Յունաստանի Հ.Յ.Դաշնակցութեան Կեդրոնական Կոմիտէն ջերմօրէն կը շնորհաւորէ ամանորը թեմիս Առաջնորդ Սրբազանին, ազգային իշխանութեանց ու յարակից մարմիններուն, յարանուանութեանց հոգեւոր պետերուն, Հայ Կապոյտ Խաչի եւ Հայ Գթութեան Խաչի, Հ.Մ.Ը.Մ.ի ու «Համազգային»ի շրջանային ու տեղական վարչութիւններուն, կրօնական դասուն ու կրթական մշակներուն, գաղափարի իր ընկերներուն, ինչպէս նաեւ յունահայ օճախի բոլոր ազգայիններուն եւ կը մաղթէ լիակատար յաջողութիւն՝ անոնց ազգային, եկեղեցական, միութենական եւ անձնական-ընտանեկան ծրագիրներուն մէջ:
Նոր Տարին նո՛ր յոյսեր եւ նո՛ր մարտահրաւէրներ կը բանայ մեր ազգին դիմաց: Ամբողջ հայութիւնը մեծ ակնկալութիւններ կապած է՝ ժողովըրդային ազատ կամքով ընտրուած Հայաստանի Հանրապետութեան Ազգային Ժողովի կայացնելիք օրէնսդրական որոշումներուն, նորընտիր վարչապետի գլխաւորութեամբ ու ի մօտոյ կազմուելիք կառավարութեան վրայ, որոնց համար ստեղծուած է պատմական սքանչելի առիթ մը, որ մեր հայրենիքի տնտեսութիւնն ու պետական վարչամեքենան ձերբազատեն մենաշնորհներու տիրապետութենէն, վերացնեն անպատժելիութիւնը, երկրին մէջ հաստատեն արդարութեան ու իրաւունքի գերիշխանութիւնը եւ անզիջող ըլլան Ղարաբաղի անկախութեան ու ազատագրուած հողերու պահանջքին մէջ:
Բոլորս միասին, կուռ շարքերով ու անկոտրում կամքով դիմաւորենք նոր տարուան բերած պատմական այս նոր ու անկրկնելի առիթը Հայաստանի փառքին համար եւ ի պարծանս հայ ժողովուրդին:
Ազգային նպատակներու իրականացման համար հզօրութիւն է եւ յաղթանակի գրաւական՝ Հայաստան-սփիւռք միասնութիւնը:
Միասնութեամբ դիմաւորենք ՆՈՐ ՏԱՐԻՆ եւ զիրար շնորհաւորենք՝ միասնաբա՛ր մեր արձանագրած յաջողութիւններուն համար:
ՇՆՈՐՀԱՒՈ՜Ր ՆՈՐ ՏԱՐԻ:
Հ.Յ.Դ. ՅՈՒՆԱՍՏԱՆԻ ԿԵԴՐՈՆԱԿԱՆ ԿՈՄԻՏԷ