Յունաստանի Հայ Կապոյտ Խաչը, հաւատարիմ մնալով Հ.Օ.Մ.ի մարդասիրական եւ խնամատարական առաքելութեան, առիթը չի փախցներ մեր ժողովուրդը մնայուն կերպով տեղեկացնելու բժշկական կարեւոր հարցերու շուրջ։
Անոնցմէ մէկը եղաւ բացառիկ ելոյթ մը, կազմակերպուած Հ.Կ.Խաչի Շրջանային վարչութեան կողմէ, նուիրուած «Ոսկրածուծի նուիրատուներու հայկական արխիւ» բարեգործական հիմնադրամի ծանօթացման յունահայ հասարակութեան մէջ, ներկայութեամբ հաստատութեան երկու գլխաւոր բժիշկներուն, որոնք այս առիթով Աթէնք գտնուեցան։
Շաբաթ՝ 1 Փետրուար 2020ի երեկոյեան, Գոքինիոյ «Զաւարեան» կեդրոնի «Զաքարեան-Սարաճեան» զոյգ սրահները կանուխէն լեցուն էին հայրենակիցներով եւ խաչուհի ընկերուհիներով, որոնք ընդառաջեցին Շրջ. Վարչութեան հրաւէրին։ Ելոյթը իրենց ներկայութեամբ պատուեցին Յունահայոց թեմակալ Առաջնորդ Գեղամ արք. Խաչերեան, Կաթողիկէ համայնքի գերապայծառ Յովսէփ ծ.վ. Պէզազեան, Հ.Հ. դեսպանատան հիւպատոս Աննա Խաչատրեան-Շաքարեան, Ազգային վարչութեան կողմէ Դանիէլ Աբիկեան, Հ.Յ.Դ. Կեդրոնական կոմիտէին կողմէ Հռիփսիմէ Յարութիւնեան, Աթէնքի հոգեւոր հովիւ Հրայր Ա. քհնյ. Նիկոլեան, Հ.Մ.Ը.Մի. եւ «Համազգային»ի Շրջ. վարչութիւնները, Հ.Յ.Դ. Երիտասարդական միութեան բազմաթիւ անդամներ եւ Հ.Մ.Ը.Մ.ի սկաուտ աստիճանաւորներ։
Օրուան հիւրերն էին «Ոսկրածուծի նուիրատուներու հայկական արխիւ» բարեգործական հիմնադրամի նախագահ տոքթ. Ֆրիտա Ճորտան եւ Հ.Օ.Մ.ի Ախուրեանի «Մօր ու մանկան» հիւանդանոցի տնօրէն տոքթ. Սեւակ Աւագեան։
Երեկոյին բացումը կատարեց Շրջ. Վարչութեան ատենապետուհի ընկ. Լիզէթ Գիրազեան, որ բարի գալստեան խօսքէն ետք, անդրադարձաւ երկու բժիշկներու գիտական կենսագրութեան եւ կատարած աշխատանքներուն։
Առաջին հերթին, խօսք առաւ տոքթ. Ֆրիտա Ճորտան. ան իր գոհունակութիւնը յայտնեց, որ մօտ 10 տարի առաջ գտնուած էր նոյն սրահէն ներս եւ նոյն նիւթին համար տեսակցած էր մեր հայրենակիցներուն հետ՝ այն ժամանակին ստեղծելով յունահայ համայնքէն յառաջ եկած DNAի (ծինական) առաջին հաւաքածոն։
Ապա, ցոյց տրուեցաւ կարճ տեսաժապաւէն մը հիմնադրամի 20ամեակին մասին, որ կը ներկայացնէր արեան քաղցքեղէն տարապող հայ անհատներու բժշկական խնամքի տարողութիւնը եւ ոսկրածուծի հայկական արխիւի ներդրումը անոնց ապաքինման աշխատանքին մէջ։
Յաջորդաբար, բեմ հրաւիրուեցաւ տոքթ. Սեւակ Աւագեան. ան մանրամասն կերպով ներկայացուց ոսկրածուծի նուիրատուներու արխիւի կարեւորութիւնը եւ աշխատանքի արդիւնքները վերջին 20 տարուան ընթացքին, որ հիմնադրամը կը գործէ։
Բժիշկը յայտնեց, թէ Հայաստանէն, Արցախէն եւ աշխարհի աւելի քան 33 երկիրներէ արդէն իրենց տրամադրութեան տակ ունին 32.000 հայ նուիրատուներու ծինական նմուշներ (DNA)։ Հայաստանի մէջ կը գործէ բժշկական արդիական կեդրոն մը, որ միաժամանակ կը գործակցի աշխարհի լաւագոյն հիւանդանոցներուն հետ, իսկ Յունաստանի պարագային՝ Էվանկելիզմոս հիւանդանոցին հետ, ապահովելու համար լաւագոյն արդիւնքները, ամէն անգամ երբ կարիքը կը զգացուի փրկել արեան քաղցքեղէն տարապող հայրենակիցի մը կեանքը։
Յարգելի բժիշկը յայտնեց, որ մինչեւ այսօր, Հայաստանի բժշկական կեդրոնը կարողացած է 34 հայերու կեանքը փրկել, թիւ մը, որ իսկական նուաճում մըն է եւ որ ցոյց կու տայ հիմնադրամի կարեւոր եւ անկիւնադարձային դերակատարութիւնը հայ բժշկութեան ոլորտէն ներս։
Ճիշդ այս պատճառով ալ, հրամայական կը նկատուի ընդլայնել նուիրատուներու ցանցը, որպէսզի աւելի հեշտութեամբ գտնուին ծինական նոյն տուեալները, ամէն անգամ երբ կարիքը կայ։ Ան ընդգծեց, թէ այնքան կարեւոր նկատուած է հիմնադրամի աշխատանքը, որ Հայաստանեայց եկեղեցւոյ երկու Կաթողիկոսները նուիրատու եղած են, իսկ հայ եկեղեցին եւս՝ իր բարոյական եւ նիւթական զօրակցութեամբ, կը սատարէ հիմնադրամի ծրագիրներուն։
