի, որ մեր ժողովուրդին հրամցուց «Կոմիտասեան» պատարագի նմուշներ:
Ձեռնարկին բանախօսեց Թրակիոյ «Տիմոքրիթիօ» համալսարանի դասախօս տքթ. Եաքովոս Աքծօղլու: Ան մանրամասնօրէն խօսեցաւ Հայոց ցեղասպանութեան, հայոց չարչարանքներուն ու տարապանքներուն մասին:
Ելոյթէն անմիջապէս ետք, բոլոր ներկաները, քաղաքական եւ պետական անձնաւորութիւնները թափօր կազմած քայլարշաւ կատարեցին դէպի Երրորդ զօրաբանակի Անծանօթ զինուորի յուշարձանը՝ ծաղկեպսակներ զետեղելու համար: Ելոյթը եզրափակուեցաւ Հայաստանի եւ Յունաստանի հանրապետութիւններու ազգային քայլերգներու կատարումով:
Բարեխօսական կարգ Ս. Աստուածածին եկեղեցւոյ մէջ
Երկուշաբթի, 24 Ապրիլ 2023-ի առաւօտեան ժամը 11:30-ին, Թեսաղոնիկէի Ս. Աստուածածին եկեղեցւոյ մէջ կատարուեցաւ Հայոց Ցեղասպանութեան սրբադասուած նահատակներուն Բարեխօսական կարգը, հանդիսապետութեամբ շրջանիս հոգեւոր հովիւ Եղիա Աբղ. Մալխասեանի, ներկայութեամբ Հ.Յ.Դ. Յունաստանի Կեդրոնական կոմիտէի անդամ ընկ. Կարօ Նատեանի, Թաղային խորհուրդի ատենապետ Արթին Աբրահամեանի եւ անդամներուն, Հ.Յ.Դ. Հայ դատի յանձնախումբին, ազգ. հաստատութիւններու եւ կառոյցներու ներկայացուցիչներուն, պետական, զինուորական, քաղաքական բարձրաստիճան անձնաւորութիւններու, երեսփոխաններու ինչպէս նաեւ հաւատացեալներու:
Նշենք, որ եկեղեցւոյ կեդրոնը զետեղուած էր Ապրիլեան Ս. նահատակներու նուիրուած փայտեայ շարժուն յուշարձանը, Ցեղասպանութեան նահատակներու մասունքներով, ինչպէս նաեւ Թաղային խորհուրդին կողմէ զարդարուած ծաղիկներով:
Եկեղեցական գոհաբանական արարողութեան աւարտին, շրջանիս հոգեւոր հովիւը փոխանցեց իր խօսքը, ապա բարձրաստիճան անձնաւորութիւնները, իրենց կարգին, մեր ժողովուրդին փոխանցեցին իրենց սրտի խօսքը:
Ժողովրդային բողոքի ցոյց դէպի թրքական հիւպատոսարան
Կազմակերպութեամբ Հ.Յ.Դ. երիտասարդական միութեան Թեսաղոնիկէի «Ս. Թեհլիրեան» խումբին, Երկուշաբթի, 24 Ապրիլ 2023-ի երեկոյեան ժամը 17:30-էն սկսեալ «Արիստոտելուս» հրապարակին առջեւ տեղադրուած Երիտասարդականի տաղաւարէն ընթացք առաւ ժողովրդային բողոքի ցոյցը դէպի Թեսաղոնիկէի թրքական հիւպատոսարան, ներկայութեամբ հարիւրաւոր թեսաղոնիկահայ պատանիներու, երիտասարդներու, փոքրերու եւ տարէցներու, որոնք ներկայ եղան հայրենասիրական ոգիով եւ պատրաստակամ ուղղուելու տրամադրուածութեամբ:
Նշենք, որ Երեքշաբթի, 18 Ապրիլէն մինչեւ Երեքշաբթի, 25 Ապրիլ 2023, Արիստոտելեան հրապարակին առջեւ տեղադրուած էր Երիտասարդականի տաղաւարը, ուր մեր երիտասարդները անցորդներուն՝ հայ թէ յոյն, ու մանաւանդ օտարներուն, տեղեկութիւններ փոխանցեցին Հայ դատի վերաբերեալ, մասնաւորաբար Հայոց ցեղասպանութեան ճշմարտութեանց կապակցութեամբ:
Երեկոյեան ժամը 06:30-ին ընթացք առաւ բողոքի ցոյցը, շարքերու խմբուածութեամբ, մեր երիտասարդներու ճշդապահ կարգապահութեամբ եւ բարձրախօսներու ու մանաւանդ օրուան կարգախօսները պարզող ցուցապաստառներու եւ ցուցատախտակներու կողքին՝ եռագոյն դրօշով։ Թեսաղոնիկահայութիւնը իր բողոքի ցասումը յայտնեց ամբողջ տեւողութեան: Բնականաբար, ճամբու ընթացքին, ապահովութեան ոստիկաններ հսկեցին ներկաներուն քայլերթին եւ օգտակար դարձան ճամբորդներուն՝ ուղղուելու տարբեր ճանապարհներով: Երբ բողոքի ցուցարարները մօտեցան թրքական հիւպատոսարան, այս անգամ եւս՝ ինչպէս միշտ, յոյն ոստիկաններ արգելք հանդիսացան յառաջանալու դէպի հիւպատոսարանի փողոցը, հետեւաբար, չարտօնեցին նաեւ, որ ցոյցը ներկայացնող պատասխանատուներու պատուիրակութիւնը մօտենայ ու յանձնէ յուշագիրը, այլ՝ թելադրեցին պատի մը վրայ փակցնել հայութեան պահանջները: Ցուցարարները աւելի բարձրաձայն հնչեցուցին արդարութեան ձայնի պահանջները: Ի վերջոյ, երիտասարդները յունարէն լեզուով խօսք առին եւ ոգեշունչ ու խրախուսիչ պատգամներով յորդորեցին բոլորին, վճռակամ քայլերով շարունակելու մեր երթը, յանուն արդարութեան, յանուն պահանջատէր մեր ժողովուրդի զաւակներուն ու մանաւանդ յանուն մեր Ս. Նահատակներու թափած արիւնի ամէն մէկ կաթիլին փոխարէն:
Բողոքի ցոյցը եզրափակուեցաւ Հայաստանի եւ Յունաստանի հանրապետութիւններու ազգային քայլերգներով:
ԹՂԹԱԿԻՑ
