Ուրբաթ՝ 8 Հոկտեմբեր 2021-ին, Հայ Կապոյտ Խաչի Գոքինիոյ «Զաւարեան» ազգ. վարժարանի տնօրէնութեան նախաձեռնութեամբ, նշուեցաւ թարգմանչաց Սուրբ վարդապետաց տօնը։ Հարկ է նշել, թէ քորոնա համաճարակէն յառաջացած առողջապահական պատճառներով, Յունաստանի Հայոց Թեմի Կրօնական ժողովի որոշումով, սոյն տօնը այս տարի նշուեցաւ Կիրակի օր Ս. պատարագի ընթացքին։ Տնօրէնութեան հրաւէրով եւ Թեմակալ Առաջնորդ Սրբազան հօր տնօրինութեամբ, Գոքինիոյ հոգեւոր հովիւ Տ. Պարէտ քհնյ. Խաչերեան, առաւօտեան ժամը 10:00-ին, վարժարանի սրահին մէջ 5-րդ եւ 6-րդ դասարաններու աշակերտութեան հետ ունեցաւ մօտ մէկ ժամուան տեւողութեամբ շահեկան ու հետարքրական զրոյց մը։
Տնօրէնուհի տիկ. Հայկան Մինասեանի բացման ու բարի գալստեան խօսքէն ետք, Պարէտ քահանայ հայրը նախ ընթերցեց Յունաստանի հայոց Թեմի Առաջնորդ Գեղամ Ս. Արք. Խաչերեանի, ազգային վարժարաններու տնօրէնութեան, ուսուցչական կազմին եւ յատկապէս աշակերտութեան ուղղած թարգմանչաց տօնի յատուկ պատգամը։
Սրբազան հայրը, փոքրիկներուն համար մատչելի լեզուով ընդգծեց հետեւեալները։
«Ինչու՞ համար այդքան տարիներ յետոյ տակաւին մենք հայերս շատ մեծ ուրախութեամբ եւ կարեւորութեամբ կը տօնենք հայերէն գիրերու այս տօնը։ Ամէն տարի անպայման բոլոր հայկական դպրոցներուն մէջ այս տօնը մեծ կարեւորութեամբ կը յիշատակենք, հայկական դպրոցի ուսուցիչները աշակերտներուն կը պատմեն, կը բացատրեն Ս. Մեսրոպ Մաշտոցին ըրած այս կարեւոր յաջողութիւնը։
Որովտետեւ Ս. Մեսրոպ Մաշտոց նախ եւ առաջ հայկական դպրոցներ շինեց եւ բացաւ, ձեր այս դպրոցին պէս եւ հայ պզտիկները սկսան հայկական դպրոց եւ երթալ եւ հայերէն լեզու սորվիլ, հայոց պատմութիւն սորվիլ։ Եւ ոչ միայն Հայաստանի մէջ սկսան հայկական դպրոցներ բացուիլ, այլ այն բոլոր երկիրներուն մէջ ուր հայեր կ՚ապրին, ինչպէս դուք կ՚ապրիք Յունաստանի մէջ, ուրիշ պզտիկներ Եւրոպայի մէջ եւ աշխարհի բոլոր կողմերը։
Ինչպէս որ յոյները ունին Մեծն Ալեքսանտրը (Մեղալեքսանտրոն), այնպէս ալ հայերը ունին Ս. Մաշտոցը։ Այն տարբերութեամբ սակայն, որ Մեծն Ալեքսանտր իր զօրութիւնը, ուժը ունէր իր զինուորական բանակներուն եւ զէնքներուն մէջ, իսկ Ս. Մեսրոպ Մաշտոց իր ուժը մինչեւ այսօր ալ ունի հայերէն գիրերու այբուբէնին մէջ, քանի որ հայ ժողովուրդին ուժը իր հայերէն լեզուն է եւ 1615 տարիներէ ի վեր հայ ժողովուրդը գոյութիւն ունի, կ՚ապրի շնորհիւ իր հայերէն լեզուին։ Քանի որ ամէն մէկ հայ աշակերտ Ս. Մեսրոպ Մաշտոցի քաջ զինուոր է»։
Յաջորդաբար, Տէր հայրը ներկայացուց թարգմանչաց տօնի պատմականը եւ կատարեց արժեւորումը։ Քահանայ հայրը իր խօսքին մէջ յատուկ շեշտը դրաւ ինքնութեան ու պատկանելիութեան կարեւոր կէտերուն վրայ։ Ան յայտնեց, թէ անուն ու մականունին, հայրենիքին ու կրօնքին կողքին, մայրենի լեզուն՝ հայերէնը, իւրաքանչիւր հայու գոյութեան հիմերէն ու գոյատեւման միջոցներէն մին կը հանդիսանայ։
Ան յատուկ կերպով անդրադարձաւ նաեւ Առաջնորդ Սրբազան հօր ուղղած պատգամի կարեւորութեան ու իմաստին։ Առաջնորդ Սրբազան Հայրը, թարգմանչաց տօնը կը կոչէ իւրաքանչիւր հայու եւ ի մասնաւորի իւրաքանչիւր հայ աշակերտին տօնը։ Նորանոր հայ սերունդներ պատրաստելու սրբազան առաքելութեան մէջ, հայերէն լեզուն կը հանդիսանայ որպէս անփոխարինելի արժէք եւ հիմնական պայման։
Զրոյցի ընթացքին, քահանայ հայրը աշակերտներուն լայն առիթը ընծայեց տօնին կապակցութեամբ իրենց հարցումները ուղղելու, ինչպէս նաեւ իրենց կարծիքներն ու տպաւորութիւնները արտայայտելու։ Եւ հարկ է նշել, թէ սոյն պահը մեծ հետաքրքրութիւն ստեղծեց անոնց մօտ։
Աւարտին, աշակերտները ծափահարութեամբ շնորհակալութիւն յայտնեցին քահանայ հօր ու անցան իրենց դասարանները։
Թարգմանչաց Սուրբ վարդապետաց տօնի ծիրէն ներս, Երեքշաբթի՝ 12 Հոկտեմբեր 2021-ի առաւօտեան ժամը 11։00-ին, Գոքինիոյ «Զաւարեան» ազգ. վարժարանի մանկապարտէզի աշակերտները, Ս. Յակոբ եկեղեցւոյ բակին մէջ երգեցին տօնին նուիրուած «ԱԲԳ» երգը, պատրաստութեամբ մանկապարտիզպանուհի տիկ. Անի Աբիկեանի։ Աւարտին, Պարէտ քհնյ. Խաչերեան մեծապէս գնահատեց ու քաջալերեց փոքրիկները։
ԹՂԹԱԿԻՑ
