ՅԱՐՈՒԹ ՍԱՍՈՒՆԵԱՆ — «Քալիֆորնիա Քուրիըր»
Թուրքիոյ կառավարութեան վարձած լոպպիստական եւ PR ընկերութիւնները բացայայտելէ ետք՝ այժմ կը տեղեկացնենք Ատրպէյճանի վարձած չորս համանման ընկերութիւններուն մասին:
Դիտարկելով Ատրպէյճանի նենգամիտ մօտեցումները արտաքին քաղաքականութեան վերաբերեալ՝ նկատեցի հետեւեալ պատկերը.
1) Ինչպիսի՛ գործողութիւններու ալ որ ձեռնարկեն ամերիկահայերը իրենց հարցերու լուծման համար, Ատրպէյճան կը ձգտի նմանակել անոնց եւ հակազդել՝ Միացեալ Նահանգներու մէջ իր վարձու ընկերութիւններուն միջոցով: Նախագահ Ալիեւ 2013ի իր ելոյթին մէջ յայտարարեց, որ Ատրպէյճանի «հիմնական թշնամին հայկական լոպպին է»: Ան նաեւ նշեց, որ «հայկական լոպպին օր ու գիշեր կը փորձէ զրպարտել Ատրպէյճանը, վարկաբեկել անոր հեղինակութիւնը: Անոնք նիւթական մեծ միջոցներ ունին: Անոնք սերտօրէն կապուած են իրենց երկիրներու իշխանութիւններուն հետ, ուր «լոպպինկ»ի անուան տակ նուիրատւութիւններ կ՝ընեն օրէնսդիրներուն: Բայց իրականութեան մէջ ատիկա կաշառք է: Այսպիսով՝ հայկական լոպպին մեր դէմ կազմակերպուած պայքարի առաջատարն է»: Իր քննադատական ծաւալուն ճառին մէջ, Ալիեւ կեղծօրէն հայերուն վերագրեց ամբողջ աշխարհի մէջ կաշառելու հետեւողական արշաւը, որ կ՝իրականացուի իր իսկ կառավարութեան կողմէ:
2) Ատրպէյճան կը հետեւի Թուրքիոյ աւելի փորձառու պաշտօնեաներու քայլերուն՝ Հայաստանի եւ հայկական հարցերու վերաբերեալ իր քաղաքականութեան մէջ, ներառեալ՝ Հայոց Ցեղասպանութեան ժխտումը եւ Ատրպէյճանի ու Թուրքիոյ կողմէ կատարուած յանցագործութիւններու համար հայերը մեղադրելը: Ցաւօք, Ատրպէյճան նաեւ կը նմանակէ Թուրքիան սեփական քաղաքացիները ճնշելու առումով` դժուարացնելով որոշել, թէ այս երկու երկիրներէն ո՞րն է աւելի բռնատիրական:
3) Ատրպէյճանի կառավարութիւնը՝ ընդունելով, որ իր դիմագիծը մարդու իրաւունքներու խախտումներուն պատճառով վարկաբեկուած է Արեւմուտքի մէջ, վարձած է PR եւ լոպպիստական ընկերութիւններ՝ մաքրազերծելու համար իր բացասական հեղինակութիւնը: Պէտք էր ակնկալել, որ եթէ վարչակարգը այդքան մտահոգ է արտասահմանի մէջ իր վատ համբաւով, ան իր երկրին մէջ պիտի բարելաւէր մարդու իրաւունքները, ուստի անհրաժեշտ չէր ըլլար միլիոնաւոր տոլարներ վատնել ամերիկեան ընկերութիւններու վրայ` իր դիմագիծը մաքրելու անհնարին գործը իրականացնելու համար: Ալիեւ, 2013ի իր ելոյթին մէջ, Ատրպէյճանը բաղձանքով նկարագրեց իբրեւ «ժամանակակից, առաջադէմ, բաց, հանդուրժողական երկիր»: Ո՞վ կրնայ խաբուիլ նման բացայայտ սուտերով:
Ատրպէյճանի կառավարութիւնը՝ տարիներ շարունակ վարձած է տասնեակ PR եւ լոպպիստական ընկերութիւններ, սակայն այս պահուն, անոր համար կ՝աշխատին ընդամէնը չորս նման ընկերութիւններ.-
1) Podesta Group, Incին Ատրպէյճան կը վճարէ ամսական 45 հազար տոլար. «(Ատրպէյճանին) վերաբերող հարցերու ուսումնասիրութեան եւ վերլուծութեան համար. խորհրդատուութիւն (Ատրպէյճանին) Ա.Մ.Ն. քաղաքականութեան վերաբերեալ, գործունէութիւն Քոնկրէսի մէջ եւ գործադիր ճիւղի եւ ընդհանուր առմամբ, Ա.Մ.Ն. քաղաքական դաշտին մէջ տեղի ունեցող զարգացումներուն վերաբերեալ. անհրաժեշտութեան պարագային՝ կապերու հաստատում Քոնկրէսի անդամներու, անոնց աշխատակազմներու եւ գործադիր ճիւղի պաշտօնեաներու, լրատուամիջոցներու եւ հասարակակական կազմակերպութիւններու հետ»:
