Բարնասոսի սրահը հարազատ է յունահայութեան այնպէս, ինչպէս Աթէնքի մի քանի այլ սրահներ: Ապրիլ 19ի երեկոյեան ժամադրավայրն էր կրկին շքեղ սրահը, ուր երաժշտասէրները պիտի հանդիպէին «Կիւրճիէֆ նուագախումբ»ի անդամներուն, հայկական ժողովրդային երաժշտութեան նուիրուած նուագահանդէսին մասնակցելու համար:
Ձեռնարկը կը վայելէր Հ.Հ. մշակոյթի նախարարութեան եւ Նէա Զմիռնիի քաղաքապետութեան բարձր հովանաւորութիւնը, ու կազմակերպուած էր Հ.Յ.Դ. Ֆիքսի «Արամ Մանուկեան» Կոմիտէի քարոզչական յանձնախումբին ու Հ.Յ.Դ. Յունաստանի Երիտասարդական Միութեան Ֆիքսի «Դրօ» խումբին Վարչութեան կողմէ:
Սրահը լեցուած էր արդէն հայ, բայց նաեւ յոյն բազմաթիւ երաժշտասէրներով, երբ ընկերուհի Լոռի Գույումճեան իր շնորհալի ներկայութեամբ ձեռնարկի բացումը կատարեց յունարէնով:
Ընդգծեց մեր ժողովուրդին անշէջ յիշողութիւնը եւ, անդրադառնալով 1915ի արհաւիրքին, շեշտեց հայ ժողովուրդին ապրելու վճռակամութիւնը. արդէն,- ըսաւ,- այս ձեռնարկը ցեղասպանութեան 102րդ տարելիցի ելոյթներու շարքին կը պատկանի. անհրաժեշտ տեղեկութիւնները տուաւ Կիւրճիէֆ նուագախումբի մասին՝ յայտնելով ներկաներուն, թէ անիկա հիմնուած է 2008ին Լեւոն Էսքենեանի կողմէ, որ նպատակադրած էր յայտնաբերել եւ իրագործել Գէորգ Կիւրճիէֆի ժողովրդային յօրինումները. տեղեկացուց ունկնդիրները, թէ Կիւրճիէֆ նուագախումբը արժանացած է միջազգային եւս մրցանակներու եւ թէ կը ձօնէ երեկոն Կոմիտաս Վարդապետին. ընկերուհին՝ Վարդապետի կենսագրական հանգրուանները յիշեցնելով ներկաներուն՝ ըսաւ, թէ ինչպէ՛ս Կոմիտաս՝ խորապէս ազդուած հայ մտաւորականներու դաժան ճակատագրէն ու մեր ժողովուրդի ապրած ողբերգութենէն՝ չէր կարողացած պահել հոգւոյն եւ մտքին պայծառութիւնը եւ մահացած էր Փարիզի հոգեբուժարաններէն մէկուն մէջ. վերջապէս, հակիրճ տեղեկութիւններ տալէ ետք պարոն Լեւոն Էսքենեանի մասին՝ նկարագրեց արուեստագէտի խորաթափանց սէրը ժողովրդային նուագարաններուն նկատմամբ ու բեմ հրաւիրեց զինք:
Այդ պահուն, մի առ մի յայտնուեցան վարագոյրի խորքէն նուագախումբի անդամները՝ իրենց աւանդական գործիքներով:
Նուագախումբի ղեկավար ու հիմնադիր պարոն Լեւոն Էսքենեան, խօսնակի դեր ստանձնելով, հայերէն ու անգլերէն լեզուներով մանրամասնութիւններ փոխանցեց ներկաներուն՝ նուագախումբի ստեղծման եւ անոր կտրած ճանապարհի մասին, բարի վայելում մաղթելով լսարանին:
Պահն էր սուզուելու մեր տոհմիկ երաժշտութեան ովկիանոսին մէջ՝ յիշելով, վերյիշելով ու գնահատելով հսկայ հարստութիւն մը, որուն ժառանգորդները միայն հայերը չեն, այլ բոլոր ժողովուրդները՝ Կոմիտաս Վարդապետի շնորհիւ:
