Երիտասարդական ամանորեայ պարահաւոյթներ Աթէնքի եւ Թեսաղոնիկէի մէջ
Երեքշաբթի՝ 1 Յունուարի գիշերը, Հ.Յ.Դ. Յունաստանի Երիտասարդական Միութեան Ֆիքսի «Դրօ» եւ Գոքինիոյ «Փոթորիկ» խումբերը, Գոքինիոյ «Զաւարեան» կեդրոնէն ներս միասնաբար կազմակերպեցին ամանորեայ պարահաւաքոյթ, որուն մասնակցեցան աւելի քան 100 երիտասարդներ։ Նման պարահաւաքոյթ կազմակերպեց նաեւ Հ.Յ.Դ. Թեսաղոնիկէի «Ս. Թեհլիրեան» խումբը, Շաբաթ՝ 4 Յունուարի գիշերը, «Տէր Զաքարեան» սրահէն ներս, աւելի քան 120 երիտասարդներու մասնակցութեամբ։ Երկու սրահներն ալ զարդարուած էին պատշաճ կերպով, տօնական մթնոլորտին համաձայն։ Մեր երիտասարդները զուարճացան ճով երաժշտութեամբ եւ խանդավառ մթնոլորտ ստեղծեցին։
Հ.Յ.Դ Պատանեկան եւ Երիտասարդական միութիւններու գաթայի երեկոներ
Շաբաթ՝ 11 Յունուարին, Հ.Յ.Դ Յունաստանի Պատանեկան միութիւնը Աթէնքի եւ Թեսաղոնիկէի մէջ կազմակերպեց գաթայի հաւաքներ իր անդամներուն համար։ Թեսաղոնիկէի մէջ, հաւաքը տեղի ունեցաւ Հ.Յ.Դ Պատան. միութեան «Լ. Շանթ» խումբի վարչութեան կողմէ «Հայաստան» սրահէն ներս։ Օրուան բախտաւորը ստացաւ յատկանշական նուէր մը։
Նոյն օրուայ երեկոյեան, Ֆիքսի «Ա. Մանուկեան» ակումբի «Աւետիքեան» սրահին մէջ միասնաբար հաւաքուեցան Հ.Յ.Դ. Պատան. միութեան Ֆիքսի «Զարթօնք» եւ Գոքինիոյ «Ք. Միքայէլեան» խումբի անդամները՝ իրենց վարիչներով, ուր տեղի ունեցաւ ամանորեայ գաթայի բաշխումը եւ օրուայ բախտաւորը շահեցաւ գեղեցիկ նուէր մը։
Նմանօրինակ հաւաքներ կատարեցին Հ.Յ.Դ. Յունաստանի Երիտասարդական միութեան անդամները Աթէնքի եւ Թեսաղոնիկէի մէջ։
Կիրակի՝ 12 Յունուարի երեկոյեան, Թեսաղոնիկէի «Հայաստան» սրահին մէջ հաւաքուեցան Հ.Յ.Դ. «Ս. Թեհլիրեան» խումբի անդամները եւ շնորհաւորեցին Նոր Տարին աւանդական գաթայի բաշխումով։ Նոյն երեկոն, Գոքինիոյ «Զաւարեան» կեդրոնը եղաւ ժամադրավայրը Հ.Յ.Դ.
Յունաստանի Երիտ. Միութեան Ֆիքսի «Դրօ» եւ Գոքինիոյ «Փոթորիկ» խումբերուն, որոնք Միութեան Կեդրոնական վարչութեան կազմակերպութեամբ կատարեցին ամանորեայ կարկանդակի բաշխումը եւ նուէրներ բաշխեցին օրուայ բախտաւորին։ Նշենք, որ երիտասարդական երկու հաւաքները առիթը հանդիսացան մեր երիտասարդներուն համար, նոր տարուայ մուտքին վերանորոգելու իրենց աշխատանքներու թափը, նոր ծրագիրներու մշակման եւ հայ դատի պահանջատիրական գործունէութեան ծիրէն ներս։
Հ.Մ.Ը.Մ.ի սկաուտները կը կատարեն իրենց ամանօրեայ հաւաքները
Շաբաթ՝ 11 Յունուարի երեկոյեան, Գոքինիոյ եւ Ֆիքսի ակումբներուն մէջ Հ.Մ.Ը.Մ.ի սկաուտական զոյգ մասնաճիւղերը կամակերպեցին ամանորեայ աւանդական գաթայի երեկոներ։ Երկու հաւաքներուն ներկայ եղան շրջաններու հոգեւոր հովիւները, Հ.Մ.Ը.Մ.ի Շրջանային եւ տեղական վարչութիւնները, սկաուտական խորհուրդներու անդամները եւ ծնողները։
Գոքինիոյ մէջ գաթայի օրհնութիւնը կատարեց Պարէտ քհնյ. Խաչերեան իսկ Ֆիքսի մէջ՝ Նարեկ քհնյ. Շահինեան։ Երկու հոգեւոր հովիւները շնորհաւորեցին Նոր Տարին եւ Ս. Ծնունդը եւ մաղթեցին բեղուն սկաուտական տարեշրջան մը, նորանոր յաջողութիւններով եւ հայակերտ ծրագիրներով։ Խօսքերով հանդէս եկան նաեւ Հ.Մ.Ը.Մ.ի վարչականները եւ մաղթանքներ փոխանցեցին սկաուտական խումբերուն։ Հաւաքներու բախտաւորները ստացան յատկանշական նուէրներ։
