Կիրակի 18 Դեկտեմբեր 2022-ին, Գոքինիոյ Ս. Յակոբ եկեղեցւոյ անուանակոչութեան տօնն էր։ Այլ խօսքով, Գոքինիոյ Ս. Յակոբ եկեղեցւոյ զաւակներուն ուխտի պանծալի օրն էր, զոր ամէն տարի կը տօնակատարուի յատուկ խանդավառութեամբ։ Այդ առթիւ, Ս. Յակոբ եկեղեցւոյ ամբողջական նորոգութեան աշխատանքները հազիւ իր աւարտին հասած հոգեւոր հովիւը, Թաղային խորհուրդի ու Տիկնանց մարմնոյ անդամները անմիջապէս լծուեցան տօնի կազմակերպչական աշխատանքներուն։
Ուրբաթ, 16 Դեկտեմբեր 2022-ի կէսօրէ ետք ժամը 4։00ին, եկեղեցւոյ հոգեւոր հովիւ Տ. Պարէտ քհնյ. Խաչերեան օրհնեց տօնի մատաղի աղը, որմէ ետք Տիկնանց մարմնոյ անդամները եւ հաւատացեալ տիկիններ սկսան պատրաստութեան երկօրեայ աշխատանքին։
Տօնի նախորդող շաթաբներուն ընթացքին, Տիկնանց մարմինը լծուեցաւ տօնի աւանդական նուիրահաւաքին։ Հարկ է գոհունակութեամբ ու շնորհակալութեամբ յայտնել, թէ մեր եկեղեցւոյ ծխականները իրենց հաւատքին կառչած կատարեցին սրտաբուխ իրենց նուէրները։ Հակառակ այն իրողութեան, որ անոնք շատ քիչ ժամանակ առաջ, իրենց նիւթաբարոյական աջակցութիւնը բերած էին նաեւ եկեղեցւոյ նորոգչական աշխատանքներուն։
Կիրակի, 18 Դեկտեմբեր 2022ի առաւօտեան ժամը 9։15ին, եկեղեցւոյ մէջ կատարուեցաւ առաւօտեան ժամերգութիւն ապա Ս. պատարագ։
Յունաստանի Հայոց Թեմի Առաջնորդ Գերշ. Տ. Գեղամ Արք. Խաչերեան, ընդառաջելով Թաղային խորհուրդի հրաւէրին մատուցեց Ս. պատարագը, որու քառաձայն երգեցողութիւնը կատարեց եկեղեցւոյ դպրաց դասը, խմբավարութեամբ պրն. Քերոբ Էքիզեանի, իսկ երգեհոնի վրայ տիկ. Լիանա Սարեանի։ Խորանին վրայ սպասարկեցին սարկաւագներ՝ պրնք. Կարապետ Քէօսէեան, Պետրոս Կարապետեան, Գարլօ Աքսարէլեան եւ դպիրներ՝ պրն. Գէորգ Պօղոսեան, Քրիստափոր Աբիկեան, Տիգրան Կարապետեան, Կարօ Գասարճեան եւ Կարէն Էքիզեան։
Ընդառաջելով Թաղային խորհուրդի յղած հրաւէրներուն, տօնին ներկայ գտնուեցան Մեծի Տանն Կիլիկիոյ Կաթողիկոսութեան Ազգ. կեդր. վարչութեան անդամ տոքթ. Արմէն Տէրեան, Ազգային վարչութեան ատենապետ պրն. Թագւոր Յովակիմեան, Հայ Աւետարանական եկեղեցւոյ համայնքապետ Վերապատուելի Վիգէն Չոլաքեան, Նիքէայի քաղաքապետ պրն. Եորղոս Իուաքիմիտիս, Բիրէայի փոխ քաղաքապետ պրն. Արթօ Մարգարեան, երեսփոխան պրն. Տիմիթրիս Մարքոբուլոս, նախկին երեսփոխան պրն. Իուաննիս Թրաղաքիս, Աթէնքի եկեղեցւոյ Հոգաբարձութեան ու Նէոս Գոզմոսի եկեղեցւոյ Թաղային խորհրդոյ ներկայացուցիչ անդամներ, կառոյցներու ու միութիւններու ներկայացուցիչներ եւ ուխտաւոր ժողովուրդը։ Խումբ մը Հ.Մ.Ը.Մ.ական սկաուտներ, ներկայ գտնուեցան պատւոյ շարքը կազմակերպելու։ Իսկ Հայ Կաթողիկէ եկեղեցւոյ համայնքապետ Գերպ. Տ. Յովսէփ Ծ. Վրդ. Պէզազեան, տօնին առթիւ նախապէս փոխանցեց իր բարեմաղթութիւնները։
Քարոզէն առաջ, Տ. Պարէտ քհնյ. Խաչերեան ընթերցեց օրուան աւետարանը։ Ապա պատարագիչ՝ Գերշ. Տ. Գեղամ Արք. Խաչերեան, իր քարոզը սկսաւ Քրիստոսի խօսքով «Ես եմ բարի ու քաջ հովիւը եւ ես եմ դուռը» նշանաբանով։
Ան բացատրեց թէ, Քրիստոս ինքզինք բարի ու քաջ հովիւի կը նմանցնէ, ինչպէս նաեւ փարախի այն դրան, ուրկէ ոչխարները ապահով կը մտնեն ու կ’ելլեն։ Իսկական ու անձնազոհ հովիւը աշխարհի վրայ կարեւոր երեւոյթ մըն է։ Ան լաւապէս կը ճանչնայ իր ոչխարներուն։ Կապուած կ’ըլլայ իր հօտին, ինչպէս նաեւ գիշեր ու ցերեկ արթուն ու քաջ մնալով զանոնք կը պահէ գողերէն կամ վտանգներէն հեռու։ Հին կտակարանին մէջ թագաւորները շատ անգամ ներկայացուած են որպէս հովիւներ։
Այս պատկերը մեզի կը ներկայացնէ Աստուած եւ ժողովուրդ կապը կամ եկեղեցի եւ ժողովուրդ կապը։ Քրիստոս նաեւ դուռն է եկեղեցւոյ։ Եւ այն որ կը մտնէ անկէ, հարազատօրէն կը մտնէ եւ ինքզինք ապահով կ’զգայ։
Այսօր դարձեալ կը կատարենք Գոքինիոյ Ս. Յակոբ եկեղեցւոյ անուանակոչութեան տօնը։ Այս եկեղեցին շինեցին Գոքինիոյ մեր ժողովուրդի զաւակները քրիստոնէական հաւատքի ըմբռնումով եւ մեծ զոհողութիւններով։ Անոնք շինեցին, որպէսզի իրենք ու իրենց զաւակները անոր դուռէն ներս մտնեն հարազատօրէն։ Այլապէս օտար դռներ պիտի զառնեն։
Հոգեւոր հովիւին ու Թաղային խորհուրդին ջանքերով Ս. Յակոբ եկեղեցին վերջերս ամբողջովին նորոգուեցաւ ու անգամ մը եւս պայծառացաւ։ Սոյն աշխատանքի իրագործման համար, անոնք կարիքը ունեցան եկեղեցւոյ զաւակներուն աջակցութեան։ Եւ ահա, եկեղեցւոյ հօտը անմիջապէս հասաւ օգնութեան ու մեր բոլորի հոգիները ուրախացան։ Հետեւաբար անոնք որոնք մասնակցեցան գումա՞ր կորսնցուցին։ Իսկ անոնք որոնք չմասնակցեցան գումա՞ր շահեցան։ Ընդհակառակը, մասնակցողները իրենց հոգիները հարստացուցին եւ ուրիշներու ուրախութեան ալ պատճառ դարձան։
Քարոզի աւարտին Առաջնորդ Սրբազան Հայրը շեշտեց, որ մեր բոլոր եկեղեցիները որոնք կառուցուեցան մեր նախնիքներուն կողմէ, ունին կարեւոր դերակատարութիւն մեր հոգեւոր ու ազգային կեանքէն ներս։ Դպրոցին, ակումբին եւ միութիւններուն կողքին, մեր եկեղեցիները մեր ժողովուրդի գոյապայքարի հիմնական ու ապահով վայրերէն մին է։ Հետեւաբար զոհողութեան ամէն գնով պէտք է բաց պահել անոնց դռները։
Ետքը տեղի ունեցաւ աւանդական մատաղօրհնութիւնն ու հոգեհանգիստը։ Արարողութեան աւարտին երգուեցան «Կիլիկիա» ու «Մեր հայրենիք» ոգերգները, ապա Առաջնորդ Սրբազան Հայրը օրհնեց հաւատացեալ ժողովուրդը։ Եկեղեցական արարողութեան աւարտին, Թեմակալ Առաջնորդ Գերշ. Տ. Գեղամ Արք. Խաչերեան, եկեղեցւոյ գրասենեակէն ներս ընդունեց պաշտօնական անձնաւորութեանց շնորհաւորութիւնները։ Այդ առթիւ, Թաղային խորհուրդն ու Տիկնանց մարմինը պատրաստած էին յատուկ հիւրասիրութիւն։
ԹՂԹԱԿԻՑ
