Ընդառաջելով Հ.Մ.Ը.Մ.-ի Գոքինիոյ սկաուտական մասնաճիւղի խմբապետական կազմի հրաւէրին, Գոքինիոյ Ս. Յակոբ եկեղեցւոյ հոգեւոր հովիւ Տ. Պարէտ քհնյ. Խաչերեան, Շաբաթ 14 Յունուար 2023-ի երեկոյեան ժամը 5։30-ին ներկայ գտնուեցաւ «Զաւարեան» կեդրոնէն ներս, Նոր Տարուան առթիւ կազմի գաթայի կտրումին։
Քահանայ հայրը շնորհաւորեց Նոր Տարուան ու Ս. Ծննդեան տօները եւ մաղթեց անոնց քաջառողջութիւն ու յաջողութիւն։ Ան քաջալերեց սկաուտ քոյրերուն ու եղբայրներուն որպէսզի հաստատ մնան միութեան առաքելութեան մէջ, լաւագոյն ձեւով կատարեն իրենց յանձնուած պարտականութիւնները եւ միշտ վառ ու բարձր պահեն Հ.Մ.Ը.Մ.-ի ջահը։
Նոյն երեկոյ ժամը 7-ին, Տ. Պարէտ քհնյ. Խաչերեան ընդառաջելով Հ.Յ.Դ. Պատանեկան միութեան Վարիչ մարմնոյ հրաւէրին, ներկայ գտնուեցաւ դարձեալ «Զաւարեան» կեդրոնին մէջ, Նոր Տարուան առթիւ միութեան գաթայի կտրումին։
Քահանայ հայրը շնորհաւորեց Նոր Տարուան ու Ս. Ծննդեան տօները եւ պատանիներուն մաղթեց քաջառողջութիւն։ Ան քաջալերեց պատանիներուն, որպէսզի ուշադրութեամբ հետեւին իրենց պատասխանատուներուն եւ յայտնեց, թէ միութիւնը ունի իր յատուկ առաքելութիւնը եւ ներդրումը գաղութային մեր կեանքէն ներս։ Որովհետեւ պատանիները մեր գոյապայքարի ապագան կերտող յուսադրիչ ուժն է։ Ապա ան յաջողութիւն մաղթեց պատանիներուն։
Երեքշաբթի 24 Յունուար 2023-ի երեկոյեան ժամը 6-ին, «Զաւարեան» կեդրոնէն ներս կազմակերպուեցաւ Հայ Կապոյտ Խաչի Գոքինիոյ «Սօսէ» մասնաճիւղի Նոր Տարուան գաթայի կտրումը։ Ընդառաջելով Վարչութեան հրաւէրին, ձեռնարկին ներկայ գտնուեցաւ Գոքինիոյ Ս. Յակոբ եկեղեցւոյ հոգեւոր հովիւ Տ. Պարէտ քհնյ. Խաչերեան։
Վարչութեան կողմէ խնդրուած էր, որ Տէր Պարէտ քահանայ այդ երեկոյ ներկայացնէ Աթէնքի «Ս. Գրիգոր Լուսաւորիչ» Առաջնորդանիստ եկեղեցւոյ, Գոքինիոյ «Ս. Յակոբ» եկեղեցւոյ եւ Նէոս Գոզմոսի «Ս. Յովհաննու Կարապետ» եկեղեցւոյ հիմնադրութեանց ամփոփ պատմականը։
Քահանայ հայրը ներկայացման ընթացքին յատուկ կերպով անդրադարձաւ եւ արժեւորեց այն իրողութիւնը, թէ 1915-ի ցեղասպանութենէն եւ 1922-ի Զմիւռնիոյ աղէտէն ետք, գաղթական հայ ժողովուրդը, ուր որ հաստատուեցաւ, բազմապիսի զոհողութիւններով կառուցեց իր եկեղեցին ու դպրոցը։ Քարաշէն կառուցեց Աստուծոյ տունը եւ Ս. Մեսրոպ Մաշտոցի դպրոցը, մինչ ինք տակաւին թիթեղեայ տունի մէջ կ’ապրէր, ինչպէս նաեւ ճակատագիրը տակաւին անորոշ էր։
Գաթայի կտրումէն ետք, Տէր Պարէտ քահանայ շնորհաւորեց Նոր Տարուան ու Ս. Ծննդեան տօները եւ մաղթեց քաջառողջութիւն։ Իսկ «Սօսէ» մասնաճիւղի վարչութեան մաղթեց նորանոր յաջողութիւն իր մարդասիրական առաքելութեան մէջ։
Հաւաքի ընթացքին խօսք տրուեցաւ Հ.Յ.Դ. Կեդր. կոմիտէի ներկայացուցիչ ընկ. Հռիփսիմէ Յարութիւնեանին, որ մանրամասնօրէն ներկայացուց Արցախի ներկայ իրավիճակը, յատկապէս Բերձորի միջանցքի արգելափակման իրականութեան տակ։ Ընկերուհին անդրադարձաւ ազերի կեղծ բնապահպաններու արարքներուն ու անոնց ետին Ատրպէյճանի պետական բռնաճնշումներուն՝ ծունկի բերելու համար Արցախի ամբողջ բնակչութիւնը։
Յատուկ շեշտ դրաւ ստեղծուած մարդասիրական աղէտի հետեւանքներուն վրայ, որով աւելի քան 120.000 մարդ եւ 30.000 երեխայ կը դիմագրաւեն սովի եւ ելեկտրական հոսանքի կրճատման լուրջ խնդիրներ, որոնց վրայ կը բարդուի կազի մատակարարման խափանումը Ատրպէյճանի կողմէ։ Ան ներկայացուց նաեւ միջազգային ընտանիքին կողմէ բարձրաձայնուած բողոքի ալիքը, զանազան ատեաններու դատապարտանքի բանաձեւերը եւ միջազգային կոչը Ատրպէյճանին անյապաղ բանալու Բերձորի միջանցքը։
ԹՂԹԱԿԻՑ