Յաջորդաբար, բժիշկ Սեւակ Աւագեան անդրադարձաւ արեան քաղցքեղին (Λευχαιμία) եւ ներկայացուց կարիքաւորներուն վրայ այս հիւանդութիւնը չէզոքացնելու համար նուիրատուներէ արեան բջիջներու պատուաստումի գործընթացը։ Ան յայտնեց, թէ հայ ժողովուրդը ունի ծինական իւրայատուկ նոյնութիւն, որ կը յատկանշէ հայ ցեղը եւ որ դարերէն եկող հաստատուած այն յատկանիշն է, երբ կ՚անդրադառնանք հայ ցեղի արեան։
Ան նաեւ ըսաւ, որ Միջերկրականի ժողովուրդներու (յոյն, հրեայ, իտալացի, եւ այլն) ծինական յատկանիշները կրնան համընկնիլ հայկական ծիներուն։ Յատկանշականօրէն, հայ գիտնականը յայտնեց թէ բժշկական գործակցութիւն կայ Թուրքիոյ հետ եւս, ուր հոն ի յայտ կու գան ծինական նմուշներ, որոնք հայկական են եւ անոնց գոյութիւնը հետեւանք է Ցեղասպանութենէն ետք բռնի թրքացման, որուն ենթարկուեցան հարիւր հազարաւոր հայեր։
Իր խօսքի աւարտին, տոքթ. Աւագեան կոչ ուղղեց 18էն մինչեւ 50 տարեկան հայերուն մասնակցիլ հիմնադրամի աշխատանքին եւ դառնալ նուիրատու։ Ան յայտնեց, թէ կեանք մը փրկելու արժէքը անգնահատելի է, ու երբ կարիքը կը զգացուի, այն նուիրատուն՝ որուն ծինական յատկանիշները կը նոյնանան հիւանդի մը տուեալներուն հետ, միայն 150 կրամ արեան քանակութիւն մը կը տրամադրէ։
Իր խօսքի աւարտին, յարգելի բժիշկը հանգամանօրէն պատասխանեց բազմաթիւ հարցումներու եւ տուաւ յաւելեալ տեղեկութիւններ։
Ապա, ան խօսեցաւ Հ.Օ.Մ.ի Ախուրեանի «Մօր ու մանկան առողջութեան կեդրոն»ի գործունէութեան մասին, տուաւ մանրամասն տեղեկութիւններ ծննդաբերական եւ կնոջ առողջութեան համար տրուած բժշկական խնամքին շուրջ, ընդգծելով՝ թէ 1997էն ի վեր, բժշկական բարձր մակարդակի սարքերով եւ ծառայութիւններով օժտուած կեդրոնէն ներս, բազմահազար երեխաներ ծնած են մինչեւ այսօր եւ տասնեակ հազարներով փոքրիկներու եւ մայրերու առողջապահական խնամք տրուած է։ Ո՛չ մէկ մայրական մահացութեան դէպք արձանագրուած է Հ.Օ.Մ.ի կեդրոնին մէջ։
Խօսքի աւարտին, ցուցադրուեցաւ Ախուրեանի «Մօր ու մանկան առողջութեան կեդրոն»ի մասին տեսանիւթ մը, ուր յայտնի եղաւ բարձր ծառայութիւններու տարողութիւնը եւ Հ.Օ.Մ.ի կողմէ տրուած ուշադրութիւնը կեդրոնի զարգացման համար։
Ընկ. Լիզէթ Շանկայեան բեմ հրաւիրեց Առաջնորդ Սրբազան հայրը, որ ներշնչուած խօսքով մը վեր առաւ Հ.Օ.Մ.ի մարդասիրական եւ խնամատարական ծաւալուն ներդրումը հայ ժողովուրդի կարիքներուն եւ մասնաւորապէս դրուատեց «Ոսկրածուծի նուիրատուներու հայկական արխիւ» բարեգործական հիմնադրամի գործունէութիւնը, նշելով թէ անիկա ազգային եւ համահայկական նշանակութիւն ունեցող աշխատանք մըն է եւ կը վերաբերի մեր ինքնութեան պահպանման։ Ան յայտնեց, թէ պէտք է ներգրաւել երիտասարդները եւ տարածել նուիրատու ըլլալու վեհանձնութեան ոգին, որ պիտի նպաստէ անոնց մէջ ազգային գիտակցութեան եւ պատկանելիութեան ամրագրման։ Սրբազան հայրը եզրափակեց ըսելով թէ, ինչպէս Համահայկական հիմնադրամներուն մէջ հայը միշտ առատաձեռն եղած է, այսպէս ալ Ոսկրածուծի հիմնադրամը պէտք է աւելիով տարածուի եւ Համահայկական հիմնադրամի մը վերածուի բոլոր հայերու ներդրումով։
Ելոյթէն անմիջապէս ետք, մեծ թիւով հայրենակիցներ՝ մասնաւորաբար երիտասարդները մօտեցան պատրաստուած յատուկ սեղանին եւ ամէն մէկը ծինական նմուշ մը տուաւ ու գրանցուեցաւ «Ոսկրածուծի նուիրատուներու հայկական արխիւ»ին մէջ։
Հիմնադրամի երկու բժիշկները իրենց բարձր գոհունակութիւնը յայտնեցին, որ յունահայ 25 նուիրատուներ եւս հարստացուցին այս կարեւոր ծրագիրի արխիւները։
