Վերջին տարիներուն Արցախի պատանիներու ամառնային հանգիստի հաճելի ու անբաժանելի մասը դարձած են Հ.Յ.Դաշնակցութեան աշխարհասփիւռ կառոյցներու երիտասարդական միութիւններու կողմէ Արցախի տարբեր շրջաններու մէջ կազմակերպուող բակային ճամբարները: Բացառութիւն չէ նաեւ այս տարին:
Յուլիս 10ին, Ստեփանակերտի Աշոտ Ղուլեանի անունը կրող դպրոցին մէջ, մեկնարկած է 10-16 տարեկան պատանիներու համար նախատեսուած ճամբարը, զոր նախաձեռնած է Հ.Յ.Դ. արեւմտեան շրջանի երիտասարդական միութիւնը: Ճամբարի ընդհանուր պատասխանատու Վահէ Լեփեջեան արդէն քանի մը անգամ մասնակցած է Արցախի մէջ կազմակերպուող ճամբարներուն, իսկ խումբի մնացած անդամները շատ եղած են Հայաստան եւ Արցախ, իսկ ճամբարներու ծրագիրով առաջին անգամ այստեղ են,- կը հաղորդէ «Ապառաժ»:
Ըստ Վահէ Լեփեջեանի՝ ճամբարի կազմակերպումը ունի քանի մը նպատակներ: «Առաջին հերթին Սփիւռքի մէջ ապրող հայերու համար շատ լաւ առիթ է, որպէսզի գալով այստեղ իրենց աչքով տեսնեն տարիներու ընթացքին գիրքերէ հայրենիքի մասին սորվածները: Միաժամանակ՝ այստեղի հայութիւնը պէտք է իմանայ, որ դուրսի հայերը իրենց չեն մոռցած, միշտ կը մտածեն իրենց մասին եւ հնարաւորը կ՛ընեն օգնելու համար: Նպատակներէն մէկն ալ մարդոց տեղեկացնելն է, որ Դաշնակցութիւնը իր ուժերը կը տրամարադրէ հայ ժողովուրդին օգնելու համար»,- նշած է ան:
Ընդհանրապէս ամէն ճամբար երկու շաբաթ կը տեւէ` 10 օրուան ճամբարային եւ 4 օրուան հանգիստի ծրագիրով: Այդ ընթացքին կը նախատեսուին հայոց պատմութեան, Դաշնակցութեան պատմութեան, հայրենասիրական երգերու ուսուցում, մարզական խաղերու, մրցումներու կազմակերպում: Նպատակն է բարելաւել մարմնական եւ մտաւոր ունակութիւնները, ամրապնդել հայրենիքի հետ կապը:
