Երկուշաբթի՝ Ապրիլ 23ի յետմիջօրէի կանուխ ժամերէն սկսեալ, Նէա Զմիռնիի յուշակոթողին առջեւ հանդիսաւոր արարողութենէն եւ դափնեպսակներու զետեղումէն ետք, Սինտաղմայի հրապարակը ողողուեցաւ հարիւրաւոր յունահայ պատանիներով ու երիտասարդներով, որոնք հաւաքուած էին Հ.Յ.Դ. Յունաստանի Երիտասարդական Միութեան տաղաւարին շուրջ։
Հ.Յ.Դ. Յունաստանի Երիտասարդական Միութիւնը տաղաւարը զետեղած էր Ուրբաթ՝ 20 Ապրիլէն մինչեւ Երեքշաբթի՝ 24 Ապրիլ, Սինտաղմայի հրապարակը՝ տեղեկութիւններ փոխանցելով յոյն եւ օտար անցորդներուն Հայ Դատի վերաբերեալ: Մեր տղաքը անցորդներուն կը բաժնէին Հայոց Ցեղասպանութեան յիշատակի օրուան իմաստն ու քաղաքական պատգամը փոխանցող ու լուսաբանող թռուցիկներ։
Երբ հասաւ ցոյցի որոշուած ժամը՝ մեր ժողովուրդն ու երիտասարդութիւնը հարիւրաւորներու կազմակերպուած շարքի մէջ խմբուեցան եւ, բարձրախօսով օժտուած ինքնաշարժի առաջնորդութեամբ, սկսան յառաջանալ դէպի թրքական դեսպանատուն։ Բողոքի երթին ամբողջ տեւողութեան, օրուան կարգախօսները պարզող ցուցապաստառներու եւ ցուցատախտակներու կողքին, Եռագոյն դրօշներու ծածանումին տակ, պահանջատէր յունահայութիւնը միասնաբար բարձրաձայն վանկարկեց արդէն աւանդական դարձած Ապրիլ 24ի քաղաքական-պահանջատիրական կարգախօսները։
Ցոյցին առաջին կարգին Յունաստանի Հ.Յ.Դ. Պատանեկան Միութեան պատանիները իրենց ձեռքին բռնած հսկայ եռագոյն դրօշը ու եռագոյն փուչիկներ, ոգեւորութեամբ կը հետեւէին եւ կը մասնակցէին իրենց առաջնորդողներուն ուղղութիւններուն, բարձրաձայնօրէն վանկարկելով կարգախօսները:
Ցոյցը առաջնորդող կեդրոնական ցուցապաստառ մը կը պարզէր Հայաստանի եւ Արցախի քարտէսը, որու վրայ գրուած էր՝ This is our holy land, This is Armenia,
#recognition, #restoration, #reparation: Այլ պաստառի մը վրայ գրուած էր՝ «երէկ Թալաաթը, այսօր Էրտողանը՝ վաղը ո՞վ»:
Բնականաբար բողոքի երթին հսկող ապահովութեան ոստիկանները դադրեցուցին երկու ուղղութեամբ երթեւեկի մէկ բաժինը՝ միւս կէսին մէջ ստեղծելով մասնակի երթեւեկի հնարաւորութիւն։ Այդ կարգադրութիւնը ակամայ օգնեց, որ ինքնաշարժով անցորդներն ու հանրակառքներու յաճախորդները մօտէն հետեւին ցոյցին եւ երբեմն ալ զօրակցական արտայայտութիւններ ունենան…
Ցոյցին իրենց մասնակցութիւնը բերին պոնտական կազմակերպութիւններ եւ քիւրտեր, որոնք պաստառներ եւ դրօշակներ պարզած էին:
Ցուցարարներուն իրենց ողջոյնի խօսքը ուղեցին ու իրենց զօրակցութիւնը յայտնեցին յունական քաղաքական միութիւններու երիտասարդականներու ներկայացուցիչները, ինչպէս նաեւ պոնտական երիտասարդական միութեան ներկայացուցիչը: Ինչպէս վերջին տարիներուն, Հայոց Ցեղասպանութեան 103րդ տարելիցին առիթով Հ.Յ.Դ. Յունաստանի Երիտասարդական Միութեան նախաձեռնած այս տարուան բողոքի ցոյցը դարձեալ բախեցաւ հելլէն ոստիկանութեան արգելքին՝ մտնելու Ռիղիլիս փողոցը եւ յառաջանալու դէպի թրքական դեսպանատան շէնքը։
Ոստիկանութիւնը իր տեղադրած ինքնաշարժներով, ոչ միայն արգելք կանգնեցաւ բողոքի ցոյցին դէպի թրքական դեսպանատան շէնք յառաջանալուն, այլեւ՝ չարտօնեց, որ ցոյցը ներկայացնող պատասխանատուներու պատուիրակութիւնը մօտենայ թրքական դեսպանատան, որպէսզի յանձնէ ցոյցին պահանջատիրական յուշագիրը եւ պարտադրեց անոնց, որ դեսպանատան շէնքին մերձակայ ծառի մը վրայ փակցնեն հայութեան պահանջները պարզող յուշագիրը։
Ցուցարար բազմութիւնը անշուշտ աւելի բարձրաձայն հնչեցուց արդարութեան եւ իրաւունքի իր պահանջները, իսկ բարձրախօսով հետեւողականօրէն յստակացուեցաւ հանրութեան ու ոստիկանութեան, որ հայութեան բողոքը որեւէ ձեւով չի սպառնար Յունաստանի ներքին անդորրին եւ քաղաքացիներու անվտանգութեան, այլ՝ ուղղուած է բացառաբար ցեղասպան թուրքի ժառանգորդներուն դէմ։
Քաղաքացիական մեր տարրական իրաւունքները կաշկանդող այդ կեցուածքին ի պատասխան՝ ցոյցին պատասխանատուները բարձրախօսով հրապարակեցին բովանդակութիւնը Յունաստանի մօտ Թուրքիոյ դեսպանութեան ուղղուած հայութեան պահանջատիրական յուշագրին, որմէ պատճէններ յանձնուեցան նաեւ մամուլին ու զանգուածային լրատուական միջոցներու թղթակիցներուն։ Յաջորդաբար, Երիտասարդականի անդամները՝ «երէկ Թալաաթը, այսօր Էրտողանը՝ վաղը ո՞վ» պաստառին առջեւ, ճամբուն մէջտեղը մոմերով գրեցին 1915 թուականը ու անոնց վրայ զետեղեցին Թալաաթի եւ Էրտողանի նկարները, որոնք վառեցին:
Ցոյցը հասաւ իր աւարտին ու երիտասարդները մեծ օղակ մը կազմելով պարեցին հայկական քոջարի ու Ապրիլ 24ի այս տարուան ցոյցը եզրափակուեցաւ Յունաստանի եւ Հայաստանի հանրապետութեանց ոգերգներու խմբերգումով։