2) SOCAR USAը (Ատրպէյճանի պետական քարիւղի ընկերութեան Ա.Մ.Ն. դուստր ձեռնարկութիւնը) կը վճարէ Roberti White Ս.Պ.Ը.ին 125 հազար տոլար «(Ատրպէյճանին) վերաբերող հարցերու ուսումնասիրութեան եւ վերլուծութեան համար. խորհրդատուութիւն (Ատրպէյճանին) Ա.Մ.Ն. քաղաքականութեան վերաբերեալ, գործունէութիւն Քոնկրէսի մէջ եւ գործադիր ճիւղի եւ ընդհանուր առմամբ, Ա.Մ.Ն. քաղաքական դաշտին մէջ տեղի ունեցող զարգացումներուն վերաբերեալ. անհրաժեշտութեան պարագային՝ կապերու հաստատում Քոնկրէսի անդամներու, անոնց աշխատակազմներու եւ գործադիր ճիւղի պաշտօնեաներու, լրատուամիջոցներու եւ հասարակակական կազմակերպութիւններու հետ»: Զարմանալի չէ, որ Roberti Whiteի կատարած գործառոյթները SOCAR USAի համար նոյնն են, ինչ Podesta Group, Inc.ինը Ատրպէյճանի կառավարութեան համար:
3) Ուաշինկթընի մէջ Ատրպէյճանի դեսպանատունը ամսական 50 հազար տոլար կը վճարէ BGR Government Affairs ՍՊԸին, «ռազմավարական ուղղորդում եւ խորհրդատուութիւն տրամադրելու համար պետական գործերու եւ PR գործունէութեան առնչութեամբ Միացեալ Նահանգներու մէջ: Այս է հարկ եղած մօտեցումը Միացեալ Նահանգներու կառավարութեան պաշտօնատար անձերուն, հասարակական կազմակերպութիւններու, լրատուամիջոցներու ներկայացուցիչներու եւ այլ անհատներու Միացեալ Նահանգներու մէջ»:
4) Լոս Անճելըսի մէջ գտնուող Ատրպէյճանի հիւպատոսութիւնը, 2009ին, չորս ամիս ժամկէտով, միանուագ 35 հազար տոլար վճարով վարձած է Tool Shed Group ընկերութիւնը, որուն գլխաւոր գրասենեակը սկիզբը կը գտնուէր Ուուտլենտ Հիլզի մէջ, Քալիֆորնիա, իսկ այժմ` Փարքըրի, Քոլորատօ: Tool Shed Groupը այժմ նաեւ կը ներկայացնէ Ատրպէյճանի Հանրապետութիւնը: Այդ ժամանակէն ի վեր պայմանագիրը կը թարմացուի իւրաքանչիւր վեց ամիսը մէկ: Tool Shedը կը ղեկավարէ Ամերիկայի Հրէական Կոմիտէի հասարակութեան հետ կապերու նախկին տնօրէն Ճէյսըն Գացը: Tool Shedը կը տրամադրէ «խորհրդատուական ծառայութիւններ հիւպատոսութեան, ներառեալ ճեպազրոյցներու եւ դասախօսութիւններու կազմակերպում, հանդիպումներու դիւրացում համայնքի անդամներու, ընտրուած եւ նշանակովի պաշտօնեաներու, ձեռնարկութիւններու ղեկավարներու հետ, «հեղինակային կարծիքներ»ու շարադրում ու տարածում»:
Վերջերս, Լոս Անճելըսի մէջ Ատրպէյճանի գլխաւոր հիւպատոսութիւնը տարածեց` «Լեռնային Ղարաբաղ. պատմութիւն եւ փաստեր» խորագիրով գունաւոր գրքոյկ մը՝ Լոս Անճելըսի մէջ գտնուող բոլոր հիւպատոսութիւններուն, եւ հաւանաբար շատ ուրիշներու: Այս 16էջանոց քարոզչական նիւթը, որ լի է Արցախի մասին խեղաթիւրումներով, ամենայն հաւանականութեամբ պատրաստուած էր Ատրպէյճանի եւ անոր հիւպատոսութեան PR եւ լոպպիստական ընկերութեան` Tool Shed Groupի կողմէ: 16րդ էջի վերջը նշուած է` «հրատարակուած է Ատրպէյճանի հիւպատոսութեան կողմէ Լոս Անճելըսի մէջ»: Հետաքրքրական է, որ այս նախադասութեան մէջ նշուած չէ, թէ ո՛վ պատրաստած է գրքոյկը, այլ՝ պարզապէս, թէ ո՛վ հրատարակած է զայն…
