Շատ սիրելի հաւատացեալներ,
«… 1923 թուականի Մարտ 19-ի առաւօտեան՝ հայեացքս յուզմունքով լի կը հանգչէր Բիրէայի հոյակերտ եկեղեցիներու վրայ…։ Ուրախութիւնս այնքան մեծ էր, որ նոյնիսկ նաւավարները, որոնք իրականին բաւական անփափկանկատ էին, ինծի մեծապէս համակրելի կը թուէին, քանի որ այդ վայրկեանին անոնց մէջ միմիայն Քրիստոսի արիւնով փրկուած եւ մկրտութեան աւազանին մէջ վերածնած եղբայրներ կը տեսնէի։
Հետս ունէի Ուղղափառ Պատրիարքարանի եւ Կոստանդնուպոլսոյ մէջ Յունական Ներկայացուցչութեան կողմէ ստացած յանձնարարական նամակներ…։
… Մարտ 28-ի առաւօտեան Քորֆու նաւահանգիստը կը գտնուէի եւ դադարի չորս ժամերը ուզեցի տրամադրել Սուրբ Պատարագ մատուցանելու…։
… «Թանկագին Հայր Կիւրեղ», բացականչեց, «աստուածային նախախնամութիւնն է, որ Ձեզ հոս ուղղարկած է։ Այս կղզիին վրայ հազարաւոր հայ փախստականներ կան, որոնք կարիքը ունին Ձեր հոգատարութեան։ Չեմ կրնար թոյլատրել որ մեկնիք։ Իմ պատուոյ հիւրս պիտի ըլլաք։
Քորֆուի մէջ ապաստան գտած էին մօտաւորապէս յիսուն հազար յոյն եւ տասը հազար հայ փախստականներ։ Անոնց տխուր ճակատագիրը կապուած է 1922 թուականին Անատոլուի մէջ յոյներու կրած պարտութեան։
… Մեր փախստականներուն միւս դժգոհութիւնը ազգային դպրոցներու բացակայութիւնն էր, ուր կարենային ուսման ղրկել իրենց զաւակները։ Դժգոհ էին նաեւ որբանոցներու մէջ կրօնական դասաւանդութեան բացակայութենէն։ … Գերպ. Պրինտիզի …յորդորեց զիս անմիջապէս բանալ դպրոց մը …։
… Մեր դպրոցը անուանակոչեցինք «Արարատեան Վարժարան» եւ արձանագրութիւններուն սկսանք Ապրիլ 17-ին։ Նոյն Ապրիլ 19-ին սկիզբ տուինք դասաւանդութեան հարիւր քսանհինք աշակերտներով։
… Հոկտեմբերին (1923) Իշխան Քիճին, ինծի յանձնեց Գերապայծար Ճոպպէի ինծի ուղղած նամակը, ուր ինծի կը ներկայացնէր Իշխան Քիճին եւ կ՚ըսէր որ Սրբազան Ժողովը, տեղեակ ըլլալով հանդերձ բազմատեսակ գործունէութիւններուս, որոնք բոլորն ալ օգտակար են Աստուծոյ Արքայութեան տարածման համար, պատշաճ նկատած էր ինծի յանձնել այս նոր պարտականութիւնը եւս ըլլալու Մալթայի Ասպետներուն որակեալ խորհրդականն ու գործակիցը, այն առատաձեռն օգնութեան բաշխումի գործին որ իտալական կառավարութիւնը յատկացուցած էր ի նպաստ Յունաստանի հայ փախստականներուն։ Կը յորդորէր ընդունիլ առաջարկուած պաշտօնը, քանի որ այդ էր Սրբազան Քահանայապետ Պիոս Տասնմէկերրորդին կամքը։ … Մօտեցայ Իշխանին ու ըսի. «Ձերդ Գերազանցութիւն, Ձեր տրամադրութեան տակ եմ եւ կը սպասեմ Ձեր հրահանգներուն,…։
… Սուրբ Ծննդեան նախօրեակին (1923), քիչ մը ազատ ժամանակ ունենալով, ձեռքս առի «Oeuvre d’Orient» պարբերականը եւ սկսայ կարդալ Միջագետքի դոմինիկեաններու առաքելութեան մեծաւոր Հայր Սիմոնի հրատարակած յօդուածը։ Այդ առաքեալը կը պատմէր, որ իր առաքելութիւնը վերջերս սրբադասուած Թերեզա Յիսուս Մանուկի հովանաւորութեան տակ դնելէ ետք բազմաթիւ անհաւատներ դարձի եկած էին եւ ընդունած էին Եկեղեցւոյ հաւատքը։ Այդ տողերը կարդալով կանգ առի եւ սրտիս մէջ աղօթելով՝ առաքելական բոլոր գործերս յանձնեցի Սրբուհի Թերեզայի պաշտպանութեան։
***
Սիրելիներ,
Վերոյիշեալ քաղուածքով, երջանկայիշատակ Կիւրեղ Եպս. Զոհրապեան իր «Յուշեր» գիրքէն, մեծ ուրախութեամբ կը յայտարարեմ 2023 տարին «ՅՈԲԵԼԵՆԱԿԱՆ ՏԱՐԻ» է, որ ընթացքին պիտի յիշատակենք առաջին հարիւրամեակի զոյգ առիթները՝ երջանկայիշատակ Կիւրեղ եպս. Զօհրապեանի ժամանումը Յունաստան եւ իր նուիրումը Յունաստանի Հայ կաթողիկէ առաքելութեան եւ ընտանիքները՝ Սրբուհի Թերեզայի պաշտպանութեան։ Տարուան ընթացքին տեղի պիտի ունենան զանազան միջոցառումներ, այս առիթով պիտի պատուէ մեզ Ն.Ա.Գ.Տ. Ռաֆայէլ Պետրոս ԻԱ. Կաթողիկոս Պատրիարքը իր անդրանիկ հովուական այցելութեամբ Յունաստան, 28 Ապրիլ – 6 Մայիս. 2023, որուն ընթացքին պիտի հովանաւորէ գլխաւոր ձեռնարկները։
Այս ուրախ առիթներով Ձեզ կը հրաւիրեմ մասնակցելու Գոհաբանական Սուրբ Պատարագին, որու ընթացքին պիտի յայտարարուի «ՅՈԲԵԼԵՆԱԿԱՆ ՏԱՐԻ»ի բացումը, Սուրբ Գրիգոր Լուսաւորիչ եկեղեցւոյ մէջ, Նէոս Գոզմոս, Շաբաթ, 18 Փետրուար 2023 երեկոյեան ժամը 8-ին, յաւարտ Սուրբ Պատարագի տեղի պիտի ունենայ հայկական ընթրիք եկեղեցւոյ «Գոյունեան» սրահին մէջ։
Լիայոս եմ որ մեծ թիւով պիտի մասնակցիք գնահատելու Յունաստանի Հայ Կաթողիկէ առաքեալները, գլխաւորաբար Երջանկայիշատակ Կիւրեղ Եպս. Զօհրապեանը։
Անոնք, որոնք պիտի մասնակցին ընթրիքին, թող բարեհաճին կապ պահել մեր քարտուղարութեան հետ՝ օր. Արփի 6983719440։
Ձեր վրայ կը հայցեմ Աստուածային երկնառատ օրհնութիւններ։
Հայր Յովսէփ Թ.Ծ.Վ. Պէզազեան
Առաքելական Կառավարիչ
Յունաստանի Հայ կաթողիկէ Համայնքի