Ներկայացում մըն էր մենակատարներու, որոնք բացայայտ արհեստավարժութեամբ, առանց դադարի եւ մէկ ժամէ աւելի տեւողութիւն ունեցող նուագահանդէսի ընթացքին, յաջողութեամբ կարողացան փոխանցել ունկնդիրներուն հայկական երաժշտութենէն քաղուած արժէքաւոր մարգարիտներ, որոնց լրիւ արժեւորումը միայն երաժշտագէտ մը պիտի կարենար ընել հանգամանօրէն: Բոլոր տաղանդաւոր երաժիշտները արուեստագիտական գերազանց նմոյշներ հրամցուցին ներկաներուն՝ իրենց աւանդական նուագարաններու ճամբով:
Յայտնի են մեր երաժշտութեան իւրայատուկ երանգաւորումները, որ անմիջապէս ճանաչելի կը դարձնեն որեւէ հայկական մեղեդի կամ ստեղծագործութիւն. այս երանգաւորումներու շարունակական հոսքի պատճառաւ, գրեթէ բարեպաշտ ու երկիւղած լռութեան մը մատնուած էին ունկնդիրները, որոնք առանց որեւէ դիմադրութեան յանձնուելով հոսքին՝ կարողացան ընկալել հայկական երաժշտութեան թաքուն գաղտնիքները:
Յիշատակելի երեկոյ մը, հայ եւ ընդհանրապէս երաժշտասէր հասարակութեան մը համար, որ առիթը ունեցաւ ոչ միայն սրտով, այլեւ մտքով նաեւ ըմբոշխնելու հայկական երաժշտութեան արմատներէն ծլած բացառիկ ծաղկեփունջ մը:
Ներկայ մը
«The Gurdjief Ensemble»
Երկուշաբթի՝ 18 Ապրիլին, կէսօրուան ժամը 3ին, տեղի ունեցան «The Gurdjieff Ensemble» հայկական ժողովրդային գործիքներու 11անդամ նուագախումբին կենդանի համերգը եւ Լեւոն Էսքէնեանի հարցազրոյցը՝ EPT ռատիոկայանի երրորդ յայտագրէն։
Ելոյթը յաջող անցաւ եւ ունեցաւ բաւական շատ ունկնդրողներ՝ հայ եւ մանաւանդ յոյն հասարակութեան կողմէ։ Երկու ժամ տեւող համերգի ընթացքին լսուեցան Կոմիտասի երաժշտութեան գործեր։
Հինգշաբթի՝ 20 Ապրիլին երեկոյեան ժամը 7։30ին, Նէա Զմիռնիի «Ղալաքսիաս» մշակութային կեդրոնէն ներս տեղի ունեցաւ «The Gurdjief Ensemble» հայկական ժողովրդային գործիքներու 11անդամ նուագախումբի վերջին համերգը՝ ղեկավարութեամբ Լեւոն Էսքէնեանի։
Ձեռնարկը կը վայելէր հովանաւորութիւնը Հ.Հ. մշակոյթի նախարարութեան եւ Նէա Զմիռնիի քաղաքապետութեան եւ կազմակերպուած էր Հ.Յ.Դ. Ֆիքսի «Արամ Մանուկեան» Կոմիտէի քարոզչական յանձնախումբին եւ Հ.Յ.Դ. Յունաստանի Երիտասարդական Միութեան Ֆիքսի «Դրօ» խումբի վարչութեան կողմէ։
Ելոյթին բացումը կատարեց ընկ. Ժաննա Յովսէփեան՝ ներկայացնելով Ապրիլ 24ի պատգամը, ինչպէս նաեւ՝ նուագախումբի ղեկավարն ու անդամները։ Կարճ տողերու մէջ ան ներկայացուց նաեւ Կոմիտասի կեանքն ու գործերը։ Յաջորդաբար նուագախումբը անգամ մը եւս ըլլալով յաջող կերպով ներկայացուց իր պատրաստած յայտագիրը, որ լայն ձեւով ընկալուեցաւ ներկայ հասարակութեան կողմէ։
